Isai 7
7
Sun nda a gat ata amulâ Ahas-sa
1Kur atchogoid’a hi Ahas Jotam gorom ma Oziyas gorom ngolona amul ma Juda-nid’a, Resin amul ma Siri-na mi i asem tazi ki Peka Remaliya goroma amul ma Israel-lâ á dur ayîna ki suma Jerusalem-ma. Wani azi ndak nga á duruzi d’i. 2Suma a mba de zla ndata mi Ahas ma ad’u andjafâ hi David-nina ala suma Siri-na a ve nga kang mazina yam ambas sa Efraim-mba. Ahas ki sum mama huruzi mi ka mbina, a nde giget d’igi agud’a ti giget abo babarâ na.
3Ata yi máma Ma didina mi de mi Isai ala: Ang ve gorongâ Seyar-Jasup#7.3 Seyar-Jasup: Nala, ad’uzi d’a ara mbud’i hulongîyâ., ang i ngaf Ahas avun yima b’irlim ma mbina nga tchola kuana, avun lovot ta i kur asine ma suma a mbus buruna kuana. 4Ang dum ala ba: Ang kak irang sik, ang le mandar ri. Ar hurung ka mbina avok vuna djo ma mbà ma nga mi d’us wana d’i, avok ayîna hi Resin ma Siri-na kayîna hi Remaliya goromina d’uo mi. 5Kayam suma Siri-na a de zla d’a tchod’a kangû, zlapa ki suma Efraim-ma ki Remaliya goroma ala: 6Ei i duri ayîna ki suma Juda-na, ei mbud’izi mandarâ, ei toï gulumuna kä woi gak ei kuzuzi vunaziya, ei tini Tabel goroma amula kazi mi. 7Gola! Ma didina mi dala:
Ahle ndazina a mba ndak á le d’i,
8-9kayam Damas nazì ma ngol ma Siri-na,
Resin mi te ni kat ndat hol,
Samari nazì ma ngol ma Efraim-ma,
Peka mi te ni kat ndat hol mi.
Ar bizad’a dok karagaya yam vahl,
a mba b’lak suma Efraim-ma woyo,
a mba ndumuzi andjafâ bugol luo d’a.
Le agi tinigi hurugi yam Ma didina d’uo ni,
agi ndak á tchologi avorozi d’i.
Vama tak ma yam Emanuel-lâ
10Ma didina mi hulong de mi Ahas kua ala: 11Ang djop Ma didina Alo mangâ yam vama tak ma kä ad’u andagad’a yiyi’â d’oze ma sä kur akulod’a deina.
12Ahas mi hulong dum ala: An nga ni djop va d’i, an min kuk Ma didina d’i.
13Ata yi máma Isai mi dum ala: Agi suma hi David-na, agi humugiya! Kau d’a agi kawagi suma ki ve tad’id’a ndagagi nga d’uo tua ba, agi min kawagi Alo mana kua ki ve ta mamba mi zu? 14Kayam ndata, Salad’a ki yam mba mi hagi vama taka: Gola! Gor weid’a mba d’i ve wirâ, mba d’i vut gorâ, ti mba d’i yum ala Emanuel#7.14 Emanuel: Ad’ut nala, Alona mi nga ki sed’emiya, d’oze, Alona mi nga ki sed’eya.. 15Mba mi te mbul ambira ki mbul ayuma, gak mi djeng mi noî tchod’a, mi man djivid’a. 16Avok ka gor máma bei mi djeng mi noî tchod’a mi man djivid’id’a, leud’a hamulei suma mbà suma ang nga lazi mandarazi wana, mba d’i ar djona. 17Ma didina mba mi mba ki ndaka kang ang ki sum mangâ kandjaf habung ngolona. Tinï ad’ud’a kur bur ma suma Efraim-ma a wal lei ki suma Juda-na dei gak ini, ndak ka hina d’a ti le nga yat tu d’i. Zla ndata ni ngad’a yam mbad’a hamul ma Asiri-nid’a.
Ndak ka mba yam ambasid’a
18Fata bur máma mbad’a, Ma didina mba mi yi
aro ma avun alum ma Nil-lîna taud’a
kayum ma yam ambas sa Asiri-d’ina mi.
19A mba kak ir b’irlima avun gongôd’id’a,
kur zul ahinad’a,
aduk azlupa,
abagei hur fula mi.
20Kur bur máma Ma didina mba mi ndeï ki velâ
sä abo alum ma Efrat-na woi hî.
Ni ngad’a yam amul ma Asiri-na.
Mam mba mi welegi yagi woyo,
mba mi welegi tumus sa atagid’a
ki d’a dudumagid’a woi pet mi.
21Kur bur máma
nge nge pî mba mi wul amuhl hla weid’a tu
ki b’ogeina mbàmbà mi.
22Ambir mazid’a mba d’i zula,
gak suma a mba te ni mbul ambira.
Kayam mbul ambira ki mbul ayuma
a mba arî tena hi suma a mba ar kur ambasina.
23Kur bur máma
asine ma lara ma a mba fe abu guguzlud’a kua dubu
ma guzum ndak ir bege d’a hapa dubuna,
mba mi arî aduk kekerezeuna kaweid’a.
24A mba nduwan kua ki yeûd’a kaguwatna,
kayam ambasa pet mba d’i
deî ni kekerezeuna kaweid’a.
25Yam yima nding ma a zumum ki kaweid’id’a,
sa mba mi ve tam ad’enga á kal kua d’i
abo mandarâ hi kekerezeuna kaweid’ina,
wani a mba ar amuzleina ki tumiyôna a te kua.
Actualmente seleccionado:
Isai 7: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
