Isai 57
57
1Wani ma d’ingêrâ nga mi ba woyo,
sama mi djib’er yam zla ndatina nga d’i.
Suma djivina a nga yozi woyo,
wani sama mi wad’ud’a ala a hle sama d’ingêrâ woi
ná prud’um mbei kur asa’ata na nga d’i.
2Sama nga mi tit kur lovot ta d’ingêrina
mba mi kal kur halasa,
mba mi tuk tam yam azang mama mi.
Ngop pa yam suma tuwal fileinid’a
3Agi atcha d’a djop fileina grotna,
andjaf fa mizeu d’a gaulangâ, agi hud’ugi ka hî.
4Agi lazagi ni nge ge?
Agi ngogi vunagi woi hagak
agi trâgi sinagi bibiliu nata nge ge?
Agi ni gro suma bei hum vuna d’uo zu?
Agi nandjaf ma ka zlad’a mi d’uo zu?
5Agi ni suma hologi tagi ad’u atchinda
ad’u agu ma lara ge ma angusîna d’uo zu?
Agi ni suma a nga ngad’agi grogina kä
kur hora angra ahuniyônina mi d’uo zu?
6Ahuniyô suma gulut suma ngunglung
suma kur horina ni b’rau magid’a.
Wana ni b’rau magid’a.
Ni ndat ba, agi hagizi he d’a hawa d’a süm guguzlud’a,
agi hagizi he d’a hawa d’a ngala mi.
Ahle ndazina hina pet, hurun mba mi b’leng kazi zu?
7Ni yam ahina d’a fiyak ka akulo dei ba,
agi nga tinigi azang magi ma burâ kua á le tchod’a.
Ni kua ba, agi nga djagagi á hagi ahle suma ngat buzuna mi.
8Agi nga minigi va magi ma ge humba
avun gonga ata agu ma avunatna,
kayam agi walagi woi dei ki sed’enu.
Agi nga fogogi baruna woi atagiya,
nga djagagi akulo gandilad’a,
agi nga lagi azang magi ma burâ bubud’a,
agi nga djinigi vunagi ki suma agi hurugi vazang mazinina,
agi nga golozi gandila mazid’a mi.
9Agi nga igi akoid’a hamulâ ki mbulâ,
agi zulugi mbul magi ma his ma afufuîna,
agi sunugi magi suma sunda ata yima deina,
agi hulongôgi yagi kä gak ata yima azuleina.
10Kur tit magi d’a kad’engid’a agi kawagiya,
wani agi nga dagi ala: Ei areya d’i,
agi fagi ad’eng nga dinga kua,
agi nga seyêgi d’uo mi.
11Agi lagi mandarâ nabo nge ba, agi kandi zlad’a,
agi djib’eregi kan nduo,
agi walagi woi dei ki an nge?
An kak bei de zlad’a ni dedei.
Ni kayam ndata ba,
agi nga gagi yagi kä avoron nduo wana.
12An mba ni de woi yam d’ingêr magid’a ki sun magid’a;
agi mba fagi va ki sun magid’a d’i.
13Fata agi tchigid’a,
ar filei magi ma ablauna mi prud’ugi woyo,
ar simetna mi yozi woi pet,
ar fod’a ti felezi woi mi.
Wani sama ngei tam atana, mba mi tambasa djona,
mba mi kak yam ahina man nda an tinit irat vata mi.
Suta hi suma hAlonina
14Ma didina mi dala: Agi gagi lovota,
agi gagi lovota, agi minigi lovota,
agi pad’agi ahle suma a d’el lovota
avok sum manina woi pet.
15Ma sä akulo ma kal tegles ma nga kaka gak didin
ma simiyêm ala Ma bei tchod’a ba na na, mi dala:
An nga ni kaka ata yima sä akulo dei ma didina
ata yima an tinim iram vama.
Wani an nga ki sama hurum b’lak
ma mi hulong yam kä
á b’leng hur suma a hulong yazi kä lulumana,
á b’leng hur suma huruzi mi b’la’â mi.
16An mba ni tchol ad’enga hina gagak kuo,
an mba ni zal hurun hina baba d’uo mi.
Le d’uo ni, suma an lazina,
a mba kau a bo woyo.
17Ni kayam d’od’ok mazi d’a tchod’a ba,
kur ayî mana an toziya,
an min wazi ki iran ndi.
Wani azi nga i avogovok kur so vun mazina,
kur djib’er mazi d’a kuruzi krovod’a mi.
18An we sun mazi d’a led’a da’,
wani an mba ni sud’uziya,
an mba ni ndjunuziya,
an mba ni b’lengêzi huruzi
zlapa ki suma a nga yor tazi ki sed’ezina mi.
19Ma didina mi de kua ala:
An mba ni tin giled’a avun suma a mba dala:
Halasa, halasa yam sama sä deina,
yam sama gona mi.
An mba ni sud’uziya.
20Wani suma asa’atna a ni d’igi alum ma ngol
ma mi tcha tata ma mbiyo mama nga mi tchol b’et tuo
ma nga mi labilâ mi tchuk sä zozot ta lara ge woi petna na.
21Alo mana mi dala:
B’leng nga halasa nga yam suma asa’atna d’i.
Actualmente seleccionado:
Isai 57: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
