Levítico 25

Chakrata jamasiyänanpaq nishqan

1Sinaí jirkachömi Moisésta Tayta Dios nirqan: 2<<Israel runakunata niy: <Tayta Dios qoykuyäshunaykipaq kaykaq nacionman charqa payta cäsukur chakrata jamasiyanki. 3Soqta watami chakrakunata muruyanki. Üva plantakunatapis soqta watalami rämapar wayuyninta palayanki. 4Qanchis kaq watachöqa Tayta Diosta cäsukur chakraykikunata jamasiyanki. Say wataqa ama imatapis muruyankisu ni üva plantakunatapis rämapäyankisu. 5Shiwa winamuq trïgutapis ama shuntayankisu. Rämapäni wayuq üvatapis ama palayankisu. Say wataqa chakra jamakunqa. 6Mana pirwayaptikipis y mana churayaptikipis shiwa winamuqkuna y rämapäni wayuq üvakunami mikuyänaykipaq aypanqa. Saynöpis aypanqa ashmayniki warmipis olqupis mikuyänanpaq, minkaynikikuna mikuyänanpaq y qamkunacho taq jäpa runakuna mikuyänanpaqpis. 7Uywaykikuna y jirka uywakuna mikuyänanpaqpis aypanqami.#Éxo. 23.10-11.

Jubileo wata imano kananpaq nishqan

8<< <Yupayanki chusku chunka esqun (49) watata. 9Say watakuna päsarkuptinmi qanchis kaq killa chunka junaqcho cornëtata maysaychöpis tukasiyanki. Say junaqmi Israel runakuna purificash kayänanpaq kaq junaq#Lev. 16. kanqa. 10Say junaqmi qalaykunqa sagrädu Jubileo wata. Jubileo wata kaptinmi lapanpis ashmay kayashqanpita ayllunkunaman librina kutikuyanqa. Pï runapis chakranta rantikush karqa chakranta shuntakunqanami. Cada pisqa chunka (50) watachömi sayno kanqa.

11<< <Say wata qamkunapaq Jubileo wata kaptin chakraykikunata ama muruyankisu. Ni shiwa winamuq trïgutapis pirwayänaykipaq ama shuntayankisu. Rämapäni wayuq üvakunatapis churayänaykipaqqa ama palayankisu. 12Say wataqa sagrädu kar qamkunapaq Jubileo watami kanqa. Mikuytapis mikuyanki chakraykikunacho shiwa wayushlanta y rämapäni üvakuna wayushlantami.

13<< <Say Jubileo watami rantikuyashqan chakrankunata lapanpis shuntakuyanqa. 14Sayno kaptinqa manaraq Jubileo wata chämuptin pipis chakrata rantir o rantikurqa aykacho rantikunanpaqpis shumaq yarpachakusun. Runa mayinta aläpa chanincho pipis rantikunmantaq. 15Jubileo watacho chakrata kutisinanpaq ayka wata pishiykashqantapis yupaskir rantiq runa preciunta päganqa. Rantikuq kaqpis preciunta churanqa ayka kuti chakrata murunanpaq kashqantapis yupaskir. 16Aska wata murunanpaq kaptinqa masmi chanin kanqa. Walka watalana murunanpaq kaptinqa mënusmi chanin kanqa. Ayka wata murunanpaq kashqantapis yupaskirmi chakrata rantikunqa.

17<< <Tayta Diosta mansapakur runa mayikita ama engañayankisu. Noqami qamkunapa Tayta Diosniki kä. 18Leynïkunata cäsukur nishqäkunata cumpliyanki. Cumpliyashpaykiqa nacionnikicho alimi kawayanki. 19Chakraykikunapis ali wayuptin pacha junta mikurmi jawkala kawayanki.

20<< <Qamkuna yarpachakur capazmi niyankiman: <<Qanchis kaq watacho mana murupakurqa y mikuyta mana shuntakurqa ¿imataraq mikushun?>> 21Saypita ama lakikuyankisu. Soqta kaq watacho chakrayki ali wayunanpaqmi bendicionnïta churamushaq. Saymi cosechar saysikata shuntayanki kimsa wata cosechar shuntayänaykipaq kaqtano. 22Saymi soqta kaq watacho pirwayashqayki aypanqa puwaq kaq watachöpis mikuyänaykipaq. Saynölami murupakuyashqayki poqumushqanyaq esqun kaq watacho mikuyänaykipaqpis maran aypanqa>.

Rantikuyashqan chakranta y wayinta shuntakuyänanpaq nishqan

23<<Chakraqa noqapami kaykan. Qamkunaqa qorpanölami taykäyanki. Saymi rantikuyashqayki chakra yupash watala rantiqpa makincho kanqa. 24Rantiyashqayki chakrata rantikuyta munarqa punta kaq duëñunta munasiyanki.

25<<Pipis pasaypa muchuq kar rantikushqan chakrata shuntayta mana kamäpakuptinqa legïtimu kaq ayllun rantinqa.#Rut 2.20; 4.1-10. 26Chakranta rantinanpaq pïninpis mana kaptinqa shuntakunanpaq punta kaq duëñunmi qellayta puestunqa. 27Nirkur rantikuyta munaq runata qellayninta kutisinqa Jubileo wataman chänanpaq ayka wata pishishqantapis cuentata jorquskir. Saynöpami chakranta shuntakunqa. 28Chakranta shuntakunanpaq qellayta mana aypäsiptinqa Jubileo wata chämushqanyaqmi rantiqpa makilancho kakunqa. Say wata chämuptinnami punta kaq duëñun shuntakunqa.

29<<Pipis murallash markacho wayinta rantikuykur shuntakuyta munarqa juk watalami tiempu kanqa shuntakunanpaq. 30Watayaq wayinta mana shuntaptinqa rantiqpaq y paypita miraqkunapaqnami kanqa. Jubileo wata chämuptinpis manami shuntanqanasu. 31Muralläni markakunacho kaq wayikunatami isanqa chakrata shuntashqannöla Jubileo wata chämuptin punta kaq duëñun shuntakunqa.

32<<Levitakunaqa markancho rantikuyashqan wayinta imaypis shuntakuyanqa. 33Shuntakuyta munaptinqa wayinta rantiq runa Jubileo wata chämuptin kutisinqa. Levitakunapaqa markancho wayilanmi herencian kaykan. Israel nacioncho paykunapaq manami mas ima herencianpis kansu. 34Levitakunapa markankunacho uysha misikuyänanta ama rantikuyanqasu. Sayqa paykunapami imaypis kanqa.

Pobrikunata yanapäyänanpaq nishqan

35<<Mayqan Israel mayikipis pasaypa muchuyman char yanapänaykipaq ruwakushuptiki yanapäyanki. Jäpa runakunata ashmayashqaykino paykunatapis ashmayanki.#Deut. 15.7-8. 36Imata rantikurpis aläpa chaninchöqa ama rantikuyankisu. Qellayta manarpis wachayninta ama manayankisu. Saypa trukanqa mansapakamar markaykikunacho jawka täyänanpaq Israel mayikita yanapäyanki. 37Yapaymi nï: Qellayta manarqa wachayninta ama manayankisu. Mikuyta rantikurpis aläpa chanintaqa ama cobrayankisu.#Éxo. 22.25; Deut. 23.19-20. 38Egiptupita jorqamuq Tayta Diosnikimi kä. Qamkunata jorqamushkä Canaánta qoykunäpaq y Diosniki kanäpaqmi.

39<<Israel mayiki muchuyman char ashmayniki kananpaq yaykuptin ama ashmaytanöqa arusiyankisu. 40Saypa trukanqa arupakuqtanöla arusiyanki y qorpatanöla rikayanki. Jubileo watayaqlami arupäyäshunki. 41Saypitaqa librinami surinkunawan juntu chakranman y ayllunkunaman kutikunqa. 42Israel runakunaqa ashmaynïmi kaykäyan. Noqata sirviyämänanpaqmi Egiptupita jorqamushkä. Saymi Israel mayikikunata ashmay kayänanpaq rantikuyankisu. 43Tayta Diosniki kaptï mansapakamar Israel mayikikunata ama nakasiyankisu.

Ashmayyuqkunapaq yäsikuy

44<<Warmipis olqupis ashmayniki kananta munarqa nawpaykikunacho kaykaq nacionkunapita rantiyanki. 45Saynöpis ashmaynikikuna kayänanpaq rantiyanki qamkunacho taq jäpa runakunata y nacionnikicho yuriq surinkunata. 46Wanushpaykiqa surikikunata sirvinanpaqpis kachapaykuyanki. Paykunami imaypis sirviqninkuna kayanqa. Israel mayikitami isanqa nakasiyankisu ni ashmaynikipaq sararäkuyankisu.#Éxo. 21.2-6; Deut. 15.12-18.

47<<Qamkunacho taq jäpa runa rïcuyaptin y Israel mayiki muchuyman chashpan say rïcu runapa ashmaynin kananpaq rantikuptinqa 48Israel mayikipa derëchun kaykanmi ayllunkuna pägaykur jorqunanpaq. Sayno jorqunman wawqin, 49tiyun, prïmun o mayqan legïtimu ayllunpis. Qellaynin kaptinqa kikin ashmaypis pägaykur libri yarqukunqa. 50Libri kananpaq yarqukuyta munar patronninwan cuentata jorqunqa Jubileo watapaq ayka wata pishiykashqantapis. Say pishiykaq watakunapita patronninta päganqa jornal ayka kashqantapis cuentata jorquskirmi. 51Jubileo wata chämunanpaq ayka wata pishishqan tupumi patronninta päganqa. Aska wataraq pishiptinqa mastami päganqa. 52Mënus watalana pishiptinqa mënustami päganqa. Saynöpami mana arupashqan kaq watakunapita päganqa. 53Patronqa say ashmayninta minkaytanöla mana nakasiypa ali rikanqa.

54<<Ashmay kananpaq yaykuq runa patronninta imanöpapis pägayta mana kamäpakurqa Jubileo wata chämushqanyaqmi shuyaranqa. Say wata chämuptinnami mana pägaypa surinkunawan juntu libri yarqukunqa. 55Manami pipapis ashmaynin kayänanpaqsu Israel runakunata Egiptupita jorqamushkä, sinöqa noqata sirviyämänanpaqmi. Noqami Tayta Diosniki kaykä.

Actualmente seleccionado:

Levítico 25: qvhB

Destacar

Copiar

Comparar