2. Chronik 33
33
Woo Kjennich Manasse framde Jetta deend, un siene Strof
(2Kjen 21,1-9)
1Manasse wia twalf Joa oolt, aus hee Kjennich wort; un hee rejieed 55 Joa en Jerusalem. 2Un hee deed, waut däm Harn schlajcht jefoll, un läwd no de oppscheiselje Sitten von de framde Velkja, waut de Har ver de Israeliten vedräwen haud. #5Mo 18,9 3Hee bud de huage Opfastäden wada opp, waut sien Voda Hiskia vestieet haud, un recht Aultoaren fa dän Aufgott Baal opp, un muak Ascherabilda un bäd de Stierns aum Himmel aun un brocht dee Opfa. #2Kjen 18,4 4Em Tempel von Jerusalem, däm de Har fa aule Tieden to Wonstäd fa sienen Nomen bestemt haud, stald hee Aultoaren fa framde Jetta opp. #5Mo 12,5.11; 1Kjen 9,3 5Un hee bud Aultoaren fa daut gaunze Häa von Stierns en beid Väahäw aum Tempel. 6Un hee leet siene ieejne Säns em Ben Hinnom Tol aus Opfa vebrennen, un jeef acht opp Tieekjens un Voageljeschrech un dreef Zaubarie. Hee bestald sikj soone, dee Jeista beschwieren un Tieekjens dieden kunnen, un deed väl, waut däm Harn schlajcht jefoll, om däm sien Oaja äwa sikj to brinjen. #2Chr 28,3; 3Mo 20,6 7Hee leet uk een Gottesbilt moaken un em Gotteshus oppstalen, en daut Hus, wuavon de Har to David un sienen Sän Salomo jesajcht haft: En dit Hus un en Jerusalem, de Staut, waut ekj ver aule Stam von Israel utjewält hab, well ekj mienen Nomen fa aule Tieden wonen loten. 8Wan see mie jehorchen un aule Jebooten un Väaschreften en mien Jesaz befoljen, waut ekj an derch Moses jejäft hab, dan woa ekj daut nich tooloten, daut see ut daut Launt vedräwen woaren, waut ekj äare Vodasch toojesajcht hab.
9Oba Manasse veleid de Enwona von Juda un Jerusalem, daut see mea beese Sachen dreewen aus de Velkja, waut de Har ver an utjerot haud. 10Un wan de Har to Manasse un sien Volkj räden leet, horchten see doa goanich no. 11Doawäajen leet de Har de Befälshaba von däm Kjennich von Assur met äare Truppen jäajen an komen. See neemen Manasse faust un schluagen eenen Hoaken derch siene Kjeew un brochten am met Kjäden jebungen no Babel.
De Kjennich Manasse deit sikj ver Gott deemootjen
(2Kjen 21,17-18)
12Aus Manasse en dee vetwiewelde Loag wia, prachad hee däm Harn, sienen Gott, un deed sikj unja siene Vodasch äaren Gott deemootjen 13un prachad om Metleet. Un de Har erhieed sien Jebäd un brocht am wada trigj no Jerusalem en sien Kjennichrikj nenn. Doa sach Manasse daut, daut de Har de werkjelja Gott es. #1Kjen 18,39
14No dit leet hee de butaschte Mia aun de Davidstaut sea huach buen. Dee jinkj aun de Gihon Kjwalen vebie velenjd daut Eewa vom Kidron Tol, wua daut nom Feschpuat jeit, rom dän Ofel rom. Un hee sad en aule fauste Städa von Juda Kjrichsfiera en. 15Hee deed uk aule framde Jetta un daut Gottesbilt ut däm Harn sienen Tempel, waut hee doa oppjestalt haud, un aule Aultoaren, waut hee opp dän Tempelboajch un en Jerusalem jebut haud, wajchriemen un ut de Staut rutschmieten. 16Un hee bud däm Harn sienen Aultoa wada opp un opfad doabowen Dankopfa un Heelopfa un säd to de Lied von Juda, daut see däm Harn, Israel äaren Gott, deenen sullen. 17Oba daut Volkj opfad uk noch wieda opp de Opfastäden em Launt, oba doch auleen däm Harn, äaren Gott.
18Waut noch mea von Manasse to sajen es, woo hee to Gott bäd un aules, waut de Profeeten en däm Harn, Israel äaren Gott, sienen Nomen to am räden deeden, daut es em Buak von de Kjennichs von Israel notoläsen. 19Daut Jebäd, waut hee aun Gott rechten deed, un woo Gott am erhieed, un aul siene Sinden un schlajchte Doten un de Städen, wua hee Opfastäden bud un Ascherabilda un Jettabilda oppstald, ver däm aus hee sikj ver däm Harn deemootjen deed, steit en de Jeschichten von de Profeeten jeschräwen. 20Aus Manasse storf, wort hee bie sienen Paulaust begroft. Un sien Sän Amon wort Kjennich en siene Städ.
De Kjennich Amon
(2Kjen 21,19-24)
21Amon wia 22 Joa oolt, aus hee Kjennich wort, un rejieed twee Joa en Jerusalem. 22Un Amon deed, waut däm Harn schlajcht jefoll, krakjt soo aus sien Voda Manasse jedonen haud. Amon brocht Opfa fa aule Jettabilda waut sien Voda Manasse jemoakt haud, un deend dee. 23Oba hee deed sikj nich ver däm Harn deemootjen, soo aus sien Voda Manasse haud, hee deed bloos emma jratre Schult opp sikj loden. 24Schlieslich muaken siene Hoffbeaumten eene Veschwierunk jäajen am un muaken am en sienen Paulaust doot. 25Daut Volkj em Launt schluach oba uk aul dee doot, waut de Veschwierunk jäajen däm Kjennich Amon jemoakt hauden. Un daut Volkj muak sienen Sän Josia toom Kjennich en siene Städ.
Actualmente seleccionado:
2. Chronik 33: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.