Taga-Roma 12
12
Ti Baro a Biag ken Cristo
1Kakabsatko, dawatek ngarud kadakayo, a gapu iti naindaklan nga asi ti Dios kadatayo, ipaayyo koma ti bagiyo a kas daton a sibibiag, nasantoan ken makaay-ayo kenkuana. Daytoy ti pudno a panagdaydayaw a rumbeng nga ipaayyo. 2Saanyo a tultuladen dagiti ugali iti daytoy a lubong ngem palubosanyo a baliwannakayo ti Dios ket pabaroenyo a naan-anay ti panunotyo. Ket maammoanyonto ti pagayatan ti Dios—no ania ti naimbag, makaay-ayo kenkuana ken awan pagkuranganna.
3Gapu iti parabur ti Dios kaniak, ibagak daytoy kadakayo amin: Diyo ipapan ti bagiyo a nangatngato ngem ti rumbeng. Natanang koma ketdi ti panagpampanunotyo, ket usigen ti tunggal maysa ti bagina kas mayannurot iti rukod ti pammati nga inted ti Dios kenkuana. 4Adu#1 Cor. 12:12. ti paset ti bagitayo ket agduduma ti usarda. 5Kasta met a nupay adutayo, maymaysatayo a bagi ken ni Cristo. Napagkakamangtayo a kas iti nadumaduma a paset ti bagi. 6Masapul#1 Cor. 12:4-11. ngarud nga aramatentayo dagiti nadumaduma a sagut kas iti parabur nga inted ti Dios kadatayo. No panangipakaammo iti mensahe ti Dios ti saguttayo, masapul nga aramidentayo kas mayannurot iti pammati nga adda kadatayo. 7No panagserbi, agserbitayo. No panangisuro, mangisurotayo. 8No pammaregta, paregtaentayo ti padatayo a tao. Ti adda ibingayna, mangted a sibubuslon. Ti mangipangulo, agtrabaho a sigagaget. Ti mangngaasi, mangngaasi a siraragsak.
9Agayatkayo a sipupudno. Guraenyo ti dakes ket salimetmetanyo ti naimbag. 10Nabara koma ti panagiinnayatyo kas agkakabsat ken ni Cristo, ket nareggetkayo a mangipakita iti panagraemyo iti maysa ken maysa. 11Ipasnekyo ti agtrabaho, ket dikay agsadsadut. Ipapusoyo ti agserbi iti Apo. 12Agbiagkayo a siraragsak gapu iti namnamayo. Ibturanyo dagiti rigatyo, ket kanayon nga agkararagkayo. 13Ibingayanyo dagiti napanglaw a kakabsatyo iti pammati, ket padagusenyo dagiti sangsangaili.
14Dawatenyo#Mat. 5:44; Luc. 6:28. iti Dios a bendisionanna dagiti mangidadanes kadakayo. Wen, dawatenyo ti pannakabendisionda a saan ket a ti pannakailunodda. 15Makipagragsakkayo kadagiti agragsak. Makipagsangitkayo kadagiti agsangit. 16Dikay#Prov. 3:7. mangidumduma. Dikay agpalangguad; makigayyemkayo ketdi kadagiti nanumo a tattao.#16 makigayyemkayo ketdi kadagiti nanumo a tattao; wenno Akmenyo dagiti nanumo a kita ti trabaho. Diyo ipagarup a mamasiribkayo.
17Diyo supapakan iti dakes ti siasinoman nga agaramid iti dakes kadakayo. Ikagumaanyo nga aramiden ti naimbag iti imatang ti amin a tattao. 18Aramidenyo amin a kabaelanyo a makilangen a sikakappia iti tunggal maysa. 19Ni#Deut. 32:35. kaanoman dikay agibales, gagayyemko. Bay-anyo a ti Dios ti agibales. Ta nailanad iti Nasantoan a Surat: “Siakto ti agibales, siakto ti mangsupapak, kuna ti Apo.” 20Ngem#Prov. 25:21-22 (LXX). kas kuna ti Nasantoan a Surat: “No mabisin ti kabusormo, pakanem; no mawaw, painumem. No aramidem ti kasta, maalananto ti agbain.”#20 maalananto ti agbain. Iti Griego, agurnongkanto kadagiti dumardarang a beggang iti ulona. 21Dika paabak iti dakes. Parmekem ketdi ti dakes babaen iti naimbag nga aramid.
Actualmente seleccionado:
Taga-Roma 12: RIPV
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 1996 Philippine Bible Society
