Ester 2
2
De Kjennich nemt Ester to Fru
1Om eene jewesse Tiet, aus däm Kjennich sien Oaja sikj aul jestelt haud, kunn hee de gaunze Sach doch nich vejäten, beides waut Waschti jedonen haud, un waut hee von ar velangt haud. 2Dan schluagen siene Deena väa, daut hee sull schmocke Mejales sieekjen loten. 3Hee sull Rejierungs Beaumte von aule Prowinsen aunstalen, daut see de Mejales no Susa brinjen wudden. Doa, wua däm Kjennich siene Frues wieren, wudden dee unjajebrocht woaren un unja Hegai, eena von däm Kjennich siene jeschnädne Deena, siene oppsecht komen. Hegai wudd dee dan jäwen, waut see brukten om sikj fa däm Kjennich schmock to moaken. 4Dan kunn de Kjennich sikj eene von dee nämen, dee am daut baste jefoll, un dee aunstalen aus Kjennijin en Waschti äare Städ. Däm Kjennich jefoll dän Rot un hee leet däm utfieren.
5Doa wond to dise Tiet een Jud en de Hauptstaut Susa. Dee wia vom Staum Benjamin un hee heet Mordechai. Sien Voda un siene Väavodasch wieren Jair, Schimi un Kisch. #1Sam 9,1 6Mordechai wia eent von dee, woone de babelonischa Kjennich Nebukadnezar haud en Jerusalem loten faustnämen, un en de Jefangenschoft nämen, aus Jechonja, de Kjennich en Juda, uk faustjenomen wort. #2Kjen 24,15 7Dis Mordechai haud eene Nicht, dee hee hanjenomen haud, no däm daut äare Elren beid jestorwen wieren. Dise Nicht heet Ester, oba äa hebräischa Nomen wia Hadassa. See haud een feinet Jeschekj un leet schmock. #Est 8,1 8Aus däm Kjennich siene Väaschreften wiet un breet bekaunt jemoakt wieren, worden sea väl Mejales no de Hauptstaut, Susa jebrocht. Ester wia eene von dee, waut nom Kjennich sienen Paulaust jebrocht worden, un unja Hegai siene Oppsecht kjeemen. Hegai haud de Oppsecht äwa däm Kjennich siene Frues. 9Am jefoll Ester fuaz, un hee kjeem ar entjäajen doamet, daut hee fuaz aunfunk ar de Behaundlunk un daut Äten to jäwen, waut ar wudd halpen toom sea schmock loten. See kjrieech dan uk noch säwen Mejales von däm Kjennich siene Deena, toom ar bedeenen. Ester un dise säwen worden uk de baste Städ jejäft mank däm Kjennich siene Frues. 10Ester leet doa kjeenem weeten, von woon Volkj see häastaumd, wiels Mordechai daut soo bestalt haud. 11Mordechai jinkj jieda Dach bie daut Jebied vebie, wua de Frues äare Stowen wieren, om to seenen woo Ester daut jinkj, un waut noch met ar wort.
12Ea de Mejales aun de Rieej kjeemen, daut see durwen nom Kjennich komen, musten see fa twalf Moonat besondasch bedeent woaren, soo daut see wudden sea schmock loten. De ieeschte sas Moonat worden see met Mirreneelj enjeräwen, un dee latste sas met Balsameelj un veschiedne aundre Eelj, waut Frues brucken toom schmock loten. 13Wan eene Mejal nom Kjennich gonen kunn, kunn see selfst sajen, waut see sikj auntrakjen wudd, un woo see sikj reed moaken wull. 14Ver däm Kjennich komen meend, daut see jäajen Owent worden em Paulaust nenn jebrocht, un zemorjes trigj kjeemen. Wan see trigj kjeemen, worden see no een aundret Poat von de Jebieda, wua de Frues bleewen, jebrocht. Hia kjeemen see unja Schaaschgas, uk een jeschnädna, siene Oppsecht. Eene Mejal wudd nich toom tweeden mol aun de Rieej komen nom Kjennich to gonen, buta wan am dee besondasch jefoll un hee biem Nomen no ar froagen deed.
15Met de Tiet kjeem Ester, dee Abihajil siene Dochta wia, uk aun de Rieej, daut see verem Kjennich kjeem. See haud aus Kjint äare Elren veloaren un Mordechai haud ar hanjenomen un aus eene Dochta jefläacht. Ester äa Voda, Abihajil, wia Mordechai sien Onkel. Ester fruach no nuscht besondret to dän Owent aus see verem Kjennich durf un muak sikj bloos krakjt soo reed aus Hegai väajeschloagen haud. Een jiedra docht, ar leet et sea schmock. 16Aus see nom Kjennich jebrocht wort, wia daut de 10. Moonat, de Moonat Tebet, en daut 7. Joa daut Ahasveros Kjennich wia. 17Däm Kjennich jefoll Ester dolla aus sest irjent eene von de Frues. Hee freid sikj soo to ar, daut hee ar de Kroon fa de Kjennijin oppsad. Soo kjeem daut, daut see Kjennijin wort en Waschti äare Städ. 18Aus sikj dit aula soo romneem, stald de Kjennich een grootet Fastmol aun, wuatoo hee aul de huach aunjeseene Menschen un Huachaunjestalde enloden deed. Dit wia een Fastmol om Ester to ieren. De Dach wort en aule Prowinsen aus een Heljedach jefieet, un de Kjennich jeef däm Dach veschiedne Jeschenkja ut, soo aus mau een Kjennich wudd.
19Aus doa toom tweeden mol Junkfrues toopjebrocht worden, wia Mordechai een Rejierungs Beaumta. 20Ester haud uk de gaunze Tiet nich aunjejäft von woon Volkj see wia, wiels Mordechai ar säd, daut see daut emma sull stell hoolen. See horcht noch emma krakjt soo no Mordechai aus see haud aus see oppwoss. 21Jrod en dee Tiet aus Mordechai sien Aumt hilt, worden twee beaumte Mana, Bigtan un Teresch, dee aus Wajchta deenden, doll äwa däm Kjennich. See plonden woo see am en siene Woninj ombrinjen wudden. #(21-23) Est 6,1-2 22Aus Mordechai dit enwort, leet hee de Kjennijin Ester doavon weeten. Ester leet däm Kjennich uk fuaz weeten, waut Mordechai utjefungen haud. 23Aus de Norecht nojesocht wort, fungen see daut et aula stemd. Doaropp worden de beid Beaumte opp däm Gauljen jehongen. Dise gaunze Jeschicht wort verem Kjennich en de Bieekja von sien Rikj nenn jefieet.
Actualmente seleccionado:
Ester 2: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
