Levítico 26
26
Cäsukuqkuna bendicionta chaskiyänanpaq nishqan
Deuteronomio 7.12-24; 28.1-14
1<< <Noqami Tayta Diosniki kaykä. Sayno kaykaptinqa ima ïdulutapis ruraykur ama adorayankisu. Wanka rumikunatapis ni dibujash rumikunatapis adorayänaykipaq ama ichisiyankisu.#Éxo. 20.4; Lev. 19.4; Deut. 5.8; 16.21-22; 27.15. 2Jamay junaqcho respitayämashpayki jamayanki. Saynöla Sagrädu Toldutapis respitayanki.#Lev. 19.30. Noqami Tayta Dios kaykä.
3<< <Leynïkunata y mandamientükunata cumpliyaptikiqa 4tamyatapis tiempulanchömi tamyasimushaq. Chakrakunacho mikuykunapis jachakunapis alimi wayunqa. 5Trïgupis üva poqumushqanyaqmi aypanqa. Üvapis trïguta murushqaykiyaqmi aypanqa. Pacha junta mikurmi nacionnikichöpis ali kawayanki.#Deut. 11.13-15.
6<< <Nacionnikicho ali kawarmi tranquïlu punukuyanki. Noqami mikukuq munti uywakunapita y guërrapitapis sapäyäshayki. 7Atacayäshunaykipaq contrayki runakuna shayämuptinpis vinciyashpaykimi qatikachäyanki. Paykunataqa lapantami espädaykikunawan wanusiyanki. 8Pisqaqlami pachak (100) runakunata qatikachäyanki. Pachak runakunalami chunka waranqa (10,000) runakunata qatikachäyanki. Contraykikunataqa espädaykikunawanmi wanusir ushayanki.
9<< <Pactuta rurar promitishqänölami askaman mirayänaykipaq bendicionnïta churamushaq. 10Aska wata mikuyänaykipaqmi maran trïguykikunapis aypanqa. Mushuq cosechayashqaykitapis tröjata jäkasirraqmi churayanki.
11<< <Qamkunawanmi imaypis täshaq. Manami imaypis kachäyäshaykisu. 12Maypa aywayaptikipis qamkunawanmi kaykäshaq. Noqami qamkunapa Diosniki imaypis kashaq. Qamkunami kuyashqä runakuna kayankipaq.#2Cor. 6.16; Apoc. 21.3. 13Noqami Tayta Diosniki kaykä. Egiptucho ashmay kaykäyaptikimi jorqamushkä. Pitapis mana mansakuypa kawayänaykipaqmi yanapashkä.
Mana cäsukuqkunata castigananpaq nishqan
Deuteronomio 28.15-68
14<< <Noqa nishqäkunata mana wiyakayämaptiki, mandamientükunata mana cumpliyaptiki, 15leynïkunata mana cäsukur mana respitayämaptiki y pactu rurashqäta manakaqman churayaptikiqa 16mansariypaq castigarmi qamkunaman kachamushaq fiebrita, nawi nanayta, aywapakayta y wanusikuq qeshyatapis. Contraykikuna shamur cosëchaykikunata apakuyaptinmi murupakuyashqaykipis manakaqlapaq kanqa. 17Saynölami contrayki rikakuptï chikiyäshuqnikikuna vinciyäshushpayki munaynincho sararäyäshunki. Pipis mana qatikachaykäyäshuptikimi qeshpiyanki.
18<< <Sayno ruraykaptïpis mana cäsukayämaptikiqa qanchis kuti masmi castigayäshayki. 19Mana cäsukuq y orgullösu kayaptikimi tamyatapis tamyasimushaqsu y murupakuyashqaykitapis wayusishaqsu. 20Chakraykikuna mana wayuptin walälami aruyankipis. Saynölami plantayashqayki frütakunapis wayunqasu.
21<< <Mana cäsukamar nishqäkunata manakaqman churayaptikiqa jusalikuyashqaykiman tupumi qanchis kuti mas castigayäshayki. 22Munti uywakunatami kachamushaq surikikunatapis uywaykikunatapis ushayänanpaq. Saymi pipis nänipa puriyänalanpaqpis kanqasu.
23<< <Sayno castigaykaptïpis cäsukayämänaykipa trukan nishqäkunata manakaqman churayaptikiqa 24noqapis qamkunapa contrayki rikakurmi jusalikuyashqaykipita qanchis kuti mas fiyupa castigayäshayki. 25Mana cäsukayämaptikiqa pactuta rurar nishqänölami wanusikuq runakunata kachamushaq. Markaykikunaman pakakuq qeshpiyaptikipis fiyu qeshyatami kachamushaq. Saynöpis contraykikuna yaykamurmi ushakäsiyäshunki.
26<< <Muchuyman churaptïmi chunka warmikuna juk tulpalachöna yanukuyanqa. Saymi ichik ichikla qarayäshuptiki pachaykikunapis juntanqasu.
27<< <Sayno castigaykaptïpis mana cäsukamar nishqäkunata manakaqman churayaptikiqa 28rabyashpä jusalikuyashqaykipita qanchis kuti mas fiyupami castigayäshayki. 29Pasaypa mikanaywanmi warmitapis olqutapis surikikunata mikuyanki. 30Ïdulukunata adorayänaykipaq sharkasiyashqayki altarkunatapis juchusirmi ushashaq. Inciensu qoshnisikuyänayki altarkunatapis pakirmi ushashaq. Qamkunata wanurasirmi ïduluykikuna jananman ayaykikunata jitarishaq. Fiyupa rabyanäsiyämashqaykipitami sayno ushakäsiyäshayki. 31Markaykikunatapis raqälatanami kachaykushaq. Altarnikikunatapis juchusirmi ushakäsishaq. Sacrificiuta rupasiyaptikipis manami chaskiyäshaykisu.
32<< <Kikïmi markaykikunata pasaypa ushakäsishaq. Ushakäsishqäta rikarmi contraykikunapis markaykikunaman taq shamur pasaypa mansakash rikakuyanqa. 33Wakinnikitami espädawan wanusiyäshayki y wakinnikitanami juklä nacionkunaman qarquyäshayki. Sayno ruraptïmi nacionnikipis pasaypa sunyaq rikakunqa. Markaykikunapis mansariypaq raqälami quëdayanqa. 34Chakraykikunata jamasiyänaykipaq nikaptïpis mana jamasiypa muruyashqaykipitami contraykikunapa nacionnincho kayashqaykiyaq chakraykikunapis jamanqa. 35Saynöpami mana jamasiypa muruyashqaykipita chakraykikuna jamanqa.
36<< <Kawaykar quëdarpis contraykikunapa nacionnincho pasaypa mansa mansalami kawayanqa. Saymi ima qashraraptilanpis espädawan runa qatikachaykäyäshushqaykita yarpar qeshpiyanki. Qeshpiykäyashqaykichömi fiyupa mansariylawan wakinnikiqa wanuyanki. 37Pipis mana qatikachaykäyäshuptikimi guërrapita qeshpiykaqno takanakurraq qeshpiyanki. Manami mayqaykipis contraykikunata ichipayta kamäpakuyankisu. 38Juklä nacionkunachömi wanuyankipis. Saynöpis contraykikunapa nacionninchömi ushakäyanki. 39Mana cäsukayämashqaykipitami contraykikunapa nacionnincho kawaykar quëdaq surikikunapis wanur ushakäyanqa.
40-41<< <Contraykikunapa nacionninman qarquptïmi tantiyakuyanki kikikikuna y taytaykikuna conträ sharkur jusayuq kayashqaykita. Sayno tantiyakur perdonta manakayämaptikiqa 42Jacobwan,#Gén. 28.13-14. Isaacwan,#Gén. 26.3-4. Abrahamwan#Gén. 17.7-8. pactu rurashqäta yarpäshaqmi. Saynölami chakraykikunapaqpis yarpäshaq. 43Chakraykikunata mana jamasiypa muruyashqaykipitami juklä nacioncho täyashqaykiyaq chakraykikuna jamanqa. Mana cäsukamar jusalikuyashqaykipita y leynïkunata mana cumpliyashqaykipitami pasaypa nakayanki.
44<< <Sayno kaptinpis unay aylluykikunawan pactu rurashqäta manami qonqäshaqsu. Noqa Tayta Diosniki karmi kachapäshaqsu lapaykita ushakäsiyäshunaykita. 45Saypa trukanqa unay aylluykikunawan pactu rurashqäta yarparmi qamkunata yanapäyäshayki. Say pactuta rurarmi unay aylluykikunapa Diosnin kanäpaq wakin nación runakuna rikaykäyaptin Egiptupita jorqamurqä. Noqami Tayta Dios kaykä> >>.
46Sayno nirmi leyninkunata, mandamientunkunata y yachasikuyninkunatapis Israel runakunata Moiséswan Sinaí jirkacho Tayta Dios wilakasirqan.
Actualmente seleccionado:
Levítico 26: qvhB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.
