Sawal la kal teglesa 4
4
1Mi dala:
Ndak ka an le kak heîd’a,
ndak ki djif heî, ndak ki djif heî.
Irak ki djifâ krovo kur baru d’a zlupa kaka
ni d’igi gugud’a na.
Tumus sa kaka ti ni d’igi
ades b’ogei suma a nga i sulugota kä
yam ahina d’a Galät-tina na.
2Siyak mi hapa ni d’igi
ades tumiyô suma a tchawazi woi
suma a buzugï woi
aduk mbina ata yima mbusina na.
A nga tit ki b’oziyozina kakap,
ma ar kalena nga d’i.
3Vunak ma dalalâ mi ni d’igi ziyo ma hleu ma kekengâ na,
zla mak ka ded’a ti djivid’a,
agozlok mi djifâ krovo
kur baru mak ka zlupa kaka
d’igi abo vud’agu grenatna na.
4Dele’î d’igi gong nga fiyak ka ndjol la David mi minit
á ngom ahle suma sïnid’a na.
Mbareid’a dubu ti nga gapa atat akulo,
pet ni mbareid’a hi grang suma dur ayînid’a.
5Apok dja’î d’igi gro duguyo
suma a tchuguzi ngoneîd’a
suma a nga te hatna aduk tamasina na.
6Ata yima afata b’leng anguzuna mi kal leina,
an mba yam ahina d’a mirâ mi nga kuad’a,
yam yima nding ma dubang ma his djivid’ina nga kuana mi.
7Ndak ka an le kak heîd’a,
ndak djif heî,
yak ma tcho nga d’i.
8Amanda, ndak tcholï Liban mbeï iya,
ndak tcholï Liban mbeï iya,
ndak ar ahina d’a Amana-d’a,
ndak ar ahina d’a Senir-ra ki d’a Hermon-nda,
ndak ar domina hazlonina woyo,
ndak ar ahina d’a sindilâ mi nga kua ndata woi mi.
9Aman nda hurun vak heîd’a,
ndak lan tan djivid’a heî,
gol la ndak golon yak tud’a
lan tan djivid’a heî,
gol la an gol hed’eu ma kele’îd’a
tan lan djivid’a heî mi.
10Aman nda hurun vak heîd’a,
o maka djivid’a heî,
o maka kal süm guguzlud’a woi dei,
hisâ hi mbul ma ata’â,
mi kal hisâ hi mbul ma his ma afufuî ma dingâ pet mi.
11Amanda, vunak ma dalalâ mi sor kä
d’igi mbul ayuma na,
sinak ka de zlad’a
ti ni d’igi mbul ayuma kambira na,
hisâ hi baru ma’îna mi his afufuîd’a
d’igi hisâ hagu ma Liban-na na.
12Aman nda hurun vak heîd’a,
nda’î d’igi asine ma a ge kangâna kama na,
d’igi golong nga a ge kangâna kata na,
d’igi golong nga lau d’a a dugut vunata na mi.
13Asine ma’â nga mi vut
agu grenat ma djivina heî
kagu trowena kagu narâ,
14kagu Safrana kagu loriyêna kagu kanelâ,
kagu ma lara ge pet ma mbulum his afufuîd’a
d’igi mirâ ki alowena na
zlapa ki mbul ma his ma afufuî
ma djivi ma kal teglesâ pet mi.
15Nda’î ir mbiyo ma lau ma kur asinenina,
nda’î golong nga lau d’a d’igila hirwilinga,
nda’î toliyon nda djangî kä yam ahuniyô suma Liban-nid’a mi.
(Ndad’u)
16Ti dala:
Ang simet ma abo ma norâ,
ang tchol akulo,
ang simet ma abo ma sutna,
ang mbeya,
ang sir yam asine mana,
ar hisâ hi mbul ma afufuîna
mi b’ik hisâ kä b’ib’ik!
Ar ma an le kam heîna,
mi kal kur asine mama,
ar mi te vud’agu mam ma djivina!
(Mamu)
Actualmente seleccionado:
Sawal la kal teglesa 4: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
