रोमी 6
6
स्यिवा दाङ मिहली
1ओ़हठी यिहन्सीमानानी ता़ह ओहराङगी च्यि माज्ये ले? किन्ज्योगी ओहराङला काटीन बोल्बु जेती नाङगे म़ेदीनी च्यि ओहराङ तोहरोङ तिहक्पा पेहती तेहच्ये ले? 2मिहम्बा, ओ़ह ल़ेहमु पेहच्ये मेहयोहङगे। तिहक्पाकी तेहन्दालानी ओहराङ स्यि सिहन्सीन, ओ़ह सोङबे ता़ह ओहराङगी येहपाराङ तिहक्पाराङ पेहती तेहच्ये मेहयोहङगे। 3ख्याया़ला क्यी़हराङ येह, ओहराङगी मास्यीकाला बप्तिस्मा ज्योर्केमु मिहरो ङ्याम्बु ओहराङॱआङ च्यी़राङ पेहती स्यिसीन। 4ओ़ह सोङबे ओहराङॱआङ बप्तिस्मा लाहमले मास्यीका ङ्याम्बुराङ स्यिदी साला पिहप्सीन। वाङज्या छ्यिम्बु नोम नाङगे किन्ज्यो याहपगी राहङगी ज़िज्यिद लाहमले येशू मास्यीकाला टोहङग्यो ग्या़लेगी सोम्बो ज़्याङ च्य़ू नाङसीन। ओ़ह सोङबे ओहराङॱआङ तोहङमागी मिहलीया़ क्युर्ती साम्बा मिहलीला मास्यीकागी ल़ेहमुराङ मिहजी ताङज्ये येह।#कल २:१२
5च्यिबेमाना मिहरोगी स्यिवा ङ्याम्बु ओहराङॱआङ ङ्याम्बुराङ डी़क्यो येहसीमाना मिहरो टोहङग्योलेगी सोम्बो ज़्याङ नाङगेमु ओहराङॱआङ मिहरो ङ्याम्बु च्यी़राङ ओहङज्ये येह। 6ओहराङला दि क्यी़हराङ येह, तिहक्पागी ओङ छ्य़े तेहक्योकी मिहली तोङज्यु म़ेदी, ओहले ता़ह यिहन्ज्यु ओहराङ तिहक्पाकी योक्पु माहन्डोज्यु म़ेदी ओहराङगी तोहङमागी मिहली मास्यीका ङ्याम्बुराङ क्याहङस्यीङला च्याङ सिहन्दी येह। 7च्यिबेमाना स्यिक्यो मिह तिहक्पालेगी टोहल सिहन्ग्यो ओहङगे। 8ओ़ह सोङबे का़हलेॱआङ ओहराङ मास्यीका ङ्याम्बुराङ स्यिक्यो यिहनानी मिहरो ङ्याम्बुराङ सोम्बो लो़हज्ये येह माएँ तामला ओहराङ यिह छ्य़ेगे। 9च्यिबेमाना ओहराङला दि ताम क्यी़ह येहबा, मास्यीका टोहङदीॱआङ येहपाराङ सोम्बो ज़्याङ नाङसीन। ता़ह यिहन्ज्यु मिहरो नाहमॱआङ टोहङ नाङज्ये म़ेह, ओहले मिहरो थो़ला स्यिवाकी ओङ छ्य़े ख़ूज्ये म़ेह। 10तिहक्पाकी तेहन्दाला मास्यीका लेहमा च्यी़ टोहङ नाङसीन। ता़ह येहपाराङ मास्यीका टोहङ नाङज्ये म़ेह ओ़हदी नाहम मानागी तेहन्दाला यिहम्बा। यिहॱनाङ ता़ह मास्यीकागी, किन्ज्योगी ज़िज्यिदगी तेहन्दाला राहङगी मिहजी ताङ नाङगे। 11ओ़हठीॱराङ पेहती ख्याया़गीॱआङ राहङ-राहङला तिहक्पाकी तेहन्दालादी स्यिक्यो यिहॱनाङ किन्ज्योगी तेहन्दालादी मास्यीका येशू ङ्याम्बुराङ सोम्बो काहल्ग्यो म़ेदी ऩे कोहएँ। 12ओ़ह सोङबे ख्या राहङ ज़ुबुकी योक्पु माहन्डोज्यु म़ेदी ख्यादी स्यिदी डोएँ ज़ुबुला तिहक्पागी ओङ छ्य़े मा़हच्यु। मिहन्सीमाना ख्यागी ज़ुबुकी चोक्पा सेम्बाया़ पेहच्ये येह। 13राहङ ज़ुबुकी ओङबुया़ला तिहक्पागी ल़ेहया़ पेहच्येला चि माहक्याहप। यिहॱनाङ स्यिवाले मिहलीला ख्योङग्यो मिहया़ ल़ेहमु पेहती राहङला किन्ज्योला च्योल्दोङ, ओहले राहङ ज़ुबुकी ओङबुया़ला या़हबु ल़ेहया़ पेहच्येला किन्ज्योला चि क्याहप्तोङ। 14च्यिबेमाना तिहक्पागी ख्या थो़ला ओङ छ्य़ेज्ये म़ेह, च्यिबेमाना ख्या छ्य़े-ठिमकी ओङ चो़ला म़ेह, यिहॱनाङ किन्ज्योगी काटीनकी ओङ चो़ला येहबा।
टाहङदेनकी योक्पु
15ता़ह च्यि ले? च्यि ओहराङ छ्य़े-ठिमकी ओङ चो़ला म़ेहबा, यिहॱनाङ काटीनकी ओङ चो़ला येहबा म़ेदीनी तिहक्पा पेहच्ये ले? ओ़ह ल़ेहमु मिहम्बा। 16ख्ये का़हन्दीगी का ची़गे ख्ये खोदीॱराङ योक्पु डोएँ। तिहक्पाकी योक्पु पेहती का ङ्यिहन्सीन माना ख्या स्यिज्ये येह यिहॱनाङ किन्ज्योकी का ङ्यिहन्सीमाना ओ़हदीगी ख्याला टाहङदेनकी लाहम ङो़ले ठिच्ये येह। 17ख्या तोहङले तिहक्पाकी योक्पु काहल्दी येहकें यिहॱनाङ ताहन्दा ख्यागी यिह यिहन्ज्युराङ किन्ज्योगी लोप नाङग्यो लोप्च्युङया़ ची़गे काहल्सीन। दिगी तेहन्दाला किन्ज्योला थुज्यी-छ्ये़ फुल्गे। 18ख्या तिहक्पालेगी टोहल्दी ता़ह टाहङदेनकी योक्पु काहल्दी येह। 19मिह-ज़ुबुला ते़बे माहङबुराङ मा फाम्बुया़ ओहङगे ओ़ह ल़ेहमु मा-फाम्बु ख्या ङ्याम्बुॱआङ येहकें सोङबे ङाह ख्याया़गी ङोह स्य़े ख़ूएँ पेहती ताम माएँराङ येहबा। च्यिबेमाना ख्याया़गी लेहमा च्यी़ राहङ ज़ुबुकी ओङबुया़ला मेहचाङा दाङ तोहरोङ माहङबु तिहक्पाया़ पेहच्येला चि क्याहप्क्यो येहकें, ता़ह ओ़हठीॱराङ पेहती नाम्पार-ताहक्पा ओहङज्येला राहङ ओङबुया़ला टाहङदेनकी योक्पु ज़ोज्येला चि क्याहप्तोङ। 20ख्या तिहक्पाकी योक्पु येहकेंमु टाहङदेन यिहन्ज्यु राहङवाङ येहकें। 21ता़ह, ख्या ताहन्दा का़हन्दी से़हया़ला ङोहजा पेहकें, ओ़ह से़हया़लेगी ख्याया़गी च्यि ख्येप्साङ ज्योर्पा ले? ओ़ह से़हया़गीनी स्यिवाला गा क्याल्गे। 22यिहॱनाङ ता़ह ख्याया़ तिहक्पालेगी टोहल्दी किन्ज्योकी योक्पु काहल्दी येह, ओहले ख्याया़गी ज्योर्केन ख्येप्साङती नाम्पार-ताहक्पा यिहम्बा। ओहले दिगी ख्याया़ला नाहमॱआङ स्यिज्ये म़ेहबागी मिहली ज़ाङबुला क्याल्गे। 23च्यिबेमाना तिहक्पागी ले़गादी स्यिवा यिहम्बा, यिहॱनाङ किन्ज्योगी आहन्डाराङ नाङग्यो काबाप मास्यीका येशू ओहराङ चो़वोला था़ म़ेहबागी मिहली ज़ाङबु यिहम्बा।
Praegu valitud:
रोमी 6: HYLM
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
© 2023 (Active), Wycliffe Bible Translators, Inc. All rights reserved.