मत्ती 6
6
दान
1साबधान रहा! तमे मणशा बे रिहाऊणे बे आपणे धार्मिकता रे काम नांई करा, नांई तअ आपणे स्वर्गीय बापू का किछे भी फल नांई पाऊणां 2एतकी तणी जेबा तूह दान करे, तेबा, बड़ा दिखाबा नाँई करे जेड़े कपटी, प्रार्थना घरा होर गली में तुरही बाजी करे करा, कि लोका त्यारी बड़ाई करे। हाऊं तमाबे सच बोला कि त्याहे आपणा ईनाम पाई छेकू 3पर जेबा तूह दान करे, तेबा जोह तेरअ धुरअ हाथ करा, तेत्ता तेरेअ बाय हाथ नांई जाणे। 4कि तेरा दान गुप्त रहे, होर तेबा तेरअ पिता जोह गुप्ता मेंजे हेरा, ताहबे प्रतिफल दींणअं
प्रार्थना
(लूका 11.2-4)
5जेबरे तूह प्रार्थना करे, तेबा कपटी साही ना हो, किबेकि लोका बे हेरने री तणी प्रार्थना घरा में होर सडका रे मोड़ा में खड़े होई करे प्रार्थना करना त्याहबे शोभला लागा। हाऊं तमाबे सच बोला कि त्याहे आपणा प्रतिफल पाई छेकू, 6पर जेबा तूह प्रार्थना करे, तेबा आपणी कोठरी बे नांह; होर दुआर बन्द करी करे आपणे बापू जोह गुप्त साहा प्रार्थना कर। तेबा तेरअ बापू जोह गुप्त कामा भी हेरा, ताहबे तेतकअ फल दीणअ। 7प्रार्थना करदे वक्ते अन्यजाति साही बक-बक नांई करा, किबेकि त्याह समझा कि बहू बोलणे का त्यारी शूणनी। 8एतकी तणी तमे त्या जेहे नांई बणे, किबेकि थारअ बापू समझा कि तमा कासु चीजा री जरूरत साहा। 9तमे एसा रीति संघे प्रार्थना करे करा: हे महारे बापू, तूह जोह सरगा में साहा; तेरा ना पवित्र मनु लोडी। 10तेरा राज्य इच्छे। तेरी इच्छा जेडी स्वर्गे पूरी हुंदा, तेडी धरती में भी पूरी हो। 11महारी धियाडी री रोटी आज हामा बे दे। 12होर जासू साबे हामें आपणे अपराधी बे क्षमा करे, तेहडे ही तूह महारे अपराधा भी क्षमा कर। 13हामा परीक्षा में नांई आणे, पर दुष्टा का बचा; किबेकि राज्य होर पराक्रम होर महिमा सदा तेरी ही साहा। आमीन।
14होर अगर तमे मणशा रे पाप क्षमा करले, तेबा थारे स्वर्गीय बापू भी थारे पाप क्षमा करने 15होर अगर तमे मणशा रे पाप क्षमा नाँई करले, तेबा थारे स्वर्गीय पिता भी थारे अपराध क्षमा नाँई करने।
ब्रत
16जेबा तमे ब्रत करले, तेबा कपटी रे बराबर थारे मुँहां में नरागजी ना छाई रहे, किबेकी त्याह आपणे मुँहा बणाई डाहंदा, कि लोका त्याह ब्रतु ज़ाणे। हाऊं तमाबे सच बोला कि त्याहे आपणा प्रतिफल पाई छेकू। 17पर जेबा तूह ब्रत करे तेबा तूह आपणे मुड़े तेल लेसे होर मुँह धोये, 18कि लोका नांई पर तेरअ बापू जोह गुप्ता में साहा, ताह ब्रतु ज़ाणे। एसा दशा में तेरअ बापू जोह गुप्ता में हेरा, ताहबे प्रतिफल दींणा।
स्वर्गीय धन
(लूका 12.33-34)
19आपुबे धरती में धन कठे नांई करा, ज़खे कीड़े होर काई बिगाड़ा, होर ज़खे चोर सेंध लाउंदा होर चोरा। 20पर आपुबे स्वर्गा रा धन कठे करा, ज़खे नाह कीड़े लागदे होर नाह तखे काई बिगाड़दे, होर ना चोर सेंध लाए होर ना चोरदा। 21किबेकी ज़खे तेरा धन साहा तखे तेरा मन भी लागी रहंणा।
शरीरा री ज्योति
(लूका 11.34-36)
22शरीरा रअ सजीअ आछ साहा: एतकी तणी अगर तेरी आछ निर्मल हो, तेबा तेरा सारा शारीर भी प्र्याशा हूँणा। 23पर तेरी आछ बुरी होली, तेबा तेरा सारा शरीर भी निहारा हूँणा; एतकी तणी प्र्याशा जोह ताह में साहा अगर निहारा होला सह निहारा केहड़ा बड़ा होला!
परमेश्वर होर धन
(लूका 16.13; 12.22-31)
24कोहे भी मणश एकी वक्ते दुई मालका री सेवा नांई करी सकदअ, किबेकि सह एकु संघे बुराई होर दूजे संघे प्रेम डाहंदा, या एकु संघे मिली करे रहंदा होर दूजे सगे प्रेम नाँई डाहनदा। तमें परमेश्वर होर धना दुही री सेवा नांई करी सकते। 25हाऊं तमाबे बोला, चिन्ता नांई करे-कि हामा कैह खाणा होर कैह झूटणा; होर ना आपणे शरीरा बै कि कैह बानणा। कैह प्राण रोटी का, होर शरीर झिकड़े का बढ़ीकरे नांई आसा? 26सरगा रे चेलू हेरा! त्याह नाह बउंदे, ना लउंदा, होर ना दारठों में कट्ठे करदे; तेबा भी स्वर्गीय बापू तयाबे खलाउंदा। कैह तमें त्याका ज्यादा बढ़ी करे नांई आंदे? 27तमा में एड़ कुण साहा की जोह सोची करे, आपणी जिदगी में एक भी पल बडाई सका?
28झिकड़े बे किबे चिन्ता करा? जगला रे खिला का सिखा कि त्याह केड़े बढ़ा; त्याह नाह मेहनत करदे, नाह त्याह झिकड़े बूणदे। 29तेबा भी हाउ तमावै बोला कि राजा सुलैमान भी आपणे सारे बैभब में त्याह मेंज़ा का कासी रे बराबर झिकड़े बानीदे नांई थी। 30पर जेबा, परमेश्वर मैदाना रे घाऊ, जोह आज हरा साहा होर काला भाड़ा में झोंकणा, एडे झिकड़े पनेहुंदा, तेबा हे अल्पविश्वासीयो, तमाबे याह का बढ़ी करे किबे नांई पनेउंलअ?
31एतकी तणी तमें चिन्ता करी करे नांई बोले कि हामा कैह खाणा, या कैह झूटणा, या कैह बाहंनणा। 32किबेकी अन्यजाति या सभी चीज़ा री खोजा में रहंदा, पर थारअ स्वर्गीय बापू जाणा कि तमा याह सभी चीज़ा री जरूरत साहा। 33एतकी तणी पहिले तमें परमेश्वरा रे राज्य बे पहिलअ स्थान देआ होर एक धार्मिकता री जिंदगी जिया तेबा तमा या सभे चीज़ा भी भेटणी। 34तमें कालकी चिन्ता नांई करा, किबेकि कालकी धियाड़ आपणी चिन्ता आपे करणी; आज़ा बे आज का दुःख ही बहू साहा।
Currently Selected:
मत्ती 6: ISJNT
Tõsta esile
Kopeeri
Compare
Share
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.