Jeremi 11
11
Suma a mbut ira kur vun mazi ma djindina
1Jeremi mi dala: Ma didina mi dan zlad’a kagi ala: 2Agi humugi zlad’a hi vun ma djin ma wanid’a. Mi de kua ala: Ang de zla ndata mi suma Juda-na ki suma avo Jerusalem-ma mi. 3Ang dazi ala: Ma didina Alona hi Israel-lîna mi dala: Sama mi hum nga zlad’a hi vun ma djin máma d’uo na, an mba ni gum vuna. 4Ni vun ma djin ma an djinim kabuyogi ngolo ata yima an buzuguzï woi kur ambas sa Ezipte-d’a d’igi für ma kaweina na na, an dazi ala: Agi humugi vama an hagi vuna kama, agi tid’igi yam vama an hagi vuna kama mi. Hina wani, agi mba mbud’ugi sum mana, an mba ni arî Alo magina mi. 5Hina wani, an mba ni ndak vun gun ta d’a an gun tan mabuyogi ngolo á hazi ambas sa ambira ki mbul ayuma a nga sor kä kuad’a d’igi agi nga wagizi ini na.
An hulong dum ala: Amin, Ma didina!
6Ma didina mi dan kua ala: Ang i de zla ndata ki deleng akulo kur azì ma nglo ma Juda-na ki ir palum mba Jerusalem-mba pet ala: Agi humugi zlad’a hi vun ma djin ma wanid’a, agi tid’igi kat mi. 7Gagazi, an le glangâsâ mabuyogi ngolo, tinï ad’ud’a ni kur bur ma an ni buzuguzï woi kur ambas sa Ezipte-d’a dei gak ini. An nga ni mba á lazi glangâsâ ala: Agi humundi vunanu. 8Wani azi a humun nga vunan ndi, a tin nga humazi á humba d’uo mi. Azi pet nge nge pî mi tit ni yam djib’er mam mba yam mba ad’enga kurum krovo d’a bei wad’ud’id’a. Kayam ndata, an tinizi zlad’a hi vun ma djin ma an hazi vuna kam ala a tit kamu na kazi pet, wani azi tit nga kam mbi.
9Ma didina mi dan kua ala: Ndjak vun ma tcho ma gumuna, mi nga aduk suma Juda-na ki suma avo Jerusalem-ma. 10A hulong wa yam tchod’a habuyozi ngolo d’a avok ka a min humun zla manda d’uo d’a, a zlap wa kalo ma dingâ á kud’uromu. Israel-lâ ki suma Juda-na a but wa vun man ma djin ma an djinim kabuyozi ngolona woyo.
11Ni kayam ndata ba, Ma didina mi dala: Gola! An nga ni mba ki ndaka kaziya, ni ndak ka azi mba buzuk kei kurut tuo d’a. Azi mba tchi kanu, wani an mba ni humuzi d’i. 12Ata yi máma suma Juda-na ki suma a nga kaka avo Jerusalem-ma a mba hulong gen alo ma ding ma azi nga hum dubang ma his djivid’ina. Wani mam mba mi sud’uzi woi ata yima ndaka mba kazi máma d’i. 13Kayam agi nga kalona ngad’a yam azì ma nglo ma Juda-na gagang, agi tinigi yima ngal dubang ma his djivid’a ma zulona teteng ir palum mba Jerusalem-mba á ngalagi dubang ma his djivid’ina mi Bäl.
14Ang Jeremi, ang tchenen yam sum ndazina d’i, ang tchi kan ndoze ang tchenen tchen nda hud’a kazi d’uo, kayam an mba ni humuzi ata yima ndaka mba d’i mba kazi azi mba yan á ndjunuzina d’i.
Israel-lâ a nagu olifâ hi Ma didinina
15Ma didina mi dala:
Suma an hurun vazi heîna
a le nga sun nda irata d’i,
a mba kur gong manda á le ni me ge?
A djib’er ala vama azi hlan vunazi kama
d’oze ahle suma a ngad’andji buzunina,
a mba kengêzi woi abo ndaka,
a mba buzuk kei kuru zu?
16Ma didina mi yagi ala
Agu olif ma b’o ma vud’um djif heîna,
wani aduk siwel la ngola, mi do akud’a ata humamu,
abom mba mi kus seyo.
17Ni Ma didin ma ad’engêm kal pet ma pagina ba,
nga mi yi ndaka kagi kayam tcho
d’a agi Israel-lâ ki suma Juda-na a lagizid’a.
Mi dala: A he dubang ma his djivid’ina mi Bäl á zalan hurunu.
Jeremi simiyêm a halam á tchid’a
18Ma didina mi tagan zla ndata, an wad’u. Ki tchetchemba, an nga ni we sun mazi d’a azi nga lata. 19Wani an ni d’igi timi ma kukud’ok ma a im ata yima ngatina na. An we nga vunazi ma ndjak ma a ndjagam kan ala: Ei tchi angusâ woi ki vud’umu; ar ei kam mbei yam andagad’a hi suma a nga ki irazina, ar sa mi djib’er yam simiyêm bugol luo d’angû na d’i.
20Wani ang Ma didin ma ad’engêng kal petna,
angî ma ka sariya ma d’ingêrâ,
angî ma fek hur sana ki djib’era hi sanid’ina.
An mba ni we atchugul la ang mba sazizid’a,
kayam an ar zla manda nabongû.
21Ni kayam ndata ba, Ma didin ma ad’engêm kal petna mi nga ki va á de mi suma Anatot ndazina. Ni suma a hal á tchana, a dan ala: Ang ar bei djok vuna ki simiyê Ma didina. Le d’uo ni, ang mba mit akulo hur abomiya! 22Ni kayam ndata ba, Ma didin ma ad’engêm kal petna mi dala: Gola! An nga ni mba á ngoboziya. Azungeî mazina a mba bo avun ayîna, grozi suma andjofâ ki grozi suma aropma, baktarad’a mba d’i tchazi mi. 23Suma Anatot ndazina, sa mazi mba mi ar tu d’i, kayam an mba ni mba ki ndaka kazi kur biza d’a an mba ni mba á ngobozid’a.
Actualmente seleccionado:
Jeremi 11: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
