Marki 13
13
Jesu pua saawali ke bi baa bolini U Tienu diegu
(Mat 24.1-2; Luk 21.5-6)
1Jesu n den ña U Tienu diegu nni yaa yogunu, o ŋoadikaaba siiga yendo den yedi o: «Canbaa, diidi ban taa yaa tanŋama ki maa yaa diecianŋama!» 2Jesu den yedi o: «A laa a naa dieciama? Bi kan ti ŋaa ba tanyenli n sieni, ki yaa maa li lieli po. Akuli baa padi ki baa.»
Yaa fala n baa ti cua mi juodima yogunu
(Mat 24.3-14; Luk 21.7-19)
3Jesu den kali Olivie Tiidi juali po ki tiegi U Tienu diegu. Pieli, Jaki, Jan leni Andre bebe n den ye leni o. Bi den buali o yaa buali n tie ne: 4«Waani ti laa bonla n baa ti cua yaa yogunu leni yaa sinankeene n baa ti waani ti, ke laa bonla kuli juodima yogunu pundi.»
5Lani, Jesu den yedi ba: «Fangi mani yi yula ke niloba n da boandi yi! 6Bi niba boncianla baa ti cua n yeli nni ki yedi: ‹Mini n tie U Tienu n Gandi Yua,› ki boandi bi niba boncianla. 7Yi yaa ti gbadi ke bi maadi bu toabu maama, ki go maadi bu toabu laabaalo maama, yin da yagi mani yi yama. Laa bonla baa cua tiladi, ama li da kan tua mi juodima. 8U nibuolu baa fii ki tuogi leni nibuoto, mi diema mo baa fii ki tuogi leni dietoama. Mi tindigibima baa yaa tiendi i kaantiami, mi koncianma mo baa yaa tiendi. Laa bonla kuli da tie nani u maditugukoanu cilima yene.
9Faami mani yi yula po! Bi baa cuo ki gedini yi bi bujiaba kani, ki pua yi i gbiami li bali maama bangima diena nni. Yi baa sedi guveneerinba leni bi badicianba nintuali, kelima n yaa po, ki tua bi po siedi. #Mat 10.17-20; Luk 12.11-12. 10Ama hali ke mi juodima daa cua, li tie tiladi o Laabaaliŋamo n kpa pundi i nibuoli kuli nni. 11Bi yaa ti cuo ki gedini yi li bujiali kani yaa yogunu, yin da tuodi ki yagi yi yama yin baa yedi yaala po. Yin maadi yaama n baa kua yi pala nni lanyogunu, kelima laa tie yinba ka baa maadi, ama U Tienu Fuoma Yua n baa maadi. 12Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po, ki cuo ba ki teni ban kpa ba. 13Bi niba kuli baa nandi yi kelima n yeli po, ama yua n baa juuni hali mi juodima baa faabi. #Mat 10.22.
Ti caginbiaditi
(Mat 24.15-28; Luk 21.20-24)
14Yi yaa ti laa ke yaa cagindi n wudi bi niba gbani ye tin ki bi pundi ki yaa ye naani, yua n cogi mi naa maama n kpaagi bonŋanla. Lanyogunu, yaaba n baa yaa ye Jude nni n sani ki gedi a juana po. #Dan 9.27; 11.31; 12.11. 15Yua n kaa o doangu yuli po n da jiidi ki kua deeni ki baa taa liba. #Luk 17.31. 16Yua n ye u kuanu po mo n da lebidi ki guani o denpo ki baa n taa o tiayiekaadi. 17Fala baa yaa ye leni yaa puoba n punbi leni yaaba n da ŋaandi laa dana nni. 18Mia mani U Tienu ke laa nuama n da tua ku fawaagu yogunu. 19Laa dana nni, fala baa ye hali maama ke li buolu daa tieni, ki cili U Tienu n den tagi ŋanduna yaa yogunu, ki pundi hali moala. O buolu kan go tieni mo. #Dan 12.1; JTT 7.14. 20O Diedo yàá bi wadi laa dana, nisaaloba kuli kan bi ciadi, ama wan gandi yaaba yaa po, o wadi laa dana. 21Lanyogunu, nilo yaa yedi yi: ‹Diidi, U Tienu n Gandi Yua n ye ne,› yaa ka: ‹O ye napo,› yin da daani o maama. 22Yaa tuonanda n yedi ke bi tie U Tienu n gandi yaaba leni bi saawalipua-faadanba baa fii ki yaa tiendi sinankeeninba leni li bonlidinkaala, hali ke bi yaa bi baa fidi, bi bi baa boandi U Tienu n gandi yaaba. 23Yin fangi mani yi yula, n tuodi ki waani yi likuli.
O Joa Bijua cuama
(Mat 24.29-31; Luk 21.25-28)
24Laa dana nni, fala yeni yaa pendi, u yienu baa biigi, o ŋmaalo mo kan go yendi. #Esa 13.10; Esk 32.7; Jl 2.10; 3.4; 4.15; JTT 6.12. 25A ŋmabila baa yaa ña tanpoli ki baali, tanpoli paaciami mo baa digibi. #Esa 34.4; Jl 2.10; JTT 6.13. 26Lani, bi baa le ke o Joa Bijua ye ti tawadi nni, ki kpendi leni u paalu leni ti kpiagiciandi. #Dan 7.13; JTT 1.7. 27Lani, o baa soani o malekinba ŋanduna nni kuli, ban taani wan gandi yaaba, ki cili ŋanduna bianu poyendu, ki yaa caa hali u naa bianu.
Bu kankanbu kpanjama
(Mat 24.32-35; Luk 21.29-33)
28Yin bandi bu kankanbu kpanjama n bangi yaala. Bu beni yaa bundi, yi bani ke ku siagu nagidi. 29Li go tie yene, yi yaa ti laa ke laa bonla tiendi, yin bandi ke o Joa Bijua nagini ki ye bu buliñoabu kani. 30N waani yi i moamoani, ke mi naa nifiima kuli kan pendi ke laa bonla kuli ki tieni. 31Tanpoli leni ki tinga kuli baa pendi, ama n maama kan pendi abada.
U Tienu bebe n bani o Joa Bijua cuama yogunu
(Mat 24.36-44)
32Yaala n tie o Joa Bijua cuama daali po, oba kuli ki bani laa bonla yogunu, ba tanpoli malekinba ki bani, ba Bijua, se Baa bebe. #Mat 24.36. 33Yaa fangi mani yi yula ki yaa guu, [ki go jaandi ki miadi U Tienu] kelima yii bani li yogunu. 34Li baa yaa tie nani o joa n baa yaa caa u dogu, ki ŋaa o diegu, ki guuni o naacenba o piama, ki puogi yuakuli o tuonli, ki go puogi o buliñoaguudo wan yaa guu bonŋanla yeni. #Luk 12.36-38. 35Lani yaa po, yimo n yaa guu mani, kelima yii bani o diedaano n baa kpeni yaa yogunu, ku yenjuagu, bi ku yoagisiigu, bi i kootonmoe, bi ku tiŋaagu. 36Yeni yaa po, yimo n yaa guu mani ke wan da ti kpeni ki ludi yi, ki sua ke yi goa. 37Min yedi yi yaa maama yeni, n go yedi ma bi niba kuli: Yaa guu mani!»
Currently Selected:
Marki 13: BGP
Tõsta esile
Kopeeri
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.