Chivkeeb 27
27
Ixaj Foom Koobhmoov Rau Yakhauj
1Thaum Ixaj laus thiab qhovmuag tsis pomkev lawm, nws tau tso neeg mus hu nws tus tub hlob Exaus los thiab nws hais tias, “Tub 'e!”
Exaus teb tias, “Txiv, kuv nyob ntawm no.”
2Ixaj hais tias, “Koj pom tias kuv twb laus lawm thiab kuv yuav tuag hnub twg los tsis paub li. 3Nqa koj rab hneevnti thiab cov xub, mus yos tom havzoov thiab tua ib co nqaij nruabnrag los rau kuv noj. 4Ciali ua ib pluag zaub-mov qab-qab uas kuv nyiam thiab nqa los rau kuv noj. Tomqab uas kuv noj tag lawm, kuv yuav foom koobhmoov rau koj zaum kawg uantej kuv tuag.”
5Thaum Ixaj tabtom hais rau Exaus ntawd, Lenpekas txawm ua twjywm mloog. Yogli ntawd, thaum Exaus tawm mus yos tua nqaij lawm, 6Lenpekas txawm hais rau Yakhauj tias, “Kuv nyuamqhuav hnov koj txiv hais rau Exaus tias, 7‘Koj ciali mus yos tua ib co nqaij thiab ua ib pluag mov qab-qab los rau kuv noj. Tomqab uas noj tag lawm, kuv yuav foom koobhmoov rau koj tabmeeg tus TSWV uantej kuv tuag.’ ” 8Lenpekas hais tias, “Zaumno nawb, metub, koj mloog kuv hais thiab ua li kuv qhia. 9Koj mus rau nram cov tsiaj thiab ntes ob tus menyuam tshis uas puv-puv los rau kuv, es kuv yuav muab tua ua ib pluag qab-qab uas koj txiv nyiam heev rau koj txiv noj. 10Koj nqa mus rau koj txiv noj, thiab nws yuav foom koobhmoov rau koj uantej nws tuag.”
11Yakhauj txawm hais rau nws niam tias, “Koj paub tias kuv tus tijlaug Exaus yog neeg tuaj plaub, tiamsis kuv tej tawv nqaij du lug xwb. 12Nyobtsam kuv txiv cev tes plhws kuv, es nws paub tias yog kuv dag nws xwb; yog ua li no, ntshe kuv yuav tau nws lolus foom phem, thiab yuav tsis tau koobhmoov.”
13Nws niam teb tias, “Kuv tub, txhua yam uas koj txiv foom phem cia poob rau kuv ris huv tibsi; ciali ua rawsli qhov kuv hais rau koj xwb, mus ntes ob tug menyuam tshis los rau kuv.” 14Yogli ntawd, Yakhauj thiaj mus ntes tau ob tug menyuam tshis cab los rau nws niam, ces leejniam thiaj muab tua ua ib pluag nqaij qab heev uas nws txiv nyiam noj. 15Ces Lenpekas txawm mus muab Exaus uas yog nws tus tub hlob, cev tsoostsho zoo tshajplaws uas nws khaws cia rau hauv tsev, los rau Yakhauj hnav. 16Nws muab ob daim tawv tshis los qhwv Yakhauj ob txhais cajnpab thiab Yakhauj lub cajdab qhov uas tsis tuaj plaub. 17Ces nws txawm muab cov nqaij uas qab-qab ntawd thiab cov ncuav ci uas nws ua tau lawm, rau nws tus tub Yakhauj.
18Yakhauj thiaj nqa mus rau nws txiv thiab hais tias, “Txiv!”
Ixaj teb tias, “Kuv nyob nov os, koj yog leejtwg, Exaus los Yakhauj?”
19Yakhauj teb tias, “Kuv yog koj tus tub hlob Exaus os; kuv twb ua tiav tag rawsli koj tau hais rau kuv lawm. Koj ciali sawv los thiab noj tej nqaij uas kuv nqa los, thiab foom koobhmoov rau kuv.”
20Ixaj nug hais tias, “Metub, uacas koj yuav nrhiav tau nqaij sai ualuaj li?”
Yakhauj teb tias, “Tus TSWV uas yog koj tus Vajtswv ua tus pab kuv nrhiav xwb.”
21Ixaj hais rau Yakhauj tias, “Koj ciali txav los kom ze, kom kuv cev tes plhws tau koj seb koj puas yog Exaus tiag los tsis yog?” 22Yakhauj thiaj txav zog mus rau ntawm nws txiv; Ixaj thiaj cev tes tuaj plhws Yakhauj thiab hais tias, “Koj lub suab haislus mas zooli Yakhauj lub, tiamsis koj ob txhais npab ho zooli Exaus ob txhais.” 23Nws tsis paub Yakhauj lawm rauqhov Yakhauj ob txhais npab tuaj plaub npws loo zooli Exaus ob txhais thiab. Nws twb yuav pib foom koobhmoov rau Yakhauj, 24tiamsis nws tseem rov nug ntxiv hais tias, “Koj yog kuv tus tub Exaus tiag-tiag lov?”
Yakhauj teb tias, “Kuv yog tiag-tiag hos.”
25Ixaj hais tias, “Tsaws cov nqaij los rau kuv noj. Thaum kuv noj tag lawm, kuv mamli foom koobhmoov rau koj.” Yakhauj thiaj tsaws los rau nws txiv noj thiab tseem nqa cawv los rau nws txiv haus huv tibsi. 26Ces Ixaj hais rau Yakhauj tias, “Tub 'e, koj txav los kom ze zog thiab nwj kuv.” 27Thaum Yakhauj txav zog los nwj Ixaj, Ixaj hnia Yakhauj lub tsho tsw Exaus tus ntxhiab lawm tiag, nws thiaj foom koobhmoov rau Yakhauj. Nws hais tias, “Kuv tus tub no tus ntxhiab tsw ib yam li thaj teb uas tus TSWV twb foom koobhmoov rau lawm.#Henpl 11:20 28Thov Vajtswv tso lwgdej saum ntuj los rau koj tej teb kom zoo qoobloo! Thov Nws pub rau koj tej nplej thiab tej txivhmab kom ntsu! 29Thov kom ntau haivneeg los ua koj li tubtxib, thiab thov kom tej pejxeem qhau cev qhau hau los hawm koj. Thov kom koj tau ua tus kav tagnrho koj tsoom kwvtij, thiab thov kom koj niam cov xeebntxwv qhau cev qhau hau los hawm koj. Thov kom cov uas foom phem rau koj raug foom phem, thiab thov kom cov uas foom koobhmoov rau koj tau txais koobhmoov ib yam nkaus.”#Chiv 12:3
Exaus Thov Ixaj Foom Koobhmoov Rau Nws
30Ixaj foom koobhmoov tagnrho xwb, Yakhauj tawm plaws lawm, ces nws tus tijlaug Exaus uas mus yos tua nqaij txawm los txog ntua. 31Nws kuj muab cov nqaij ntawd ua tau qab-qab thiab nqa mus rau nws txiv. Nws hais tias, “Kuv txiv, sawv los thiab noj tej nqaij uas kuv mus tua tau thiab ua nqa los rau koj, es koj yuav foom koobhmoov rau kuv.”
32Ixaj nug hais tias, “Koj yog leejtwg?”
Exaus teb tias, “Kuv yog koj tus tub hlob, Exaus.”
33Ixaj poobsiab nthav thiab ua ibce tsheehnyo, nws thiaj nug hais tias, “Tus puasta uas tua tau nqaij thiab ua los rau kuv noj tag lawm, ho yog leejtwg? Kuv nyuamqhuav noj tagnrho uantej koj los no xwb. Kuv twb foom tagnrho tej koobhmoov rau nws lawm, ces tej koobhmoov ntawd yuav yog nws tug mus ibtxhis li lawm.”
34Thaum Exaus hnov li ntawd, nws mobsiab heev, nws tsa suab hlo quaj thiab hais tias, “Txiv, thov koj foom koobhmoov rau kuv ib yam nkaus thiab los mas!”
35Ixaj teb tias, “Koj tus kwv los dag kuv, thiab nws tau txais koj tej koobhmoov tag lawm.”
36Exaus hais tias, “Zaumno yog zaum thib ob uas nws txhav kuv tug. Nws lub npe yeej phim hu ua Yakhauj lawm tiag.#27:36: Yakhauj: Lub npe no hais muaj ntsis thooj li lolus Henplais uas hais tias “txhav luag tug.” Nws twb txeeb kuv lub meejmom tub hlob lawm, zaumno nws tseem txeeb kuv tej koobhmoov lawm thiab. Koj txawm tsis tshuav ib qho koobhmoov seem rau kuv li lawm lov?” #Chiv 25:29-34
37Ixaj teb tias, “Kuv twb tsa nws los ua nom ua tswv kav koj, thiab kuv twb foom kom tagnrho nws cov kwvtij los ua nws tubtxib huv tibsi lawm. Kuv tau foom koobhmoov kom nws tej nplej thiab txivhmab kom ntsu. Metub, tamsim no ces kuv tsis tshuav ib yam dabtsi uas yuav ua tau rau koj ntxiv li lawm!”
38Exaus rov taij nws txiv hais tias, “Txiv, koj tsuas muaj tibqho koobhmoov nkaus xwb lov? Thov foom koobhmoov rau kuv thiab los mas txiv!” Ces nws txawm tsa suab hlo quaj. #Henpl 12:17
39Ces Ixaj hais rau Exaus tias,
“Yuav tsis muaj lwgdej saum ntuj los rau koj,
Koj tej teb yuav tsis zoo qoob.
40Koj yuav ua neej los ntawm koj rab ntaj,
Thiab koj yuav ua koj tus kwv qhev.
Yog thaum twg koj nti tiag-tiag,#27:40: nti tiag-tiag; lossis ntxeevsiab.
Koj thiajli dim ntawm nws kev tswjhwm.” #Henpl 11:20 #Chiv 36:8; 2Vaj 8:20
41Exaus txawm ntxub Yakhauj heev, vim tej koobhmoov uas nws txiv tau foom rau Yakhauj lawm. Nws xav tias, “Lub sijhawm quajntsuag rau kuv txiv hnub tuag twb los ze lawm, dhau ntawd kuv yuav muab Yakhauj tua povtseg.”
42Tiamsis thaum Lenpekas hnov txog Exaus tej tswvyim ntawd, nws thiaj hais kom Yakhauj los ntsib nws thiab hais tias, “Koj mloog nawb, koj tus tijlaug Exaus tuav tswvyim yuav tua koj povtseg pauj kev chim. 43Metub, zaumno koj ua li kuv hais nawb. Koj ciali khiav mus rau tim kuv tus nus Lanpas uas nyob rau lub nroog Halas, 44thiab nrog nws nyob ib ntus, kom koj tus tijlaug xam chim 45thiab tsis nco txog tej uas koj ua rau nws lawm tso. Thaum ntawd kuv mam nrhiav neeg tuaj tos koj rovqab los. Kuv txawm yuav plam kuv ob tug tub uake rau tibhnub li ntag lov?”
Ixaj Tso Yakhauj Mus Nrog Lanpas Nyob
46Lenpekas hais rau Ixaj tias, “Kuv dhuav Exaus ob tug pojniam uas yog cov neeg Hitis ntawd heev lawm. Yog Yakhauj tseem mus yuav cov neeg Hitis no ib tug ntxhais los ua pojniam thiab, ntshe kuv yeem tuag mus zoo dua.”
Currently Selected:
Chivkeeb 27: MWW2022
Tõsta esile
Share
Kopeeri
Want to have your highlights saved across all your devices? Sign up or sign in
© 2022 United Bible Societies. All rights reserved.