A-pûn Awang 3

Yubàk Marâ É A-pûn Awang

1Haû lhângmuì mó gi, Yhûmsîng Garai Gasang hpan tô é yòsô gaunyhaú pé gû má hpàqchyî ge haq htung dik é gaunyhaú nghut ri. Lhângmuì mó haû gi, myiwe haú yùq lé, “Haû Garai Gasang mai, ‘Núngnhik gi, hkyâm shî mâ é sikgâm hkangmó é ashi lé ge zo râ a nghut.’ ga, gè gè yhang taî ri lhú?” ga taî ri.

2Myiwe haû gi, lhângmuì mó haú lé, “Hkyâm hkaû mâ é, shigâm pé mâ é shi lé, ngá-nhik ge zo râ nghut lhê; 3nghut kôle, Garai Gasang gi, ‘Hkyâm gùng sikgâm mâ é ashi lé gi, a ge zo, a ge záng; zo jáng záng jáng gi, núngnhik shî râ nghut lhê.’ ga taî tô ri.” ga tû taî ri.

4Nghut kôlhang, lhângmuì mó haû gi, myiwe haú lé, “Núngnhik, gè gè shî râ a nghut; 5hkâsu mù gâ le, núngnhik haû mâ é ashi lé zô é buìnyì má, núngnhik é myòq bóng mù, ge é eq a ge é lé wú sê gam hkoq luî, Garai Gasang su dùt byùq râ lé, Garai Gasang sê é yánmai nghut lhê.” ga taî ri.

6Myiwe haû gi, shigâm haû, zoshuq é matú ge é hkyô lé le, myòqjí èq wú yúng é hkyô lé le, hpàqchyî yù râ matú myìt ô naù râ su dùt é lé le, myang é hkûn, shigâm haû mâ é shi hpyoq zô ri; yhang eq rahá nghut nyi é yhâng yhûmsîng hpó lé le, yhang byi luî, yhâng yhûmsîng hpó le zo bê nghut ri. 7Haú hkûn, yhángnhik gi, myòq bóng byùq luî, yhángnhik gùngchîn nghut nyi é lé sê byùq bekô nghut ri. Haû mù, yhángnhik gi, hkohúm haq lé hkyup yû luî, hpyî-tsang hpajóng kut tsang bekô nghut ri.

8Hau htâng, yhángnhik gi, myínhtâng châm ngón é u má, haû Yhûmsîng Garai Gasang, hkyâm hkaû má sô nyi é htê lé wó gyo kôjáng, haû Yhûmsîng Garai Gasang lé haq é dông, hkyâm mâ é sikpúng má nyi tô akô nghut ri. 9Nghut kôlhang, haû Yhûmsîng Garai Gasang gi, yùqgè haú lé, “Nàng, hká má nyi lhê lhú?” ga wùt ri.

10Yùqgè haû gi, “Nàng, hkyâm hkaû má nyi é hkyô lé ngò wó gyo luî, ngò gi, gùngchîn nghut é yánmai, gyùq mù, haq nyi tô lhê.” ga tû taî kat ri.

11Haú hkûn, Yhang gi, “Nàng gùngchîn nghut é hkyô lé, ó taî kyô é lhú? Ngò, nang lé hkâhpyoq zo nghû hkunmó hkyô tô é shigâm mâ é hpyoq zo bê a nghut lhú?” ga taî ri.

12Yùqgè haû gi, “Nàng, ngo lé nyhi to byî é myiwe haû, shigâm mâ é shi hpyoq yû mù, ngo lé byî é nghut luî, ngò zô é nghut lhê.” ga tû taî ri.

13Haú hkûn, haû Yhûmsîng Garai Gasang gi, myiwe haú lé, “Nàng, haû gi, haî kut é nghut lhê lhú?” ga myî ri.

Myiwe haû gi, “Lhângmuì mó, ngo lé mhaú luî, ngò zô é nghut lhê.” ga tû taî ri.

14Haû mù, haû Yhûmsîng Garai Gasang gi, lhângmuì mó haú lé, “Nàng, shí hkyô kut bê nghut é yánmai,

shigu gaunyhaú bànshoq eq

tân jung gaunyhaú bànshoq má,

nàng gi, nhîng pyâm é huî ri!

Nàng gi, náng é i-pyàt buìnyì bànshoq má, wamdaû èq ye mù,

myi-tse zo râ nghut lhê.

15Ngò gi, nàng eq myiwe hau é gyoro má le,

náng é awùt ashín eq yhâng é awùt ashîn é gyoro má le,

gyè dut nhâng râ nghut lhê;

yhâng é awùt ashín haû gi,

náng é ulhum bàt hkyop râ nghut mù,

nàng gi, yhâng é hkyîhtáng la-nhik má

hte byi râ nghut lhê.” ga taî ri.

16Yhang gi, myiwe haú lé,

“Ngò gi, nang lé, zohkû nò je yhang nò nhâng râ nghut lhê;

nàng gi, zoshâng wuì lé, nò hpu luî hkû râ nghut lhê;

nàng gi, náng é yhûmsîng hpô chyáng myìt tuî nyì râ nghut mù,

yhang gi, nang lé ùp râ nghut lhê.” ga taî ri.

17Yhang gi, Adam lé, “Nàng gi, náng é yhûmsîng myhî é dang gyo mù, ‘Shigâm haû mâ é ashi lé, nàng ge zo râ a nghut.’ nghû, Ngò hkunmó hkyô tô é shigâm mâ é zo bê nghut mù,

myigùng gi, náng é yánmai nhîng pyâm é hui bê nghut ri;

nàng gi, náng é i-pyàt buìnyì bànshoq pé má,

ahkyik anòq mú zui luî shèq,

myigùng haû mâ é myàng zo râ nghut lhê.

18Myigùng gi, náng é matú, zu eq myòq yùq htoq byi râ nghut lhê;

nàng gi, myigùng mai htoq é kyôshi myuishi eq

mhan-haq hpoqnòq pé lé zo râ nghut lhê.

19Nàng gi, myigùng mai yu htoq é sû nghut mù,

myigùng má nàng dum taû ló é hkûn jé shoq,

myòqdong má buìbù buìnoq htoq mù shèq,

náng é zoshuq myàng zo râ nghut lhê;

nàng gi, myi-tse nghut é yánmai,

myi-tse má dum tau râ nghut lhê.” ga taî ri.

20Adam gi, yhâng é yhûmsîng myhí lé, Ewaq ga myìng myhíng byî ri; haî mù gâ le, yhang gi, duì mîdui é yhâng nu nghut ri.

21Haû Yhûmsîng Garai Gasang gi, Adam eq yhâng é yhûmsîng myhî é matú, sho-kuq buhîng saí mù, yhángnhik lé hut byî ri. 22Haû Yhûmsîng Garai Gasang gi, “Haû byù gi, ge é eq a ge é sê gam hkoq mù, ngá-nhúng mâ é rayùq dông dùt byùq bê nghut ri. Yhâng é lòq lhâm kat mù, chyungxe sikgâm mâ é shi lé hpyoq zo luî, ahtum abyùq dui nyì râ dông gi, a ge kut nhâng lo.” ga taî ri. 23Haû mù luî, haû Yhûmsîng Garai Gasang gi, yhang lé saî htoq yu é myigùng má, mú zui zo sháng gàq ga, Edin hkyâm mai yhang lé lhoqhtoq pyám bê nghut ri. 24Yhang gi, byù haú lé lhoqhtoq pyâm é htâng má, chyungxe sikgâm hkyô lé zúng râ matú, hkerubim#3:24 Hkerubim gâ é gi, byù su su, gaunyhaú su su dùt é, dùng dap é maumang lagyo rahú nghut lhê. eq hí htâng dùq wìk é myishâm lé, Edin hkyam é buìhtoq hkyam shut tô to bê nghut ri.

Actualmente seleccionado:

A-pûn Awang 3: znot

Destacar

Copiar