GENESIS 50
50
1Tsi' c'uchchoco i bʌ José ti' tojel i tat. Tsi' cha'le uq'uel. Tsi' ts'ujts'ube i wut i tat. 2José tsi' yʌq'ueyob mandar i winicob yujilo' bʌ ts'ʌcaya cha'an mi' yotsʌben i ts'ʌcal jini ch'ujlelʌl cha'an ma'anic mi' yoc'mʌl. Jini sts'ʌcayajob tsi' yotsʌbeyob i ts'ʌcal i cuctal Israel. 3Cha'c'al q'uin tsi' ts'ʌcayob, come che'ʌch yom cha'an mi' yujtel ti ts'ʌcʌntel. Jini egiptojob tsi' yuc'tayob lujump'ejl i chʌnc'al (70) q'uin.
4Che' bʌ tsa' ñumi i yorajlel i yuc'tʌntel, José tsi' pejca jini año' bʌ ti' yotot Faraón. Tsi' yʌlʌ: Mi woli la' q'uelon ti' yutslel la' pusic'al, a wocolic cha' subenla Faraón chuqui wolic subeñetla: 5“C tat tsi' c'ajtibeyon cha'an mic wersa aq'uen c t'an. Tsi' yʌlʌ: Awilan, i yorajlelix mic chʌmel. Yom ma' mucon ti mucoñibʌl tsa' bʌ c piqui ya' ti' lumal Canaán. Che' tsi' yʌlʌ c tat. Jini cha'an, awocolic, la' majlicon c muc c tat. Ti wi'il mux c cha' tilel”. Che'ʌch yom mi la' suben, che'en José. 6Faraón tsi' yʌlʌ: Cucu, mucu a tat che' bajche' tsa' wersa aq'ue a t'an, che'en.
7José tsa' majli cha'an mi' muc i tat. Tsi' pi'leyob majlel pejtelel i winicob Faraón, yic'ot pejtelel año' bʌ i ye'tel ti' yotot Faraón yic'ot ti' lumal Egipto. 8Tsa' majliyob pejtelel año' bʌ ti' yotot José ja'el, yic'ot i yʌscuñob, yic'ot i yijts'in, yic'ot jini año' bʌ ti' yotot i tat. Cojach tsa' cʌleyob alʌlob yic'ot xmec' alʌlob yic'ot tiñʌme' yic'ot alʌc'ʌl ti' lumal Gosén. 9Tsa' letsiyob majlel yic'ot carreta tac yic'ot c'ʌchʌlo' bʌ.
10Tsa' c'otiyob ti' lum Atad ba' mi' jats'ob loq'uel i bʌc' trigo ya' ti junwejl Jordán ja'. Tsi' wen uc'tayob i tat ya'i. Wen ch'ijiyem i pusic'al. 11Jini cananeojob chumulo' bʌ ti jini lum tsi' q'ueleyob jini x'uq'uelob ya' ti' lum Atad ba' mi' jajts'el loq'uel i bʌc' trigo. Tsi' yʌlʌyob: Woliyob ti wo'wo' uq'uel jini egiptojob. Che' tsi' yʌlʌyob. Jini cha'an tsi' yotsʌbeyob i c'aba' Abel Mizraim jini lum am bʌ ti junwejl Jordán.
12-13I yalobilob tsi' meleyob che' bajche' tsi' yʌq'ueyob mandar Jacob. Tsi' ch'ʌmʌyob majlel yic'ot carreta ti' lumal Canaán. Tsi' mucuyob ti ch'en ya' ti jamil i c'aba' Macpela tsa' bʌ i mʌñʌ Abraham cha'an mucoñibʌl. An ti' tojel Mamre. 14Che' bʌ tsa'ix ujti i mucob i tat, tsa' sujti José ti Egipto yic'ot i yʌscuñob yic'ot pejtelel tsa' bʌ i pi'leyob majlel ti mucoñel.
Tsa' chʌmi José
15Tsa' caji' yʌlob i yʌscuñob José come chʌmenix i tat: Tic'ʌl mi mux caj i ts'a'leñonla José. Tic'ʌl mi mux caj i q'uextʌbeñonla lac jontolil tsa' bʌ lac melbe, che'ob. 16Tsi' chocoyob majlel t'an ba'an José. Tsi' yʌlʌyob: Tsi' yʌc'ʌ mandar a tat che' maxto chʌmenic. Tsi' yʌlʌ: 17“Che'ʌch yom mi la' suben José: A wocolic, ñusʌben i jontolil yic'ot i mul a wʌscuñob cha'an jontol bajche' tsi' melbeyetob”. Che' tsi' yʌlʌ a tat. Wʌle, a wocolic, ñusʌbeñon lojon c mul. I winicon lojon Dios, i Dios lac tat, che'ob. José tsi' cha'le uq'uel che' bʌ tsi' yubi ili t'an tsa' bʌ i chocbeyob tilel. 18Tsa' tiliyob i yʌscuñob. Tsi' pʌcchocoyob i bʌ ti' tojlel José. Tsi' yʌlʌyob: Awilan, a winicon lojon, che'ob.
19José tsi' subeyob: Mach la' cha'len bʌq'uen. ¿C wenta ba cha'an mic mʌctan chuqui yom i mel Dios? ¿Mach ba wersajic mic jac' ja'el chuqui yom Dios? 20Jatetla tsa' la' ña'ta la' contrajiñon ti jontolil, pero Dios tsi' ña'ta i c'ʌn ti uts'at cha'an mi' yujtel ti uts'at che' bajche' ti ili ora, cha'an mi' coltan cabʌl winicob x'ixicob. 21Mach yomix mi la' cha'len bʌq'uen. Joñon mi caj c we'sañetla yic'ot la' walobilob, che'en. Che' jini José tsi' ñuq'uesʌbeyob i pusic'al. Tsi' pejcayob ti uts bʌ t'an.
22José tsa' chumle ti Egipto. Ya' tsa' chumleyob pejtelel i pi'ʌlob ja'el. An lujump'ejl i wʌcc'al (110) i jabilel José che' bʌ tsa' chʌmi. 23José tsi' q'uele i p'olbal Efraín c'ʌlʌl ti' yuxlajmlel i p'olbal. Tsi' q'uele ja'el i yalobilob Maquir, jini winic bʌ i yalobil Manasés. José tsi' buch meq'ue ti' pix. 24José tsi' sube i pi'ʌlob: I yorajlelix mic chʌmel. Isujm Dios mi caj i ña'tañetla cha'an mi' pʌyetla loq'uel ti ili lum. Mi caj i pʌyetla majlel ti lum tsa' bʌ i wersa subeyob Abraham yic'ot Isaac yic'ot Jacob cha'an mi caj i yʌq'ueñob, che'en José. 25José tsi' sube i yalobilob Israel cha'an mi' wersa ac'ob i t'an. Tsi' yʌlʌ: Isujm Dios mi caj i ña'tañetla. Mux caj la' q'uech majlel c bʌquel che' mi la' loq'uel ilayi, che'en. 26Tsa' chʌmi José che' lujump'ejlix i wʌcc'al (110) i jabilel. Tsi' ts'ʌcʌbeyob i cuctal. Tsi' yotsayob i bʌc'tal José ti' cajonlel ya' ti Egipto.
Actualmente seleccionado:
GENESIS 50: ctuBI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 1977, Wycliffe Bible Translators, Inc. All rights reserved.