होशे 13
13
इस्राएल पै कठोर न्याय
1जिब एप्रैम बोल्लै था, फेर माणस काँम्बै थे; अर वो इस्राएल म्ह बड़ा था; पर जिब वो बाल कै कारण दोषी होग्या, फेर वो मर ग्या। 2अर इब वे माणस पाप पै पाप बढ़ान्दे जावैं सै, अर अपणी बुद्धि तै चाँदी ढाळकै इसी मूर्ति बणावै सै जिसी कारीगरां ए तै बणै। उन्हे कै बारै म्ह माणस कहवैं सै, जो नरमेध करैं, वे बाछड़यां नै चुम्मै! 3इस कारण वे भोर के बाद्दळ, सुबेरै सूख जाण आळी ओस, खलिहाण पै तै आँधी के मारे उडण आळी भूसी, या चिमनी तै लिकड़दे होए धुएँ की तरियां होवैंगे।
4मिस्र देश तै ए मै यहोवा, तेरा परमेसवर सूं; तू मेरे ताहीं छोड़ किसे नै परमेसवर करकै न्ही जाणणा; क्यूँके मेरे सिवा कोए तेरा उद्धारकर्ता न्ही सै। 5मन्नै उस बखत तेरे पै मन लगाया जिब तू जंगळ म्ह बलके भोत सूखे देश म्ह था। 6पर जिब इस्राएली चराए जावैं थे अर वे खाकै छिकगे, फेर छिक जाण पै उनका मन घमण्ड तै भरग्या; इस करकै वे मेरे ताहीं भूलगे। 7इस कारण मै उनके खात्तर शेर के जिसा बण्या सूं; मै चीत्ते की तरियां उनके राह म्ह घात लगाये रहूँगा। 8मै बच्चे छीनी होई रीछणी की तरियां बणकै उननै मिलूँगा, अर उनके दिल की झिल्ली नै पाड़ूँगा, अर शेर की तरियां उननै ओड़ैए खा ल्यूँगा, जिस तरियां जंगळ के पशु उन ताहीं पाड़ लेवैंगे।
9हे इस्राएल, तेरे विनाश का कारण यो सै, के तू मेरा यानिके तेरे साथ देण आळे का बिरोधी सै। 10इब तेरा राजा कित्त रहया के तेरे सारे नगरां म्ह वो तेरे ताहीं बचावै? अर तेरे न्यायी कित्त रहे, जिनकै बारै म्ह तन्नै कह्या था, “मेरे खात्तर राजा अर हाकिम ठहरा दे?” 11मन्नै छो म्ह आकै तेरै खात्तर राजा बणाये, अर फेर जळजळाहट म्ह आकै उन ताहीं हटा भी दिया। 12एप्रैम का अधर्म कठ्ठा करया होया सै, उनका पाप बटोरया होया सै। 13उसनै जच्चा के जिसे दर्द उठैगें, पर वो नासमझ बच्चा सै जो जन्म लेण म्ह देर कर रहया सै।
14मै उसनै अधोलोक के बस म्ह तै छुड़ा ल्यूँगा#13:14 मै उसनै अधोलोक के बस म्ह तै छुड़ा ल्यूँगा यानिके कब्र के बन्धन या नरक की सत्ता से। परमेसवर अपणे भविष्यवक्ता के द्वारा सजा की चेतावनियाँ म्ह भी दया का मिश्रण दिखावै सै। अर मौत तै उसनै छुटकारा देऊँगा। हे मौत, तेरी मारण की शक्ति कित्त रही? हे अधोलोक, तेरी नाश करण की शक्ति कित्त रही? मै फेर कदे न्ही पछताऊँगा।
15चाहे वो अपणे भाईयाँ तै घणा फूल्लै-फळै, तोभी पुरवाई उसपै चाल्लैगी, अर यहोवा की और तै मरुस्थल तै आवैगी, अर उसका कुण्ड सुखैगा; अर उसका चोवा निर्जल हो जावैगा। उसकी धरी होई सारी मनभावणी चीज वो लूट ले जावैगा। 16सामरिया दोषी ठहरैगा, क्यूँके उसनै अपणे परमेसवर तै धोक्खा करया सै; वे तलवार तै मारे जावैंगे, उनके बच्चे पटके जावैंगे, अर उनकी गर्भवती जनानियाँ चीर देई जावैंगी।
Praegu valitud:
होशे 13: BGC
Tõsta esile
Kopeeri
Võrdle
Jaga
Kas soovid, et sinu esiletõstmised oleksid salvestatud kõigis sinu seadmetes? Registreeru või logi sisse
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.