Ester 6
6
Haman mott Mordechai ieren
1Dee Nacht kunn de Kjennich nich schlopen, un hee säd, daut see de Bieekja von daut Rikj holen sullen un am doavon väaläsen. #(1 un 2) Est 2,21-23 2Un aus see doa lausen, lausen see en de Jeschicht, woo Mordechai emol daut haud opjedakjt, daut Bigtan un Teresch, twee Wajchta en däm Kjennich siene Woninj, däm Kjennich hauden wult ombrinjen. 3Un de Kjennich fruach: Waut vonne Aunerkjanunk ooda Beloonunk hab wie Mordechai fa daut jejäft? Däm Kjennich siene Deena säden: Doa es noch nienich waut fa am jedonen worden. 4Un de Kjennich fruach: Wäa es doa oppem Hoff? Nu troff sikj daut, daut Haman jrod oppem Hoff jekomen wia, om däm Kjennich auntoräden von sienen Plon Mordechai opp dän Gauljen to henjen, woone hee uzhent fa am jebut haud. #Est 5,14 5De Deena säden toom Kjennich: Haman steit oppem Hoff. Brinjt am häa, velangd de Kjennich. 6Aus Haman nenn kjeem nom Kjennich, säd de Kjennich: Waut saul ekj met soonen Mensch doonen däm de Kjennich ieren well? Haman docht: Wäm wudd de Kjennich mea ieren wellen aus mie? 7Un hee säd: Fa däm Maun, däm de Kjennich ieren mucht, 8sullen Kjleeda jebrocht, dee ons Kjennich drajcht, un een Pieet, wua de Kjennich met ritt, un oppem Kopp von daut Pieet sull een besondasch schmocka Toom sennen, soo aus bloos ons Kjennich sien Pieet drajcht. #Dan 5,29 9Dan lot eent von däm Kjennich siene hechst aunjestalde Mana, däm Maun, wäm de Kjennich ieren well, biem auntrakjen bedeenen un dan am opp een Pieet derch de Gaussen vonne Staut leiden. Un ver däm Maun lot am lud roopen: Dit es waut jedonen woat met eenem, däm de Kjennich ieren well. #1Mo 41,42-43 10Un de Kjennich säd to Haman: Dan go du nu fuaz un hol soone Kjleeda un soon Pieet aus du jesajcht hast, un aul daut waut du väajeschloagen hast, un doo daut fa Mordechai däm Jud, eenen von de Beaumte em Rikj. Lot nuscht von daut ut, waut du väajeschloagen hast.
11Haman jinkj de Kjleeda un daut Pieet holen, un hee bedeend Mordechai biem auntrakjen. Dan leid hee daut Pieet delenjd de Gaussen en de Staut un roopt emma: Dit es waut de Kjennich fa soonem deit, wäm hee ieren well. 12Mordechai jinkj dan wada trigj no sien Aumt fa däm Kjennich. Haman oba bedakjt sien Jesecht, spood sikj no Hus to komen un jrämd sikj sea. 13Haman vetald Seresch, siene Fru, un aul siene Frind, waut doa aules jeworden wia. Un dise Rotjäwa un siene Fru säden: Wan dis Mordechai, met wäm die daut soo scheef jegonen es, een Jud es, dan woascht du nich de äwahaunt äwa am kjrieen. Du woascht die dan bestemt enne Grunt ranen.
14Aus see noch unja sikj vetalden, kjeemen däm Kjennich siene Deena un neemen Haman bosich no daut Gaustmol, daut Ester reedjemoakt haud. #Est 5,8
Actualmente seleccionado:
Ester 6: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
