Jeremi 5
5
Azì ma ngol ma bei d’engzengina
1Ma didina mi dala:
Agi igi ir palum mba Jerusalem-mba teteng,
agi i gologiya, agi halagi ad’ud’a,
agi halagi ata yima suma a tok kuana.
Le agi fagi sa kua tu,
le agi fagi sama mi tit yam gagazid’a
ma nga mi hal d’engzengina ni,
an mba ni vat hurun ndei yam suma Jerusalem-ma.
2Jeremi mi dala: Le a nga dala:
Ami gunumi tami ki simiyê Ma didin ma bei matna ba na pî,
ni gun ta d’a ir gurzulid’a hawa na.
3Ma didina, ang halî d’engzenga d’uo zu?
Ang toziya, wani a gol to ndata ni va d’i.
Ang lazi á dabazi woyo,
wani azi hum nga gat ndata d’i.
A le yam mba ad’enga,
a noî á hulongî gevengû.
4Ata yi máma an dala:
A le ni sunda hi kem mba gureid’a.
A we nga va d’i,
a we nga minda hi Ma didinid’a d’i,
a we nga gata hAlo mazinid’a d’uo mi.
5Wani an mba ni i gen suma nglona,
ni de zlad’a ki sed’eziya,
kayam azi ni suma a we minda hi Ma didinid’a
ki gata hAlo mazinid’a.
Wani azi tazi pet ni hina mi,
a kus djuk ma kelezina woyo,
a but vun mazi ma djin ma a djinim kAlonina woi mi.
6Ni kayam ndata ba,
azlo ma aduk agud’ina mba mi vigiziya,
ngû ma hur fulîna mba mi kizagaziya,
sindilâ mba mi kud’uguzi avun azì mazi ma nglona.
Suma pet suma a mba buzugï woina,
mba mi kizagazi woyo,
kayam so vun mazina mi kal ngola,
tcha tata mazid’a ti zul heî mi.
7Ma didina mi dala: Ndak Jerusalem,
Ni nana ba, an mba ni vat hurun ndei kak ke?
Kayam gro’â a nga aran ndeyo,
a nga gun tazi kalo ma nga nalona d’uo na.
An hobozi ki tena, wani azi le ni mizeuna,
a nga tok tazi avo hi gaulangâ.
8Azi ni d’igi akulumei andjof suma tchuka akulo
suma d’or suma a nga breî á hal aropma hi ndrozinina na.
9Ma didina mi de kua ala:
An mba ni ngop yam ahle suma hina na d’uo zu?
An mba ni sä atchugula kandjaf ma hina na d’uo zu?
10Agi igi kur asine mat ma guguzlud’a,
agi b’lagam mbeyo, wani agi b’lagam mbei pet ti.
Agi tchawagi abo guguzlu mata woyo,
Kayam azi nga ni suma hi an Ma didinina d’i.
11Ma didina mi de kua ala:
Israel-lâ ki suma Juda-na a mbud’un iran ngola.
Wurak ka yam suma a noî Alona woinid’a
12Suma Juda-na a tin vunazi yam Ma didina,
a dala: Mi nga d’i.
Ndaka nga d’i mba kei d’uo d’a,
ei mba wei ayî ma dur roze baktarad’a d’uo mi.
13Mam suma djok vuna a ni d’igi simetna na.
Zla nga kuruzi hina nde d’i.
Ar zla ndata ti mba kazi hina.
14Ni kayam ndata ba,
Ma didin ma ad’engêm kal petna mi dala:
Kayamba azi de hina d’a,
an nga ni tin zla man nda
d’igi akud’a na d’a avunang ang Jeremi.
Sum ndazina a mba mbut ni d’igi aguna na mi.
Aku ndata mba d’i ngalazi woyo!
15Ma didina mi de kua ala:
Agi Israel-lâ, gola!
An nga ni mbeï kandjaf ma dingâ
ata yima dedeina á durugiya.
Nandjaf ma ad’engâ,
nandjaf ma mi nga adjeu dedeina,
nandjaf ma agi humum nga vunam mbuo na,
ni ma agi nga wagi ad’u vama mam nga mi duma d’uo na mi.
16Azì yeû mazid’a vunat nga ngod’a woi
d’igi zul la tos matna na,
azi pet ni grang suma dur ayîna.
17A mba b’lagagi awu magina ki te magina,
a mba tchagi grogi suma andjofâ ki grogi suma aropma,
a mba tchagi d’uwar magi ma gureina ki ma nglona woyo,
a mba b’lagagi guguzlu magid’a ki tulumei magina woyo,
a mba togi aziyagi ma nglo ma ad’eng ma ngungu
ma agi tinigi hurugi kama kä woi kayî ma durâ mi.
18Ma didina mi de kua ala: Wani ata yi máma an mba ni dabagi woi pepet ti. 19Jeremi, le a djobong ala: Ni kayam me ba, Ma didina Alo meina mi mba ki ndak ndata kei hina pet ke ni, ang dazi ala: Ni kayamba agi noyôm mbei agi i lagi sunda malo ma dingâ kur ambas magid’id’a, agi mba lagi magomba mi suma dingâ kur ambas sa nga ni magid’a d’uo d’a hina mi.
Alona nga mi ngop sum mama
20Ma didina mi dala:
Ang i de zla ndata mi suma hi Jakob-ma,
ang tchat walat mi suma hi Juda-na mi ala:
21Agi suma lilid’a, agi suma bei wad’ud’a, agi humugiya.
Agi nga ki ira, wani agi nga wagi d’i;
agi nga ki humba, wani agi nga humugi d’uo mi.
22Ma didina mi de kua ala:
Agi nga lan mandaran nduo zu?
Agi nga zlagagi avoron nduo zu?
An ni ma he alum ma ngolâ lesâ
á haga d’a didindina.
Mam ndak á tchila kat tuo mi.
Abil mama nga mi sulula,
wani mi nga kad’enga á kal lei kat ti,
nga mi le abilâ guguzlubut,
wani nga mi tchila woi kat tuo mi.
23Wani sum ndazina a ni suma yam mba ad’enga,
ni suma bei hum vuna.
Azi nga hulong tchuk tazi á i yi mazina.
24A nga de kuruzi hina ala:
Ar ei lei mandara Alo mei ma nga mi sei
alo ma avo’â ki ma danana ata yama
ma nga mi ngomei bur ma mi ngam á dutina d’i.
25Ni yam tchila magid’a ba,
ahlena a mbut avorogi tchod’a wana;
ni yam tcho magid’a ba,
agi kid’agagi woi ata ahle suma djivi ndazina mi.
26Kayam suma asa’atna a nga aduk sum mana.
Azi ni d’igi suma a nga tchiget
á gun dauna kä a vik aluweinina na,
a nga gun abeid’a kä, a nga vik suma mi.
27Gola! Aziyazi mi oî ki mbut ira
d’igi gong nga ngom aluweina ti oî kaluweina na.
Kayam ndata, a mbut ad’enga,
a mbut suma ndjondjoîna mi.
28Azi nga d’orâ, tazi nga d’i ngal wiwilik,
a nga le tcho d’a kal kazid’a,
a nga d’el vama tchona d’i,
a nga ka sariyad’a hi suma hokuyod’id’a d’i,
a nga i avogovogo,
a nga ka sariyad’a hi suma houd’id’a ata yat tuo mi.
29Ma didina mi dala:
An mba ni ngop yam ahle ndazina d’uo zu?
An mba ni hlatchugula kandjaf ma hina na d’uo zu?
30Vama atchapma ki vama ndjendjed’a
suma a mba kur ambas ndatina ba wana:
31Suma djok vuna a nga djok vun ma ka zlad’a,
suma ngat buzuna a nga te yamba kad’eng mazid’a,
sum mana a min ala ahle ndazina a le hina mi.
Wani dabid’a hahle ndazinid’a agi mba lagi ni nana ge?
Actualmente seleccionado:
Jeremi 5: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
