Jeremi 36
36
Jojakim mi ngal mbaktum mba Baruk mi b’irita woyo
1Kur biza d’a fid’i d’a Jojakim Josiyas goroma amul ma Juda-na nga mi tamulid’a, Ma didina mi de zlad’a mi Jeremi ala: 2Ang hle mbaktum mba d’ut ta hawad’a, ang b’ir zla d’a pet ta an dangzi adjeu yam Israel-lâ yam suma Juda-na yam andjafâ pet tinï ad’ud’a kur bur ma an dang zlad’a kur atchogoid’a hi Josiyas-sa dei gak inid’a. 3Dam suma Juda-na a mba hum zla d’a tcho d’a an ngat kurun á lazizid’a tala a mba hulongî nge nge pî mba mi ar tit mam mba tchod’a, an mba ni vat hurun ndei yam tchila mazid’a ki tcho mazid’a zi ge d’a.
4Jeremi mi yi Baruk Neriya goroma, mi dum zla d’a Ma didina mi dumzid’a ki yam pet, Baruk mi b’irit kä kur mbaktum mba d’uta pet mi.
5Bugola, Jeremi mi he vuna mi Baruk ala: Gola! An ni d’ela, an ndak á i kur gong nga kud’ora hi Ma didinid’a d’i. 6Ang tanga i ndumuzi zlad’a hi Ma didina d’a an dangzi ki yan ang b’irit kur mbaktum mba d’utid’a avok suma kur gong ndatina kur bur ma a d’el tazi bei te tenina, ang ndumut avok suma Juda suma a nga buzugï kur aziyazi ma nglonina pet mi. 7Dam tchen mazi d’a hud’a mba d’i i avok Ma didina, azi nge nge pî mba mi hulongî ar tit mam mba tchod’a woyo, kayam ayîna ki hur ma zala hi Ma didina ma mi zalam yam sum ndazinina mi kal ngola heî.
8Baruk Neriya goroma mi lahlena pet suma ma djok vun Alona Jeremi mi hum vuna kazina, mi ndum zlad’a hi Ma didina d’a a b’irit kur mbaktumbid’a kur gong mam mba kud’ora. 9Kur biza d’a vahl hla Jojakim Josiyas goroma amul ma Juda-na nga mi tamulid’a, kur til ma zlengîna a tchi wala yam bur ma d’el tad’a bei te tena avok Ma didina yam suma Jerusalem-ma ki suma a mbeï kur azì ma nglo ma Juda-na avo Jerusalem-ma pet mi. 10Baruk mi ndum zlad’a hi Jeremi d’a mi b’irit kur mbaktum mba d’utid’a avok suma kur gong nga kud’ora hi Ma didinid’a, kur gonga hi Gemariya Safan ma b’ir mbaktumba goroma, kur atrang nga akulo ndinga avun Agrek ma Awilina hi gong nga kud’orina mi.
11Kid’a Mika Gemariya gorom ma Safan gorom ngolona mi hum zlad’a hi Ma didina d’a mi b’irit kur mbaktumbid’a peta, 12mi i kur azì ma amula kur gonga hi ma b’ir mbaktumbid’a, ata yima suma nglona pet a nga kaka kuana, nala, Elisama ma b’ir mbaktumba, Delaya Semaya goroma, Elnatan Akbor goroma, Gemariya Safan goroma, Sedekiyas Hananiya goroma ki suma nglo suma dingâ pet mi. 13Mika mi vazi ad’u zla d’a pet ta mam humut ata yima Baruk mi ndum mbaktumba avok sumina.
14Ata yi máma suma nglona ki zla tazi pet a sun Jehudi Netaniya gorom ma Selemiya gorom ngolona ni Kusi gorom ngolo ma mbàna ata Baruk á dum ala: Ang hleï mbaktum mba d’ut ta ang ndumut avok sumid’a, ang mbeï ki sed’ed’u. Baruk Neriya goroma mi hle mbaktum mba d’ut ndata abomu, mi i ki geveziya. 15Azi dum ala: Ang kak kä, ang ndumumi mbaktum ndata. Baruk mi ndumuzizi mi.
16Kid’a azi hum zla ndata peta, a nde gol ir tazi ki mandarâ, a de mi Baruk ala: Ami i dami zla ndata mamulâ pet. 17A djop Baruk ala: Ang damiya ni nana ba, ang b’ir zla d’a pet ta mam dangzi ki yamba ge?
18Baruk mi hulong dazi ala: Mi dan zlad’a pet ki yam ki delem akulo, an b’irit kä kur mbaktumba ki engkred’a mi.
19Suma nglona a de mi Baruk ala: Ang ki Jeremi, agi i ngeyegi tagiya, ar sa mi we yima agi nga kuana d’i!
20Bugola, a i kur azì ma amula, a ar mbaktumba kä ata yima tchuk ahlena kur gonga hi Elisama ma b’ir mbaktumbid’a, a väd’u zla ndata woi avok amulâ pet.
21Amulâ mi sun Jehudi á hleï mbaktum mba d’ut ndata. Jehudi mi i mi hlad’ï kur gonga hi Elisama ma b’ir mbaktumbina, mi ndumut avok amulâ, avok suma nglona pet suma a nga tchola gen amulîna mi. 22Ni kur til ma zlengîna ni yima ab’lenga amulâ mi nga kaka kur gonga, mi tchuk nga akud’a ki gordjona avorom nga d’i ngala. 23Ata yima Jehudi mi ndum mbaktumba abot hindi d’oze fid’ina, amulâ mi ngad’at aduk kei ki mbigeud’a, mi tchugut yam aku d’a gordjo d’a nga d’i ngala gak mbaktum mba d’ut ndata ti ngal lei pet. 24Amulâ kazungeî mama pet a hum ad’u zla ndata pet, wani a le nga mandar roze a haû nga baru mazi ma atazina woi d’uo mi. 25Wani Elnatan, Delaya ki Gemariya a tchen amulâ avok ki so tad’a ala mi ngal mbaktum mba d’ut ndata woi d’uo pî, mi humuzi nga d’i. 26Amulâ mi he vuna mi Jeramel amulâ goroma, Seraya Asriyel goroma ki Selemiya Abadel goroma ala a i yoï ma b’ir mbaktumba Baruk azi ki ma djok vun Alona Jeremi. Wani Ma didina mi ngeyeziya.
27Bugol la amulâ mi ngal mbaktum mba d’ut ta Jeremi mi de zlad’a mi Baruk ki yam mi b’irit kä kura woi ngala, Ma didina mi de mi Jeremi ala: 28Ang hle mbaktum mba d’ut ta dinga, ang b’ir zla d’a kur mbaktum mba avok ka Jojakim amul ma Juda-na mi ngalat teid’a kä kurut pet. 29Bugola, ang de zlad’a mi Jojakim amul ma Juda-na ala: Ni ang ba, ngal mbaktum mba d’ut ndata woyo, ang dala: Ni kayam me ba, ang b’ir zla ndata ala: Amul ma Babilon-na mba mi mba gagazi, mba mi b’lak ambas sa wanda woyo, mba mi ndjoî suma woi ki d’uwarâ ge? 30Ni kayam ndata ba, Ma didina mi de zlad’a yam Jojakim amul ma Juda-na ala: Sa mam tu pî mba mi kak yam zlam mba amula hi David-ta d’i. Mad’am mba mi arî ged’a kä ir afata faleya, kä ir ab’lenga andjege mi. 31An mba ni mba á ngobom kandjavam kazungeî mama yam tchila mazid’a, an mba ni mba ki ndak ka an dazi kat ta azi humun nga d’uo d’a kaziya, yam suma a nga kaka Jerusalem-ma, yam suma Juda-na pet mi.
32Jeremi mi hle mbaktum mba d’ut ta dinga, mi hat mi Baruk ma b’ir mbaktumba Neriya goroma. Baruk mi b’ir zla d’a Jeremi mi dumzi ki yam mbà mi b’irit kä kur mbaktum mba Jojakim amul ma Juda-na mi ngalat teid’a, mi b’ir zla d’a ding nga hle tat d’igi ndat hina d’a kam kua mi.
Actualmente seleccionado:
Jeremi 36: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
