1. Kjennichs 15
15
De Kjennichs Abija un Asa en Juda
(2Chr 13,1-23)
1Abija wort Kjennich en Juda aus Jerobeam, Nebat sien Sän, en sien 18. Joa aus Kjennich en Israel wia. #(1-8) 2Chr 13,1-23 2Hee wia Kjennich fa dree Joa en Jerusalem. Siene Mutta heet Maacha, see wia Abischalom siene Dochta. 3Hee eewd aul de Sinden, dee sien Voda ver am deed. Hee läwd nich met sien gaunzet Hoat, soo aus däm Harn sienen Gott daut jefoll, aus sien Staumvoda David jedonen haud. 4Doch om David sient haulwen stald de Har, sien Gott, Abija sienen Sän aun aus Kjennich en Jerusalem no am, un leet daut nich too, daut Jerusalem vedorwen wort. #1Kjen 11,36 5De Har deed dit wiels David daut jedonen haud, waut däm Harn jefoll, un hee wia am en sien gaunzet Läwen jehuarsom jewast, buta en de Sach met Uria dän Hetita. #2Sam 11,1-27; 12,9 6De Kjrich, dee aul tweschen Rehabeam un Jerobeam aunjefongen haud, wort uk derch Abija siene gaunze Tiet wieda jefieet.
7Un daut äwaje von de Jeschicht von Abija es en daut Buak von de Jeschicht von de Kjennichs en Juda jeschräwen. Un doa wia Kjrich tweschen Abija un Jerobeam. 8Un aus Abija storf, begrowden see am en de Davidstaut met siene Vodasch. Un Abija sien Sän Asa wort Kjennich no am.
9Asa wort Kjennich en Juda aus Jerobeam en sien 20. Joa aus Kjennich en Israel wia. 10Hee wia fa 41 Joa Kjennich en Jerusalem. Siene Grootmutta wia Maacha, Abischalom siene Dochta. 11Un Asa deed waut däm Harn jefoll un läwd soo aus sien Staumvoda David jedonen haud. 12Hee muak een Enj em Launt met de Huara em Tempel un riemd aul de Jetta opp dee sien Voda un Grootvoda oppjestalt hauden. #2Kjen 23,7; 2Chr 14,1-4 13Hee sad Maacha, siene Grootmutta, tosied daut see nich mea de Kjennichsmutta sennen kunn, wiels see haud een oppscheiseljet Ascherabilt moaken loten. Asa bruak daut Bilt dol un vebrend daut en däm Kidron Riefa. #(13 un 14) 2Chr 15,16-18 14Doch riemd hee de huage Opfastäden oppe Boaj nich opp. Sien Hoat wia derch sien gaunzet Läwen emma tru toom Harn. #1Kjen 22,44 15Hee brocht de goldne un selwane Sachen, dee sien Voda enjeweit haud, en däm Tempel nenn, un uk de Sachen, dee hee enjeweit haud.
16Un doa wia Kjrich tweschen Asa un dän israelitischen Kjennich Bascha soo lang aus see läwden. #(16-22) 2Chr 16,1-6 17Bascha, de Kjennich en Israel, jinkj jäajen Juda un bud de Staut Rama, soo daut aun dee Sied wua Asa wia, kjeena sull nenn ooda rut gonen. 18Dan neem Asa aul daut Golt un Selwa, daut en de Kaus en däm Tempel un en däm Paulaust wieren, un schekjt daut met siene aunjestalde no Damaskus no Ben Hadad, dän Kjennich von Aram. Ben Hadad wia Tabrimmon sien Sän un een Grootsän aun Hesjon. Un Asa schekjt am dise Norecht: #2Kjen 12,19 19Wellen ekj un du eenen Bunt moaken, soo aus mien Voda un dien Voda hauden. Ekj jäw die dit Selwa un Golt, wan du woascht dienen Bunt met dän israelitischen Kjennich Bascha oppjäwen, soo daut hee siene Soldoten von mie mott trigjnämen. 20Ben Hadad horcht no Asa, un schekjt siene aunjestalde jäajen de Städa en Israel. See neemen Ijon, Dan, Abel Bet Maacha, daut gaunze Kinneret, un daut gaunze Naftali en. #2Kjen 15,29 21Aus Bascha daut hieed, hieed hee opp en Rama to buen, un wond wada en Tirza. 22Dan velangd Asa von aulem en Juda, onen Utnom, daut see de Steena un daut Holt von Rama holden, daut Bascha doa toom buen jebrukt haud. Un Asa bud Geba en Benjamin un Mizpa opp met dee Sachen.
23De äwaje Jeschichten von Asa, von woo stoakj hee wia, von daut waut hee aules deed, un von de Städa dee hee oppbud, dee sent aula en daut Buak von de Jeschicht von de Kjennichs en Juda jeschräwen. Aus Asa ieescht oolt wort, leet hee aun siene Feet. #(23 un 24) 2Chr 16,11-14 24Aus Asa storf, begrowden see am en de Davidstaut met siene Vodasch. Un Asa sien Sän Joschafat wort Kjennich en siene Städ. #1Kjen 22,41
De Kjennichs Nadab un Bascha von Israel
25Nadab, Jerobeam sien Sän, wort Kjennich en Israel aus Asa en sien tweedet Joa aus Kjennich en Juda wia. Nadab wia Kjennich fa twee Joa, #1Kjen 14,20 26un deed waut däm Harn schlajcht jefoll. Hee deed soo aus sien Voda jedonen haud un läwd en de Sind met woone Jerobeam Israel haud sindjen moakt. #1Kjen 12,28-30 27Bascha, Ahija sien Sän, von däm Staum Isachar, plond jäajen Nadab, un schluach am doot. Dit wort aus daut gaunze Israel bie Gibbeton en de Filista Jäajent jeloagat wieren. #Jos 19,44 28Bascha schluach Nadab doot en daut dredde Joa daut Asa Kjennich en Juda wia. Un Bascha wort Kjennich en Nadab siene Städ. 29Aus Bascha Kjennich wia, brocht hee aule Nokomen von Jerobeam om. Hee leet kjeenen äwa, krakjt soo aus daut Wuat, woont de Har derch sienen Deena Ahija von Silo jesajcht haud. #1Kjen 14,10-11 30Daut wia soo wiels Jerobeam dän Harn, Israel äaren Gott, sien Oaja reizt met de Sinden dee hee deed un met woone hee Israel haud sindjen moakt.
31De äwaje Jeschicht von Nadab, un aules waut hee deed, es en daut Buak von de Jeschicht von de Kjennichs en Israel jeschräwen. 32Un Asa un Bascha, de Kjennich von Israel, kjriejden met eenaunda, soo lang aus see läwden.
33Bascha, Ahija sien Sän, wort Kjennich äwa Israel en daut dredde Joa daut Asa Kjennich en Juda wia. Hee wia 24 Joa Kjennich en Tirza. 34Däm Harn jefoll daut sea schlajcht soo aus hee läwd. Hee haundeld soo aus Jerobeam haud, un bleef en dee Sind dee hee daut Volkj doonen muak.
Actualmente seleccionado:
1. Kjennichs 15: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
