Isai 39
39
Ezekiyas mi ve suma sunda hamul ma Babilon-na atamu
(Gol 2 Amul 20.12-19)
1Kur atchogoi ndata amul ma Babilon-na Merodak-Baladan Baladan goroma, mi hum ala Ezekiyas mi ve tugud’eid’a, mi tchol akulo. Kayam ndata, mi sunumï mam suma sunda ki mbaktumba ki he d’a hawad’a abozi mi. 2Ezekiyas tam lum djivid’a. Mi tagazi aziyam ma mam nga mi ngom ahle mam suma guzuzi kal teglesâ kuana pet, nala, kawei ma hapma, lora, mbul ma his ma afufuîna ki mbul ma guzum kal teglesâ. Mi tagazi yima ahle mam suma ayîna a nga kuana kahlena pet suma a nga ata yi mam ma ngom ahlenina. Vama Ezekiyas arazizi bei taka ma kur aziyam ma amulina d’oze ma kur leu mambina pet nga d’i.
3Bugola, Isai ma djok vun Alona mi mba gen amulâ Ezekiyas, mi dum ala: Sum ndazina a dangâ na ge? A tcholï ni lara ge?
Ezekiyas mi hulong dum ala: A tcholï ni yam andaga d’a Babilon-nda ata yima deina, a mba geven wana.
4Isai mi dum kua ala: Azi golî me avo hatang nge?
Ezekiyas mi hulong dum ala: A wahle suma avo hatana pet. Vama ata yan ma ngom ahlena ma bei an tagazizina nga d’i!
5Ata yi máma Isai mi dum ala: Ang hum zla d’a Ma didin ma ad’engêm kal petna mi data. 6Mi dala: Gola! Bur tu ahle suma a nga kur aziyang ma amulina pet kahlena pet suma abuyong a togozi gak inina, a mba yozi izi Babilon pepet. Va mba ar ka hî d’i. 7Azi mba yo grong ngolo suma dingâ, a mba mbud’uzi suma ngom aropma hur azì ma amula hamul ma Babilon-na.
8Ezekiyas mi hulong de mi Isai ala: Zlad’a hi Ma didina d’a ang dandji wanda ni zla d’a djivid’a. Nala, an mba kak ki halasa ki djivid’a ata yima an nga ki iran tua na hina d’uo zu?
Actualmente seleccionado:
Isai 39: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
