Jeremi 14
14
Baktara d’a tchod’a
1Wana ni zla d’a Ma didina mi dat mi Jeremi yam baktarad’id’a. Mi dum ala:
2Suma Juda-na a nga kur yor tad’a,
azì mazi ma nglona mi b’lak keyo,
a tchuk susub’ok,
a nga bululul kä andaga.
Tchina hi suma Jerusalem-ma
mi tchol nga mi i akulo.
3Suma nglona a nga sun azungeî mazina á gul mbina.
Azi i kur golongeîna, a nga fe mbina d’i,
a nga hulong kagolongeî mazina huruzi hawa,
a mbut zulona, a mang ngeyo,
a tchok yazi kä abo zulona.
4Andagad’a ti wak ngongok,
kayam alona nga mi se yam ambasa d’i.
Suma zuma a mbut zulona, a tchok yazi kä abo zulona.
5Duka pî ti noî gorot ma ndat ti vud’um awilina woyo,
kayam hatna mi nga d’i.
6Koro ma abageina mi tchol yam ahuniyô suma fuyogei
suma va nga kazi d’uo na,
nga mi tche simetna d’igi hâna na.
Iram mbi mbut hohoud’a,
kayam hatna mi nga d’i.
7Suma Juda-na a dala: Ma didina,
le tchila mamid’a nga d’i tchugumi zlad’a kami pî,
ang le va yam simiyêngû,
kayam tcha tata mamid’a ti zul heî,
ami lami tchod’a avorong mi.
8Ang ma Israel-lâ a tin huruzi kangâ,
ang ma sud’uzi woi ata yima ndaka mba kazina,
ni kayam me ba,
ang kak d’igi sama ding ma mi kal tita kur ambasina na
d’oze d’igi akoi ma mi ve zlub’ud’a á le bur tu go na na ge?
9Ma didina, ni kayam me ba,
ang kak d’igi sama mandarâ
d’oze d’igi grang ma mi ndak
á sut sum mama d’uo na na ge?
Wani ang nga adigamiya,
a nga yami ki simiyêngû.
Ang arami woi d’i.
*
10Ma didina mi hulong de yam sum ndazina ala: Azi ni suma tcha tatana, azi ni suma a nga ve tazi hina kei d’uo na. An Ma didina tan nga d’i lan djivi kazi d’i, an djib’er yam tchila mazid’a, an mba ni ngobozi yam tcho mazid’a mi.
11Ma didina mi dan ala: Ar ang tchenen yam sum ndazina ala an lazi djivid’a d’i. 12Le a d’el tazi bei te tena pî, an mba ni hum tchi mazi ma hohoud’a d’i. Le a han he d’a hawa d’a ngala ki he d’a hawa d’a afuta pî, an mba ni vat abozi d’i. Kayam an min dabazi woi kayî ma durâ ki baktarad’a ki tugud’ei d’a tcho d’a tchi matna mi.
13Ata yi máma an hulong dum ala: Salad’a Ma didina, gola! Suma djok vuna a nga dazi ala: Agi mba wagi ayî ma durâ d’oze baktara d’i. Wani Ma didina mba mi hagi b’leng nga halas sa gagazid’a ka hî ata yima wana.
14Ma didina mi hulong dan ala: Suma djok vun suma a nga djogogi vuna ki simiyên wana a ni suma ka zlad’a. An sunuzi nga d’i, an hazi nga vun ndi, an dazi nga zla d’uo ko. Azi djogogi ni zla d’a ka d’a nde tat irazi woid’a ki zla d’a djopa ki filei ma hawa ya’â ki mbut ir ra kuruzi krovod’a mi. 15Kayam ndata, an Ma didina nga ni de zlad’a yam suma a nga djok vuna woi ki simiyên suma an sunuzi nga d’uo suma a nga dala: Ayî ma durâ ki baktarad’a a mba mba yam ambasa d’uo na. An nga ni dagiya: Suma djok vun ndazina a mba tchazi avun ayî ma durâ, baktarad’a mba d’i dabazi woi mi. 16Suma azi nga djogozi vunina a mba bo kä ir palum mba Jerusalem-mba abo meid’a kayî ma durâ. Sum ndazina kamiyôzina ki grozi suma andjofâ ki grozi suma aropma a mba fe sama tozozina d’i. An mba ni hulongôzi asa’at ta azi lata kaziya.
17Ang dazi zla ndata ala:
Iran nga d’i yak simina falei kandjege bei ara ba,
kayam a ka sum mana mbilâ.
Ni b’lak ka ngola,
mbil mazina ni mbil ma ngol ma kalâ.
18Le an i kele ni,
an gol wani mad’a suma a tchazi avun ayînina,
mi nga samba kä.
Le an kal kur azì ma ngolâ ni,
an gol wani suma meid’a tchazina,
mad’azi mi nga samba kä mi.
Suma djok vuna ki suma ngat buzuna
a nga kleû tita kur ambasa pî,
azi nga we d’op zla tu d’i.
19Suma Juda-na a dala: Ma didina,
ang arami ni ami suma Juda-na woi ki irang fafat tchu?
Ang golî Siyon is su?
Ni kayam me ba, ang tomiya,
ang nga tchilimi mbilimi d’uo ge?
Ami tinimi hurumi ni yam halasa,
wani vama djivi nga d’uo;
ami djubumi ni suta,
gol wani, ni tchina.
20Ma didina, ami wami asa’at mamid’a
ki tchod’a hi simiyêmid’a,
kayam ami lami tchod’a avorongû.
21Yam simiyêngû, ang golomi is si.
Ar zulona mi mba yam zlam mang nga amul la subura d’i,
ar ang djib’era,
ar ang but vun ma ang djinim ki sed’emina woi d’uo mi.
22Aduk fileina handjaf suma dingâ ma ndak á salonina nga zu?
D’oze akulod’a ti ndak á salo ma kuküna vat tchu?
Ni ang Ma didina Alo mamina d’uo zu?
Ami tinimi hurumi ni kang angû,
kayam ni ang ba, lahle ndazina wan pet na.
Actualmente seleccionado:
Jeremi 14: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
