Isai 13
13
(b) NGOP PA YAM ANDJAF SUMID’A
(13—23)
Dabid’a hi Babilon-nda
1Wana ni zla d’a sun nda Ma didina mi ndat tei ir Isai Amot goroma yam Babilon-nda:
2Ma didina mi dala:
Agi hlagi drapo d’a taka akulo
yam ahina d’a va nga kat tuo d’a,
agi eregi ad’ugi akulo kad’u,
agi lagi abogi ala
ar a kal avun agre’â hi suma nglonina!
3An he vuna mi suma a he tazi mi an na,
an yi azigar man suma gangrang
suma a nga han ngola yam kus mandina
á tak ayî mana woi abua.
4Agi humugi siwel la yam ahuniyôna ndata,
ni d’igi ablau suma a to’â na.
Agi humugi sora handjaf suma a tcholï
kur leud’a teteng a tok ndazina.
Ma didin ma ad’engêm kal petna nga mi kal
á gol b’rang nga nga d’i i á dur ayînid’a.
5Azi tcholï ni yam ambas sa deid’a,
a tcholï navun dabid’a handagad’id’a.
Ma didina ki mam suma dur ayîna
yam hur mam ma zalina
a mba b’lak ambas ndata woi pet.
6Agi yorogi tagiya,
kayam burâ hi Ma didinina mi ar wa go,
nga mi mba ni d’igi b’lak ka ti tcholï
ata Ma ad’engêm kal petnid’a na.
7Kayam ndata, suma pet abozi mi mbut amangeîd’a,
vunadigazi ti pat fefek mi.
8A mba le mandarâ,
ndaka ki pupuluka hi hliu tad’id’a mba d’i laziya,
a mba tcha tata
d’igi atcha d’a nga d’i tcha tata á vutid’a na,
a mba gol ir tazi ki mandarâ,
irazi mba d’i tchor hleud’a d’igi akud’a na.
9Gola! Burâ hi Ma didinina nga mi mba.
Ni bur ma bei we hohowa sa kur ba na,
ni bur ma ayî ma bibiliuna.
Mba mi b’lak ambasa woi mi mbud’ut fulâ,
mba mi dap suma a le tchod’ina woi mi.
10Kayam tchitchiud’a kades tchitchiu d’a tetenga
d’igi dumusa teteng na d’a a mba b’o d’i,
afata mba d’i mbut nduvunda ata yat ma deîd’a,
tilâ mba mi b’o d’uo mi.
11Ma didina mi dala:
An mba ni ngop suma yam andagad’ina yam asa’at mazid’a,
an mba ni ngop suma asa’atna yam tchila mazid’a,
an mba ni hulong suma yam mba ad’enga yazi kä,
an mba ni hulong suma subur tazi
suma te yam suma kad’engina yazi kä mi.
12An mba ni mbut suma a arâ akid’eid’a
kal lor ra bei zozota ba d’a,
kal lor ra Ofir-ra mi.
13Kayam ndata, an mba ni giget akulod’a,
andagad’a ad’ut ta ged’a mba d’i giget
abo ayîna hi an Ma didin ma ad’engên kal petnina,
abo bur man ma ayî ma bibiliuna mi.
14Kur bur máma,
nge nge pî mba mi hulong ad’u andjavamu,
nge nge pî mba mi ring kur ambas mamba
d’igi duk ka nga d’i tcha tatad’a na,
d’igi d’uwar ma sama polom nga d’uo na na mi.
15Suma pet suma a mba fazina,
a mba tchogizi hayaziya;
suma a mba yozina pet,
a mba tchazi ki mbigeu d’a fiyaka mi.
16A mba tchazi grozi suma tchapona kä woi iraziya,
a mba hurum ahle mazina,
a mba tchuguzi kur bud’omeina,
a mba bur kamiyôzina kad’enga mi.
17An mba ni zut suma Mede
suma a nga djib’er yam kawei ma hap
poze tazi nga lazi djivid’a yam lora d’uo na
á kak djangûna ki sed’eziya.
18Azi mba tchi gro azungeîna woi ki yeû mazid’a,
a mba we hohowa grozi suma kuruzina d’i,
hohowa gogor nga mi lazi d’i.
19Babilon nda djif kal leu d’a dinga pet
tala ni hed’eu ma djif ma sum matna,
a nga subur ki taziya d’a.
Ti mba d’i mbut ni d’igi Sodom ki Gomor
suma Alona mi b’lagazi woi adjeuna na.
20Sa mba mi kak kurut ti,
a mba fe sa kaka kurut ti gak didin.
Ma Arap mba mi ve zlub’u mam kua d’i,
suma pola a mba kak kua ndjö d’uo mi.
21Ahle suma abageina a mba mol kua,
tchohôd’a mba d’i mol kua,
arigeta mba d’i kak kua,
ahuwabeid’a mba d’i dub’ar kua mi.
22God’eid’a mba d’i tchi kuru,
hâna mba mi kak kur aziyat ma amula.
Burut ar go á mbad’a,
burut mba mi i avok kuo d’a.
Actualmente seleccionado:
Isai 13: BA
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Azumeina Bible © Alliance Biblique du Tchad, 1999.
