यूहन्ना 14
14
चेलनहे येशूक सान्त्वना
1येशू कलाँ, “तुहुरिन्के मन ना घब्राए। तुहुरे परमेश्वरके उप्पर विश्वास करथो, मोरिकमे फेन विश्वास करो। 2मोरिक बाबक घरेम रना ठाउँ बहुत्ते बा। यदि ओसिक नै रहत कलेसे, मै तुहुरिन्हे नै कतुँ, कि तुहुरिन्के लग ठाउँ तयार पारे जाइतुँ। 3तब् जाके मै तुहुरिन्के लग ठाउँ तयार पारके सेकके मै फेनदोस्रे अइम। और तुहुरिन्हे मोरिक संग रहक लग लैजिम, और मै जहाँ बतुँ, वहाँ तुहुरे फेन रबो। 4जहाँ मै जाइतुँ, तुहुरे उ ठाउँमे जैना डगर जन्थो।”
येशू किल एक्केथो डगर
5थोमा येशूहे कहल, “हे प्रभु, अप्नि कहाँ जाइती, हम्रे नै जन्थी, तब् हम्रे डगर कसिके जानब?” 6येशू उहिहे कलाँ, “डगर, सच्चाई और जीवन महिँए हुइतुँ। मोरिक ओहोँरसे बाहेक केऊ फेन बाबक थेन आई नै सेकी। 7तुँ महिन्हे चिन्हल रतो कलेसे, मोरिक बाबाहे फेन चिहिन्तो। आबसे तुँ उहिहे चिहिन्लेले बतो, और उहिहे देख फेन लेले बतो।” 8फिलिप येशूहे कहल, “हे प्रभु, हम्रिहिन्हे बाबई देखादी। यिहिएसे हम्रे संतोख होजिबी।” 9येशू उहिहे कलाँ, “हे फिलिप, अतरा नम्मा समयसे मै तुहुरिन्के संग बतुँ, तभुन फेन तुँ महिन्हे नै चिहिन्थो? जे महिन्हे देखल बा, उ बाबाहे फेन देखल बा। तुँ कसिके कहतो, ‘हम्रिहिन्हे बाबई देखादी?’ 10बाबा मोरिक संग एकतामे बा, और मै बाबक संग एकतामे बतुँ कना बातमे का तुँ विश्वास नै करथो? जोन बात मै तुहुरिन्के थेन बत्वैथुँ, उ मै मोरिक अपने इच्छासे नै बोल्थुँ, पर मोरिक संग एकतामे रहिके बाबा वहे काम करत, जोन ऊ चाहत। 11महिन्हे विश्वास करो, कि मै बाबक संग एकतामे बतुँ, और बाबा मोरिक संग एकतामे बा। नै ते यी मोरिक कर्लक चमत्कारके कारण मोरिकमे विश्वास करो।”
येशूक नाउँसे प्राथना
12येशू कलाँ, “जात्तिके, मै तुहुरिन्हे कहतुँ, जे महिन्हे विश्वास करत, उ मोरिक करल काम फेन करी, और उहिसे फेन भारी काम करी, काकरेकी मै बाबक थेन जाइतुँ। 13तुहुरे मोरिक नाउँमे ज्या मंग्लेसे फेन छावक माध्यमसे बाबक महिमा होए कहिके मै उ करदेहम। 14तुहुरे मोरिक नाउँमे कौनो चिज मंग्बो कलेसे मै उहिहे पूरा करदेहम।”
पवित्र आत्मक प्रतिज्ञा
15येशू कलाँ, “तुहुरे महिन्हे प्रेम करथो कलेसे मोरिक आज्ञनहे पालन करबो। 16और मै बाबाहे बिन्ती करम, और ऊ तुहुरिन्के लग एकथो औरे सहायक पठादी, और ऊ तुहुरिन्के संग सदामान पलिरही। 17यी उ आत्मा हो, जे परमेश्वरके बारेमे सच्चाइहे देखाइत, जिहिहे संसार स्वीकारे नै सेकत। काकरेकी संसार उहिहे ना ते देखत, ना चिन्हत। तुहुरे उहिहे चिहिन्थो, काकरेकी ऊ तुहुरिन्के संग रहत, और ऊ तुहुरिन्केमे सदामान पलिरही। 18मै तुहुरिन्हे टुअर नै छोरम। मै तुहुरिन्के थेन फिर्ता अइम। 19आब थोरिक समय पाछे संसार महिन्हे नै देखी, पर तुहुरे महिन्हे देख्बो। काकरेकी मै फेनदोस्रे जित्ती होजिम, तबेकमारे तुहुरे फेन जित्ती रबो। 20जब मै फेनदोस्रे जित्ती होके फिर्ता अइम, तब तुहुरे जन्बो कि मै मोरिक बाबक संग एकतामे बतुँ, और तुहुरे मोरिक संग और मै तुहुरिन्के संग एकतामे बतुँ। 21महिन्हे प्रेम करुइया वहे हो, जे मोरिक आज्ञाहे जानत और पालन करत। और महिन्हे प्रेम करुइयाहे मोरिक बाबा प्रेम करत। और उहिहे मोरिक बाबा फेन प्रेम करी, और मै फेन उहिहे प्रेम करम, और मै अपनहे ओकरमे देखा परैम।” 22यहूदा जे करियोत गाउँक नै हो, ऊ येशूहे कहल, “प्रभु, अप्नि का कहती, अप्नि अपनहे हमारमे देखैबी, और संसारके मनैनमे भर नै?” 23येशू उहिहे जवाफ देलाँ, “मै अपनहे असिन मनैनहे देखैथुँ, जे महिन्हे प्रेम करत। और जे मोरिक सिखाइल बातहे पालन करत, उहिहे मोरिक बाबा प्रेम करी। और हम्रे ओकर थेन अइबी, और ओकर संग रबी। 24जे महिन्हे प्रेम नै करत, ऊ मोरिक आज्ञा पालन नै करत। जोन वचन तुहुरे सुन्थो, उ मोरिक इच्छासे नै हो, पर महिन्हे पठुइया मोरिक बाबक इच्छासे हो। 25यी बात तुहुरिन्के संग रहलेमे मै तुहुरिन्हे कहल रहुँ। 26पर सहायक या पवित्र आत्मा, जिहिहे बाबा मोरिक अधिकार देके पठाई। ऊ तुहुरिन्हे सक्कु बात सिखाई, और उ तुहुरिन्हे मोरिक कलक सक्कु बात याद करवाई। 27मै तुहुरिन्के थेन शान्ति छोरके जाइतुँ। और यी ओसिन शान्ति नै हो, जोन संसार देहत। तुहुरिन्के मन ना घब्राए और ना डराए। 28तुहुरे महिन्हे असिक कहत सुनल बतो कि मै जाइतुँ, और तुहुरिन्के थेन फिर्ता अइम। यदि तुहुरे महिन्हे जात्तिक प्रेम करथो कलेसे मै बाबक थेन फिर्ता जाइतुँ कना बातमे तुहुरे खुशी हुई परना रहे। काकरेकी बाबा महिन्से महान बा। 29आब यी सक्कु बात हुइनासे पैलेहेँ मै तुहुरिन्हे कहिदेले बतुँ कि जब यी बात पूरा होजाई, तब तुहुरे मोरिकमे विश्वास करबो। 30तुहुरिन्से बात बत्वाइक लग आब मोरिक थेन धेउर समय नै हो, काकरेकी यी संसारके शासक शैतान आइता और मोरिकमे ओकर कौनो अधिकार नै हुइतिस। 31जसिके मोरिक बाबा महिन्हे आज्ञा देहत मै ओस्तेके करथुँ, ताकि संसारके मनै जानित कि मै बाबाहे प्रेम करथुँ। उठो, हम्रे यहाँसे जाई।”
Praegu valitud:
यूहन्ना 14: DVGNT
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.