Sawal la kal teglesa 1
1
1Wana ni sawal la kal teglesa hi Salomon-nda:
Sawal la avoka
(1.2—2.7)
Ndat ki mamu. Siret ma aduk suma a nga le yam tazina
(Ndad’u)
2Ti dala:
Ar ang bed’en ki furîd’a kok,
ar ang sobon vunanu!
Kayam o manga
ti kal süm guguzlud’a.
3Mbul mang ma his ma afufuî ma tetengâ,
mi his djivid’a;
simiyêngî d’igi mbul ma his ma afufuî
ma nga mi b’rau woi ata yinina na mi.
Kayam ndata, gro yuguneina a nga le kangû!
4Ang van abonu,
ang tananu, ei ringîya.
Angî amul mana,
ang kalan klavi hatangû,
ei lei hur ma hapma ngola ki furîd’a.
Ar ei suburi o mang nga kal süm guguzlud’id’a.
Yuguneina a le kang nata yad’u!
5Agi yugunei suma Jerusalem-ma,
an ni wurad’a, an ni djif
d’igi zlub’u d’a Kedar-ra na,
d’igi zlub’ud’a hi Salomon-nda na mi.
6Ar agi golon tä ala an ni wurad’a d’i,
kayam afata ti rumuyun ni ndad’u.
B’oziyon suma asuyona,
huruzi zal kanu,
a tinin á ndjol guguzlud’a,
wani an ndjol nga guguzlu manda tata d’i.
7Ang ma an hurun vang heîna, ang danu,
ang i pol tumiyô mangâ ni lara ge?
ang i tuguzi tazi falei ni lara ge?
Ni kayam me ba, an mbut d’igi
atcha d’a nga d’i halang
aduk tumiyôna hi ndrongîna na ge?
(Suma pola)
8Suma pola a dala:
Ndak ka djif aduk aropma heîd’a,
ndak le we nga d’uo ni,
ndak i tchit asem d’uwar ma gureina,
ndak i pol gro ahok ma’â
huyok azina hi suma polina.
(Mamu)
9Mi dala:
Ndak ka an le kak heîd’a,
an golo’î d’igi akulum
mba tan pusâ hi Faron-nda na.
10Agozlok mi djifâ ki ngangam ma humba,
delek ki djifâ ki hed’euna mi.
(Suma pola)
11Suma pola a dala:
Ami mba yorok ngangam ma lora
ndala ki kawei ma hapma mi.
(Ndad’u)
12Ti dala:
Ata yima amulâ mi nga kaka ki sum mamina,
mbul ma his ma afufuî ma kana
mi b’ik hisâ kä b’ib’ik.
13Ang ma an le kang heîna,
angî d’igi mir ma his ma afufuî
ma djinda muguluk ma nga ged’a vunadigana na.
14Ang ma an le kang heîna,
angî d’igi ades b’od’a hagu
ma aduk guguzlu d’a En-Gedi-d’ina na.
(Mamu)
15Mi dala:
Ndak ka an le kak heîd’a,
ndak djif heî, ndak djif heî!
Ira’î d’igi gugud’a na.
(Ndad’u)
16Ti dala:
Ang ma an le kang heîna,
ang djif heî, tan lan djivid’a heî kangû!
Azang mei ma burâ nasu ma nguloma.
17Agu ma yam gong meid’ina nabo agu sedrena,
agu ma murguli ma atatna nagu siprena mi.
Actualmente seleccionado:
Sawal la kal teglesa 1: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
