Jeremi 18
18
Jeremi mi nga avo hi sama min deina
1Ma didina mi dan ala: 2Jeremi, ang tchol akulo, ang i avo hi sama min deina. Ata yi máma an mba ni dang vama an nga ki sed’em á dangzina.
3An i avo hi ma min deina, an fum nga mi le sunda yam tabul mama. 4Le dei ma lubu ma mam minima mi b’lak kei abomu ni, mi hulong mi minim min nda dinga d’igi mam hurum min na. 5Ma didina mi dan kua ala: 6Agi Israel-lâ, an ndak á le ki sed’egi d’igi sama min dei máma na d’uo zu? Gola! D’igi lubuna mi nga hur abo sama min deina na, agi Israel-lâ agi nga hur abon an ni na mi. 7Bur ma dingâ an nga ni de zlad’a yam andjaf ma dingâ d’oze yam leu d’a dinga á pad’at teyo, á pleyêt teyo, á b’lagat tei mi. 8Wani le andjaf ma an de zlad’a kama mi hulong mbut hurum yam asa’at mamba ni, an mba ni ar ndak ka an ngamzi kam á lumzid’a woyo. 9Wani bur ma dingâ an nga ni de zlad’a yam andjaf ma dingâ d’oze leu d’a dinga á minit toze á tinit ad’ut kä. 10Wani le andjaf máma mi le nga vama mi lan tan djivid’ina d’uo, le mi humun nga vunan nduo mi ni, an nga ni ar djivi d’a an ngat kurun á lumzid’a woyo.
11Ki tchetchemba, ang i de mi suma Juda-na ki suma a nga kaka avo Jerusalem-ma ala: Gola! Ma didina mi dala: An nga hurun á lagi tchod’a, an min nga zlad’a kurun á lagi ndaka. Ar nge nge pî adigagi mi ar tit mam mba tchod’a woyo, ar agi djogogi tit magid’a ki sun magi d’a led’a.
12Wani a nga dala: Hawa yak! Ami tid’imi ni yam djib’er mamid’a, nge nge pî mi le ni ata djib’er ra yam mba ad’eng nga kurum krovod’a.
Israel-lâ a mar yam mazi Ma didina
13Kayam ndata, Ma didin mi dala:
Agi djobogi aduk andjaf suma,
ni nge ba, mi hum nga ahle suma hina na yam tu d’uo ge?
Israel-lâ a le vama ndjendje ma kalâ.
14Na ni nes#18.14 nesâ: Ki vun francais-na ala: la neige. ma Liban
ma yam ahuniyô suma fuyogei suma abageina
mi lau woi zu?
D’oze mbiyo ma ab’leng
ma mi tcholï djangâ ata yima deina
mi so woi zu?
15Wani sum mana a maran ndeyo,
a nga ngal dubang ma his djivid’ina
mi filei ma hawa ya’â,
a nga lá puka kä kur lovot mazid’a,
a ar lovot mazi d’a adjeud’a woyo,
a nga tit kur lovot ta sa nga mi tit kua d’uo d’a.
16A mbut ambas mazid’a vama suma a le atchap kama,
vama las ma gak didina.
Suma a nga kal kurâ pet a nga le atchap kad’u,
a nga kidjik yazi mi.
17An mba ni ndjoyôzi woi avok mazi suma djangûna
d’igi simet ma abo ma yorogona mi ndjoî ahlena woi na,
an mba ni hazi huyogonu,
an mba ni mbut iran irazi
kur bur ma b’laka mba d’i mba kazina d’i.
Suma a ndjak vunazi yam Jeremi; mi tchen Ma didina
18Ata yi máma suma a nga dala: Ki tchetchemba, ei ndjagei vunei yam Jeremi, kayam ei mba kid’agei suma ngat buzuna á had’ei d’i, d’oze suma ned’a á dei d’alâ, d’oze suma djok vuna á djogei zlad’a hAlonid’a d’uo mi. Ei i toïzi ki zla d’a de d’a asa’ata, ar ei tini humei yam zla mam mba ded’a d’uo mi.
19Jeremi mi tchen Ma didina ala:
Ang tin humang humunu,
ang hum zla d’a man suma djangûna a nga dat kanda.
20Na ni a mba hulong tchod’a yam djivid’a zu?
Kayam a djugot nga zula kä kan á tchan ndeyo.
Ang djib’er yam tchol la an nga tchola avorong á dang zlad’a kazi
tala ang b’leng hurung kazi ang lazi djivid’a d’a.
21Kayam ndata, ang ar baktarad’a ti mba yam grozina,
ang tchuguzi azi tazid’a avun ayî ma durâ.
Ar amiyôzina a kak hawa bei grona,
a ar modonod’a!
Ar matna mi tchazi andjuviyoziya,
ar azungeî mazina a tchazi woi
avun ayîna ki mbigeu d’a fiyaka!
22Fata ang mba kades azigarâ kazi dumuzi á duruzid’a,
ar a hum tchi ma hohoud’a avo hataziya,
kayam azi djugot zula kä avoron á vanu,
a ngei nga dauna kä gumun avoron mi.
23Wani Ma didina, ang we ndjak vun mazi
ma a ndjagam kan á tchana pet.
Ar ang vat hurung ngei yam tchila mazid’a d’i,
ar ang has tcho mazid’a woi avorong ngi.
Ar azi puka avorongû, ar hurung zal kaziya.
Actualmente seleccionado:
Jeremi 18: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
