Isai Wana ni modo zla d’a kuruta
Wana ni modo zla d’a kuruta
Ki vun Hebre-na ad’u simiyê Isai nala, Ma didina nga mi sud’a. Ni simi máma tu ba, nga mi vad’ud’a yam hat ta kur mbaktum ndatid’a. Wani andjaf suta hAlonid’a ki sut ta suma a nga halata ni teteng. Kayam ndata, hat ta kur mbaktum ndatid’a ni vama atchapma.
Wala hi mbaktum ndatid’a nad’u hindi. Wal la lara pî nga d’i de zlad’a yam atchogoi d’a tetenga hi Israel-lîd’a.
WAL LA AVOKA ni sapitre d’a 1 gak 39. Mi nga mi de zlad’a mi suma yam ahle suma a le woi kur biza d’a 740 gak mba kur biza d’a 700 d’a avok vuta hi Jesus Christ-sid’a. Kur atchogoi ndata, amul ma Asiri-na nga mi hal á dur ayîna ki suma Juda-na, wani Isai nga mi hat suma ala ma djangû ma ngol kal ma tegles mazina ni tcho d’a azi tazi nga lata ki ge d’a azi nga ge yazi kä ad’u gata hAlonid’a d’uo d’a mi.
Mi yazi á tit kur lovot ta d’ingêra, mi ngobozi ala le a hum nga Alona d’uo ni, b’laka ki ndaka a mba mba kaziya. Ma djok vuna mi had’azi ala atchogoi d’a nga d’i mbad’a, ata yi máma halasa mba d’i oî yam andagad’a, mi de zlad’a yam David gorom ngolo ma a mba vud’um ma mba mi kak amul ma ndak memetnina mi.
WAL LA MBÀD’A ni sapitre d’a 40 gak 55. Ata yima dingâ a yat ala Mbaktum mba b’leng hur Israel-lîd’a. Ma djok vuna nga mi de zlad’a yam atchogoi d’a suma Juda-na a nga kur magomba avo Babilon-nda. Ata yi máma a nga kaka ki hur ma b’laka bei tin hurâ, a nga djib’er ala Alona mi arazi ni woyo!
Wani ma djok vuna mi hazi ad’enga, mi dazi ala Alona mba mi le sun mamba kur Sirus amul ma Perse-na á prud’uzi woi kur magomba. Ata yi máma Alona mba mi hulong sum mama pet yam andaga mazid’a. Kayam Alona ni ma landagad’a kakulod’a petna, mi ndak á ndak vun vun mam ma hled’a mi. Wani alo ma tetengâ hi suma a kus kazina nahle suma hawa ya’â.
Ma djok vuna mi de zlad’a yam sama a yum ala Azongâ hi Ma didina na. Gol 42.1-4; 49.1-6; 50.4-9 ki 52.13–53.12. Mbaktum mba Vun ma Djin ma Awilinid’a ti tagei ala sa máma ni Jesus. Gol Sun SS 8.30-35.
WAL LA HINDID’A ni sapitre d’a 56 gak 66. Ma djok vuna nga mi de zlad’a mi suma a hulong avo Jerusalem bugol magombina. Kur biza d’a 537 d’a avok vuta hi Jesus Christ-sid’a, Sirus amul ma Perse-na mi b’ir mbaktumba á bong lovota avok suma kur magombina á hulong avo Jerusalem, á min gong nga kud’or ra min nda awilid’a mi. Suma ablaud’a a hulongîya, wani nad’enga heî kazi á kaka kur ambasa.
Ma djok vuna tak tam mi Israel-lâ d’igi ma sun ma Muzu’â hi Salad’a Ma didinina mi sunumî á tchi wal zla d’a djivid’a mi suma hohoud’ina na. Gol sapitre d’a 61-d’a. Kur Mbaktum mba Luc mi b’irita sapitre d’a 4.16-21, Jesus mi de mi suma ala: Zla d’a a b’irit kur mbaktumba hAlona d’a agi humut inid’a, ndak wa memet. t Wana ni wal mata
Wal la avoka 1–39
(a) Ngopa ki vun ma hled’a 1–12
(b) Ngop pa yam andjaf sumid’a 13–23
(c) Sariya d’a Alona nga mi kat yam andagad’id’a 24–27
(d) Ngopa ki vun ma hle ma dingâ 28–35
(e) Ezekiyas amul ma Juda-na ki suma Asiri-na 36–39
Wal la mbàd’a 40–55
(a) Sun nda teteng nga yam vun ma hled’a ki tin hurîd’a 40–55
Wal la hindid’a 56–66
(a) Ngopa ki vun ma hled’a 56–66
Actualmente seleccionado:
Isai Wana ni modo zla d’a kuruta: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.