Isai 17
17
Leu d’a Damas-sa ki d’a Israel-la a puga
1Wana ni zla d’a Ma didina mi dat yam Damas-sa, mi dala:
Gola! Damas a mba ndumut aduk azina d’i,
wani mba d’i arî djimngil ma b’laka.
2Azì ma nglo ma nguyutna a mba aram mbei ki irazi fafat,
a mba aramî mi d’uwarâ, a mba mol kua,
vama mba mi mbud’uzi mandarîna nga d’i.
3Ma didin ma ad’engêm kal petna mi dala:
Azì ma ad’eng ma ngunguna hi suma Efraim-mina mba mi b’lak keyo,
leud’a hi suma Damas-sid’a mba d’i b’lak kei mi.
Suma Siri suma a mba arâ a mba ndumuzi ni va d’uo
d’igi Israel-lâ na mi.
4Kur bur máma Israel-lâ a mba mang ngeyo,
hliwizi ma d’orâ mba mi id’a.
5A mba mbut ni
d’igi sana mi tok awu ma nga tchola akulo kasema kä na,
d’igi sama dut awuna mi dut yam awuna abom na,
d’igi sana mi tchi helena kur hor ra Refa-d’a na mi.
6Ma didina Alona hi Israel-lîna mi dala:
Israel-lâ a mba arî
d’igi hele ma suma a tchuma
d’oze d’igi agu olif ma suma a tchum ki agigleuna
mi ar akulo ata aguwam mbà d’oze hindi
d’oze fid’i d’oze vahl ata aboma na.
7Kur bur máma sana mba mi mbut iramî yam Salam ma mi luma, mba mi tin iramî yam Ma tin tam irat vat yam Israel-lîna. 8Mba mi mbut iram á gol yima ngal ahle suma ngat buzu ma mam minim kaboma tetengâ d’i, mba mi tin iram yam vama mam lum ki tchitchid’ama, d’oze yam alo d’a a yat ala Asera-d’a ki filei afata tetenga d’uo mi.
9Kur bur máma azì ma nglo ma ad’eng ma ngunguna hi Israel-lîna a mba aram mbei d’igi azì ma nglona hi suma Het-na kazì ma nglona hi suma Amor-râ a aram mbei adjeu kur bur ma Israel-lâ a mbana na. Mba mi mbut ni hur ful la gangrasa.
10Agi Israel-lâ, agi maragi yam Alo ma sud’ugina,
agi djib’eregi nga yam ahina magi d’a ad’enga d’i.
Kayam ndata, agi pagi nagu ma agi tinigi hurugi kama,
agi pagi nandjaf guguzlud’a hi suma dingîd’a.
11Kur bur ma agi pagizina, agi gat kangâna kad’u.
Tcha yorogod’a guguzlu magid’a ti b’o,
wani agi nga fagi vama dut kua d’i.
Wana ni ndak ka bei fat kumat ba d’a.
Sora handjaf sumid’a
12Alë! Suma ablau suma mimiyâ’â delezi nga d’i ngir kä
d’igi mbiyo alum ma ngolâ delem nga d’i ngir kä na,
andjaf suma vunazi nga mi tchi wü
d’igi abilâ halum ma ngolîna vunam nga mi tchi wü na.
13Andjaf suma vunazi nga mi tchi wü
d’igi mbiyo alum ma ngolâ
vunam nga mi tchi wü na,
wani Ma didina mi ngoboziya,
a ring ngei dei d’igi brad’a ti fel lei
abo simet ma tcholï akulo
yam ahuniyônina na,
d’igi ir mau d’a simetna mi sirit akulo
aduk mbirlimba na mi.
14Tcha fladege mandarâ mi nga,
avok ka bei yina fod’a, sa nga d’i.
Wana ni wuraka hi suma
a nga b’ad’ami ahligiyemina,
wana ni b’raud’a hi suma
a nga hurumumi ahligiyemina mi.
Actualmente seleccionado:
Isai 17: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
