रोमी 13
13
स्युहङगी ओङ चो़ला तेह कोहएँ
1मिह थाम्ज्यी क्याहल-ठिम ताङगेन्गी ओङ चो़ला तेहच्यु। किन्ज्यो लाहमले ओहङग्यो ओङ मिहम्बा लेहमेन का़हन्दीॱआङ ओङ मेहयोहङगे। ओहले थाम्ज्यी ओङ छ्य़ेगे मिहया़ला किन्ज्योगीॱराङ कुल नाङग्यो यिहम्बा। 2ओ़ह सोङबे का़हन्दीगी स्युहङला टाह पेहकें खोगी किन्ज्योकी काॱलाङ टाह पेहकें। दि ल़ेहमु पेहकेनया़ला ङ्य़ेहबा फो़ज्ये येह। 3च्यिबेमाना स्युहङ ङ्याम्बुनी या़हबु ल़ेह पेहकेनया़गी मिहम्बा चोक्पा ल़ेह पेहकेनया़ गा ज्यी़ कोहएँ। ख्याला स्युहङ ङ्याम्बु मा़हन्ज्यीबा पेहती तेहच्ये सेम येहसीमाना ल़ेह या़हबु पेहतोङ ओहले खुङगी ख्याला या़हबु म़ेदी माज्ये येह। 4च्यिबेमाना ओङ छ्य़ेगेया़ किन्ज्योला स्याहप्तो स्युहएँगी मिहया़ यिहम्बा ओहले मिहरोगी खुङया़ला ख्याया़लाॱराङ या़हबु ओहङज्यु म़ेदी कुल नाङग्यो यिहम्बा। ख्यागी ल़ेह चोक्पा पेहसीनमाना च्यी़राङ स्युहङ ङ्याम्बु ज्यी़दोङ च्यिबेमाना ख्याला ङ्य़ेहबा काल्ज्येला स्युहङ ङ्याम्बु ओङ येहबा। स्युहङनी ल़ेह चोक्पा पेहकेनया़ला ङ्य़ेहबा काल्गेन किन्ज्योला स्याहप्तो स्युहएँगी मिहया़ यिहम्बा। 5ओ़ह सोङबे किन्ज्योगी ङ्य़ेहबा काल नाङगे म़ेदी ज्यी़दी स्युहङला ची़नाङ पेहकेन च्यी़राङ मिहम्बा, यिहॱनाङ राहङ नावागी दि ल़ेहमु पेहकेन्दी या़हबुॱराङ यिहम्बा म़ेदीॱआङ ख्यागी स्युहङला ची़नाङ पेह कोहएँ।
6ओ़ह सोङबेॱआङ ख्यागी स्युहङला ठाल च्याल कोहक्यो यिहम्बा। च्यिबेमाना स्युहङ-ल़ेहपेनया़ दिगी तेहन्दालाराङ ल़ेह पेह तेहक्यो किन्ज्योला स्याहप्तो स्युहएँगी मिहया़ यिहन।#मत्ती २२:२१; मर्क १२:१७; लूक २०:२५ 7सुला च्याल कोहच्ये येहबा ओ़ह थाम्ज्यीराङ च्याल्दोङ, ठाल च्याल कोहएँदीला ठाल ओहले भन्सार च्याल कोहएँदीला भन्सार च्याल्दोङ। ओ़हठीॱराङ पेहती ची़नाङ पेह कोहएँदीला ची़नाङ पेहतोङ। ओहले का़हन्दीला चा़ पेह कोहएँ यिहम्बा ओ़हदीला चा़ पेहतोङ।
च्यी़गी च्यी़ला पेह कोहएँगी छ्याप्स्यीया़
8च्यी़गी च्यी़ला चेवा पेहकें तामला मिहम्बानी लेहमेन च्यि तामॱलाङ सुज्यीदीॱआङ पेहलेन माहखुर। च्यिबेमाना राहङगी टोहङरोला चेवा पेहकेन्दीगी छ्य़े-ठिम छाङबु पेह सिहन्ग्यो ओहङगे। 9“ख्येगी छ्येउ-छ्येंमु माहबे, मिह माहसे, कुमेन माहक्याहप, ह्अम्बा माहबे,” दि काया़ म़ेदी लेहमेन काहजे काया़ येहबा, ओ़ह थाम्ज्यीकी ब्रामती दि कालाॱराङ ज्योर्के यिहम्बा, पे यिहॱना़ “ख्येगी राहङ टोहङरोला राहङला ल़ेहमुराङ चेवा पेहतोङ।”#प्रस २०:१४; व्य ५:१८; प्रस २०:१३; व्य ५:१७; प्रस २०:१५; व्य ५:१९; प्रस २०:१७; व्य ५:२१; लेवी १९:१८ 10चेवा पेहकेन्दीगी राहङ टोहङरोला चोक्पा मेहबेकें। ओ़ह सोङबे चेवा पेहकें माक्योदीॱराङ छ्य़े-ठिम छाङबु पेहक्यो यिहम्बा।
11टेहम्बा ज़्यो़, काहन्डुमु ती़हजी ओहङज्ये पेहक्यो येहबा। ओ़ह ख्याया़लाॱआङ क्यी़हराङ येह, ता़ह ख्या ङ्यि स़ेती लाहङदी तेहकेन्गी ठाबे ती़हजी लेप सिहन्दी येह, च्यिबेमाना ओहराङगी तोहङले यिह छ्य़ेक्यो म़ेदीॱआङ ताहन्दा ओहराङगी थार्पा तोहरोङ पोहला लेप्ती येह। 12नुहप टाहल सिहन्सीन, ओहले ङ्यिहमा पोहलाराङ लेप सिहन्दी येह। ओ़ह सोङबे ना़-जुबेकी ल़ेहया़ क्युर्ती ता़ह ओहराङ येहसेरकी छेन्ज्याया़ थो़ कोहएँ। 13ङ्यिहमाला ल़ेहमुराङ पेहती ओहराङ ल़ेह टाहङबु पेह कोहएँ। कुहङमु ल़ेहमु खाम्साङ-ङ्याहम्साङ पेहकें, ज़िगे से़हया़ थुङगे, छ्येउ-छ्येंमु पेहकें, छा़रा ल़ेहया़ पेहकें, जिङगे ओहले ठादो पेहकेन्गी ल़ेहया़ पाङ कोहएँ। 14यिहॱनाङ ङ्यिहमागी छेन्ज्याया़ ल़ेहमुराङ चो़वो येशू मास्यीकाकी छ्याप्स्यीया़ला पे त़ेदी ओ़ह ल़ेहमुराङ छ्याप्स्यी पेहतोङ। ओहले ज़ुबुकी तिहक्पाकी पेहताङकी सेम्बाया़ छाङबु पेहच्ये माहछोल।
Praegu valitud:
रोमी 13: HYLM
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
© 2023 (Active), Wycliffe Bible Translators, Inc. All rights reserved.