A-pûn Awang 4

Ka-in Eq Abelaq Nhiktang É Hkyô

1Adam gi, yhâng é yhûmsîng myhí Ewaq eq zum é nghut mù, Ewaq gi, zogûng dùt luî, Ka-in lé hkû bê nghut ri; yhang gi, “Yhûmsîng Garai, ngo lé garúm é yánmai, ngò gi, yùqzo rayùq hkû bê nghut lhê.” ga taî ri. 2Hau htâng, Ewaq gi, Ka-in é yhang gu Abelaq lé dum hkû bê nghut ri.

Abelaq gi, sau bainám zúng sû nghut ri; Ka-in kúm gi, yò mú zui zo sû nghut ri. 3Ra-nyí lé, Ka-in gi, haû Yhûmsîng Garai lé sôdun râ matú, myì mâ é kyôshi myuishi ra-am lé, hkungga dông yu lé lo ri. 4Abelaq le, yhâng é sau bainám mâ é sânghi gyó é ra-am mâ é xû pé lé yu lé lo ri. Haû Yhûmsîng Garai gi, Abelaq lé le, yhâng é hkungga lé le, wú ngui ri; 5nghut kôlhang, Ka-in eq yhâng é hkungga lé gi, a wú nguî nghut ri. Haû mù, Ka-in gi, gyai yhang nhik-yo naû luî, yhâng é myòqdong shum byùq bê nghut ri.

6Haú hkûn, haû Yhûmsîng Garai gi, Ka-in lé, “Nàng, haî mù nhik-yó nau nyi lhê lhú? Náng é myòqdong haî mù shum byùq lhê lhú? 7Nàng, jo têng é hkyô ru kut le gi, a hàp yù byî é kut râ nghut lhê lhú? Nghut kôlhang, nàng gi, jo têng é hkyô a kut é nghut jáng, yubàk mara gi, náng é hkum má ùp to bê nghut ri; haû gi, nang lé zuî zìng nau ri; nghut kôlhang, nàng gi, haú lé ùp zing ra râ nghut lhê.” ga taî ri.

8Hau htâng, Ka-in gi, yhang gu Abelaq lé, “Sâ, yò má ê gòq.”#4:8 Dang shí hkun gi, Hebre chyúmding má a bo é nghut lhê. ga taî ri. Yhángnhik yò má nghut nyi é hkûn, Ka-in gi, yhang gu Abelaq lé toq htim luî, sat pyám bê nghut ri.

9Haû mù, haû Yhûmsîng Garai gi, Ka-in lé, “Nunggu Abelaq gi, hká má lhú?” ga myî ri.

Yhang gi, “Ngò a sé. Ngò gi, ngá gu zúng sû nghut lhê lhú?” ga tû taî ri.

10Haû Yhûmsîng Garai gi, “Nàng haî kut bê lhú? Wú aq! Nunggû é sui gi, myigùng mai ngo lé wùt dûng ngau nyi ri. 11Ahkuî, nàng gi, nhinghkun zùq luî, nhut há mù, náng é lòq mai, nunggû é sui lé hàp yu é myigùng mai hkat pyâm é lé, hui zo bê nghut ri. 12Myigùng má, nàng, ho zo ho shuq kut é hkûn, myigùng gi, náng é matú, kyôshi myuishi lhoqhtoq byi râ a nghut. Nàng gi, myìdàm htoq má, hpang lhing wún, sô yông wún é sû dùt râ nghut lhê.” ga taî ri.

13Haú mù, Ka-in gi, haû Yhûmsîng Garai lé, “Ngo lé byî é mara dam shî gi, ngò a ung hkam é mara dam nghut ri. 14Hkû-nyí, Nàng gi, ngo lé maumyî haû mai hkat htoq pyâm nyi ri; ngò gi, Náng é myòq hí mai haq pyâm é hui râ nghut bê; ngò gi, myìdàm htoq má, hpang lhing wún, sô yông wún é sû dùt berâ nghut luî, ngo lé myang é sû ó yùq le, ngo lé sat kôrâ nghut lhê.” ga taî ri.

15Nghut kôlhang, haû Yhûmsîng Garai gi, yhang lé, “Haû su a nghut; rayùq yùq, Ka-in lé sat é nghut jáng, haú yùq gi, nyhit dâm lató hpuq é hui zo râ nghut lhê.” ga taî ri. Hau htâng, haû Yhûmsîng Garai gi, Ka-in lé myang é sû ó yùq le, yhang lé a sat râ matú, Ka-in lé masàt lhô tap byi bê nghut ri. 16Haû mù, Ka-in gi, haû Yhûmsîng Garaî é myòq hí mai htoq ló luî, Edin hkyâm buìhtoq hkyam mâ é Noda#4:16 Noda gâ é gi, sô yông wún gâ é lichyúm nghut lhê. gâ é maumyî má ê nyî bê nghut ri.

17Ka-in gi, yhâng yhûmsîng myhí eq zum é nghut mù, yhâng yhûmsîng myhí gi, zogûng dùt luî, Enuk lé hkû bê nghut ri. Hau htâng, Ka-in gi, wà mó ralhum xuq mù, yhang zô é myìng má cháng luî, wà mó haú lé, Enuk ga myhîng tô ri. 18Enuk gi, Irat lé hkû, Irat gi, Mahuyala lé hkû, Mahuyala gi, Mehtusha-ela lé hkû, Mehtusha-ela gi, Lamek lé hku é nghut ri.

19Lamek gi, myiwe í yùq yu ri; rayùq é myìng gi, Ada ga; rayùq é myìng gi, Zila gâ é nghut ri. 20Ada gi, Yabala lé hku ri; haú yùq gi, zúm pé má nyì mù, shigu gaunyhaú rém zo bâng é îchyí îwa nghut ri. 21Yhang gû é myìng lé gi, Yubala gâ ri; haú yùq gi, tíng bàt bang eq sámpyí mùt bang bànshoq é îchyí îwa nghut ri. 22Zila le, Tubala-Ka-in gâ é yùqzo rayùq hku ri; haú yùq gi, gyi eq jòqtoq zê a-myû myû bàt zo sû nghut ri. Yhang gi, Nama gâ é nhammó rayùq wó ri.

23Lamek gi, yhang myî nhik lé,

“Ada eq Zila ê, shî gyô wú keq;

Lamek é yhang myî nhik ê, ngá é dang gyo keq.

Ngò gi, ngo lé dàm mó tap é yùqgè rayùq,

zorâm hpó haú yùq lé sat pyám bê nghut lhê.

24Ka-in lé shut sû, lató hpuq é nyhit dâm huî é nghut le gi,

Lamek lé shut é sû gi, lató hpuq é nyhit xe nyhit dâm hui zo râ nghut lhê.” ga taî ri.

25Adam gi, yhang myi eq dum zùm mù, yhang myi gi, yùqzo rayùq dum hkû bê nghut ri; yhang gi, “Abelaq lé Ka-in èq sat pyám bê nghut mù, yhâng é malaî, ngo lé, Garai Gasang zoshâng rayùq dum byi bê nghut ri.” ga taí luî, yùqzo haú lé Shet#4:25 Shet gâ é gi, gyo byi gâ é lichyúm nghut râ nghut lhê. ga myhíng byî ri. 26Shet le yùqzo rayùq hkû mù, yhang lé, Enusha ga myhíng b yî ri.

Haú pyàt mai, byu pé gi, haû Yhûmsîng Garaî é myìng lé lâng hî bekô nghut ri.

Actualmente seleccionado:

A-pûn Awang 4: znot

Destacar

Copiar