Populaarsed piiblisalmid Mateo 6

Jaga

Mmomu anumi egyie-mii na Katɔ Ɔga ala lɛlɔ na kalɛ na bɛbla lɛlɔ siin utulo. Na Katɔti wabla ala abambadi ƒui lɛnɔ wete-mii.

Anwuɔsu biteti kasusu pii na kadi kani nétegye tɔ lɛlɔ. Limeyi lɛmmɔ alatidi lɛdanku nina etila. Útalɛka biti etila bamba bibunku limeyi lɛmmɔ adi lɛlɔ.

Anwuɔsu mɔɔsu-mii nnii biteti kasusu pii na bɔdi ku bɔni iye bina adala lɛlɔ. Ɔsika ngba bɔƒɔ kuye butulo adila. Na ɔlɔna lɛnɔ ɔ́ƒɔ kuye utulo adala.

Na si aakpali katɔ ni, duo ƒula katɔma na akalɛ ɔtɔ, na akpali ƒ'ɔti ɔni na balanu. Na anwu ɔni mɔɔnu-ɔ uwi ɔni na bekyuli bamba balánu-ɔ ni, ɔdubɔƒɔ-ɔ kayu.

Anwuɔsu lɛni na ɔlɛka bɛkpali katɔ bɛsu bɛnii, “ ‘Bula Ɔti ɔni nkya katɔ, balɔ-ɔ lɛnyi buni. Ƒula lɛga kadikɔ kebo-bu akɔ. Babla ƒula lɛƒɔyɔ na kalɔ lɛlɔ aani kalɛ na use na katɔ.

Te-bu bula ɔmwi limeyi adila.

Na eti bula ekpidi akyiɛ-bu aani kalɛ na buuti taakyiɛ bani mɔɔƒiɔ́-bu.

Taya na buduo bukpoku taanu kemmo, na edie-bu alɛku alaekpidi akɔ. Ɔsika lɛga bɔdi ku ɔyikun ku bukeye bɔdi awɔ ɔdi uwi ƒui. Ɔsia lɛni.’

“Na si bíti bina bekyulikpana bɔƒiɔ bɛkyiɛ-ma ni, bina Katɔti lɛnɔ ɔdubuti bina ɔdi ɔkyiɛ amii lɛnɔ.

Bɛnu baasɛ ka balátuma na baláklibi edula teese teete lɛlɔ na linwu kemmo, nsu bina Katɔti ɔɔnu-ma lɛlɔ. Na ɔdubɔnu amii lɛlɔ utulo-ma, ɔsika bɛ́ƒɔ kuye bítulo-ma.

“Bitatɛ akɛla bitese bitete lɛlɔ na kayawi kamɛni kemmo. Kayawi mɛni ni, kubweyi kɔdububile-nya na etili, na beyune lɛnɔ beduo beyu-nya. Mmomu ni, bɛbla ala abuni ani menwini lɛyuƒɔla mete-mii na katɔ. Mmɔ ni, kubweyi kulebile-nya na eletili, na beyune lɛnɔ beleduo beletéyu-nya. Ɔsika kesii kani na ƒula akɛla ese ni, mmɔ na aasia lɛnu.

“Ukyuli biala ulákana na wabla benwoti inyɔ kabla. Ɔdubukisi unwi na ɔyɔ ɔkladi litemi. Na ɔdubɔdi unwi etemila lɛlɔ, na ɔta unye ɔkladi etemila lɛlɔ. Alakana Katɔti ku lɛlakɛ kabla bɔsala.

Katɔti muute eveteli amɛni bɔdia lɛni. Na eveteli amɛni ni, bɔkana bɔnu-nya ɔmwi. Na kɔnaadi asɔ eeebo, ɔsika bákyula-nya na ogya kemmo. Katɔti ɔdubɔsia-mii anu na ute-mii adala utulo eveteli amɛni. Bina bɔƒɔtaadi bɔsɔ.

Anwuɔsu si eebunku ukyuli ɔdi ni, bunku-nwu kalɛ na ƒula ɔkpana ɔbuni ƒui muedi uláti lɛla lɛni na ábla. Na ƒula Katɔti ɔni mɔɔnu ala abuni ani na bekyuli bátanu uwi ɔni na aabla-nya ni, ɔdubɔƒɔ-ɔ kayu.

“Bɛnu kaduɛ kalɛ na bilabla lɛbuni bɛnii bekyuli banu-mii. Ɔsika si bɛ́bla lɛni ni, Katɔti ulaƒɔ-mii kayu kadi na Katɔ Ɔga Ɔma.

“Na si biilie kɔka ni, bitabla anumi nyanyaanya aani anumi lɛlɔ bekyuli kalɛ. Baanyina anumi kalɛ na ukyuli biala ɔnu-ma ɔti ka beelie kɔka sɔsɔ. Mɔɔsu-mii nwaa nnii báaƒɔ bana lɛyuƒɔla ƒui báwɔlɔ. Si biilie kɔka ni, bɛƒɔ anumi na bigyeli lili. Ɔmɛni ɔdubɔya na bekyuli baláti banii biilie kɔka. Mmomu ƒ'ɔti ɔni nkya kesii biala ndubɔti. Na anwu ɔni mɔɔnu ala ani na bekyuli balánu ni, anwu kani ndubɔƒɔ-mii kayu.