1. Kjennichs 1
1
Adonija ooda Salomo?
1Kjennich David wia sea oolt jeworden, un siene Deena deeden waut see kunnen om am tootodakjen, oba hee kunn sikj nich oppwoamen. 2Un siene aunjestalde Mana säden to am: Veleicht sull wie no eene Mejal sieekjen dee die, ons Kjennich, bedeenen un fläajen kunn. See kunn bie die ligjen daut du woam wieescht. 3Un see sochten aulawäajen en Israel no eene schmocke Mejal, un see fungen Abischag, von Schunem, un brochten ar no däm Kjennich. 4Daut wia eene schmocke Mejal un see fläajd däm Kjennich un besorjd am. Oba see hauden kjeen Jeschlajchtsvekjia. 5No däm daut Absalom doot wia, wia Adonija, David un Hagit äa Sän, däm Kjennich sien elsta Sän. Adonija neem sikj eemol väa, daut hee wull Kjennich woaren. Hee besorjd sikj een Kjrichswoagen un Pieed, un 50 Mana, dee om am wieren. #2Sam 3,4; 15,1 6David haud nienich en Adonija siene Sachen nenjefot ooda am wäajen irjent waut väajehoolen, un am leet daut goot. 7Hee jinkj uk met Joab, Zeruja äa Sän, räden un uk met Abjatar däm Priesta. Un dee unjastetten am un holpen am. #Jos 15,7-8 8Oba Zadok de Priesta, un Benaja, Jojada sien Sän, un Natan de Profeet, un Schimi un Rei, un David siene Wajchta unjastetten Adonija nich. 9Een Dach muak Adonija een Opfa von Schop, Ossen un Mastkjalwa bie dän Steen Sohelet, nich wiet von de Rogel Kjwal. Hee kroagd aul siene Breeda, David siene Säns, un uk däm Kjennich siene aunjestalde von Juda, daut see no daut Opfafast komen sullen. 10Oba hee kroagd nich Natan, däm Profeet, uk nich Benaja ooda de Wajchta, un hee kroagd uk nich sienen Brooda Salomo.
11Un Natan jinkj no Batseba, Salomo siene Mutta, un säd to ar: Hast aul jehieet daut Adonija, Hagit äa Sän, haft sikj toom Kjennich jemoakt? Un David, ons Har, weet doa nuscht om. 12Ekj wudd die tooroden, daut wan du dien Läwen un dienen Sän Salomo sien Läwen waut räakjenst, 13dan go oba fuaz no däm Kjennich David un froag am: Mien Har, hast du aus Kjennich mie nich faust vesproaken, daut mien Sän Salomo woat Kjennich sennen no die, un daut hee woat opp däm Troon setten? Wuarom es Adonija dan nu Kjennich? #1Chr 28,5-10 14Un wan du jeist met däm Kjennich räden, woa ekj uk noch doa nenn komen un die biestemmen. 15Dan jinkj Batseba en däm Kjennich siene Stow. Hee wia sea oolt, un Abischag von Schunem besorjd am. 16Un Batseba kjneed sikj ver däm Kjennich un hee säd to ar: No waut best du jekomen? 17Un see säd to am: Mien Har, du vespruakst mie emol met een Eit ver däm Harn dienen Gott, daut Salomo, mien Sän, sull no die Kjennich woaren un opp dienen Troon setten. 18Oba nu, mien Har un Kjennich, es Adonija Kjennich jeworden. Un du weetst doa nuscht om. 19Hee haft een Deel Ossen, Mastkjalwa un Schop jeopfat, un haft, mien Kjennich, aul diene Säns enjeloden, un uk Abjatar däm Priesta, un Joab dän Kommandaunt von de Armee. Oba Salomo haft hee nich enjelot. 20Un nu es daut opp to die, mien Har un Kjennich, daut du sajchst, wäa no die saul opp däm Troon setten. Aule Menschen en daut Launt wundren nu, waut du sajen woascht. 21Wan du, mien Har un Kjennich, nich sajchst ea du stoafst, dan woat daut soo loten aus wan ekj un Salomo jäajen die sent. 22Un ea see met däm Kjennich utjerät haud, kjeem Natan de Profeet doa uk nenn, 23un däm Kjennich wort jesajcht: Natan de Profeet es jekomen. Aus Natan bat ver däm Kjennich kjeem, kjneed hee sikj met daut Jesecht bat oppe Ieed ver däm Kjennich. 24Un Natan säd: Mien Har un Kjennich, hast du jesajcht daut Adonija no die saul Kjennich sennen un opp dienen Troon setten? 25Dee es vondoag gonen een grootet Opfa moaken von Ossen, Mastkjalwa un Schop, un haft aul diene Säns, mien Kjennich, doatoo enjeloden, un uk Joab, dän Kommandaunt von de Armee, un Abjatar däm Priesta. Un krakjt nu, äten un drinkjen dee doa un schrieen: Mucht Adonija lang Kjennich sennen. 26Oba ekj, dien Deena, un Zadok de Priesta, un Benaja, Jojada sien Sän, un dien Sän Salomo worden nich doatoo enjeloden. 27Hast du, mien Har un Kjennich, dit jedonen onen daut du diene Mana daut sätst, wäa sull Kjennich no die sennen?
28Un de Kjennich David säd: Lot Batseba noch emol bat hia komen. Un see kjeem un stunt ver däm Kjennich. 29Un de Kjennich vespruak opp eenen Eit: Soo secha aus de Har läft, dee mie ut jieda Trubbel jerat haft, 30ekj hab to die met een Eit ver däm Harn, dee Israel äa Gott es, vesproaken, daut dien Sän Salomo saul no mie Kjennich sennen. Dee saul en miene Städ opp däm Troon setten. Ekj woa daut vondoag kloa moaken. 31Dan kjneed Batseba sikj met äa Jesecht bat oppe Ieed ver däm Kjennich un säd: Mucht mien Har, de Kjennich David, opp emma läwen.
32Un David säd: Roopt Zadok dän Priesta, Natan dän Profeet, un Benaja, Jojada sien Sän daut see häa komen. Un dee kjeemen no däm Kjennich. 33Un de Kjennich säd to an: Nämt miene Mana aula met, un lot mienen Sän Salomo opp mienen ieejnen Mula rieden un got dän Wajch no Gihon. 34Un doa lot Zadok däm Priesta un Natan däm Profeet am aus Kjennich äwa Israel ensaulwen. Dan sell jie met de Trompeet blosen un sajen: Mucht Kjennich Salomo lang läwen. 35Jie sellen dan hinja am komen, wan hee kjemt opp mienen Troon setten. Salomo saul en miene Städ Kjennich sennen. Ekj hab am aunjestalt daut hee äwa Israel un Juda rejieren saul. 36Un Benaja, Jojada sien Sän, säd: Daut woa wie doonen. Mucht de Har, dee Gott fa mienen Harn un Kjennich, daut uk sajen. 37Soo aus de Har met mienen Harn un Kjennich jewast es, soo mucht hee uk met Salomo sennen. Mucht sien Rikj jrata sennen aus daut von mienen Harn, däm Kjennich David. 38Dan jinjen Zadok de Priesta, Natan de Profeet, un Benaja, Jojada sien Sän, un däm Kjennich siene Wajchta, un saden Salomo opp Kjennich David sienen Mula un brochten am no Gihon. #2Sam 8,18 39Un Zadok de Priesta neem doa dän Huarn met Eelj vom Zelt un saulwd Salomo en aus Kjennich. See blosden met de Trompeet, un aule Lied säden: Mucht Kjennich Salomo lang läwen. #1Chr 23,1; 29,22 40Un aulemaun jinkj am hinjaraun un see spälden opp äare Instrumenten un freiden sikj sea. Doa wia soo väl Jelud daut de Ieed doabie scheddad.
41Un Adonija un aul siene Jast hieeden daut Jelud, aus see met äa Fast foadich muaken. Un aus Joab de Trompeet hieed, säd hee: Waut bediet dis Klommua en de Staut? 42Ea hee utjerät haud kjeem Jonatan, Abjatar däm Priesta sien Sän. Un Adonija säd to am: Komm nenn. Du brinjst secha goode Norecht; du best een gooda Maun. #2Sam 15,27.36 43Un Jonatan säd to Adonija: Nä. Ons Har, de Kjennich David, haft Salomo toom Kjennich jemoakt. 44De Kjennich haft Zadok dän Priesta, Natan dän Profeet un Benaja Jojada sien Sän un uk siene Wajchta met am jeschekjt un Salomo haft opp däm Kjennich sien Mula jeräden. 45Un Zadok de Priesta un Natan de Profeet haben am bie Gihon aus Kjennich jesaulft. Nu sent see von Gihon no de Staut opptoo jegonen un de gaunze Staut schricht un freit sikj doatoo. Daut es wuarom du aul dit hieescht. 46Salomo sett nu opp däm Kjennich sien Troon. 47Oba waut du noch weeten sust, es daut aul däm Kjennich siene aunjestalde haben däm Kjennich Moot toojesproaken. See sajen: Mucht Gott Salomo sien Nomen noch jrata moaken aus dienen, un mucht hee sien Rikj jrata moaken aus dien Rikj. Un Kjennich David kjneed sikj opp sien Bad 48un säd: Ekj preis däm Harn, Israel äaren Gott, daut hee vondoag daut haft toojeloten daut eena von miene Säns opp mienen Troon setten deit, un daut ekj daut selfst jeseenen hab. 49Dan enjsten Adonija siene Jast sikj, un see veleeten, een jiedra opp sienen ieejnen Wajch. 50Un Adonija haud Angst fa Salomo. Hee jinkj no däm Aultoa un hilt sikj aun de Akjspetzen vom Aultoa.
51Un Salomo wort jesajcht, daut Adonija Angst fa Kjennich Salomo haud, daut hee sikj aun de Akjspetzen vom Aultoa hilt, un daut hee jesajcht haud, daut hee von Salomo een Eit hieren wull, daut hee am nich wudd met daut Schwieet aufschaufen. #1Kjen 2,28 52Un Salomo säd: Wan hee daut bewiesen woat daut hee ieeboa un tru es, dan saul nich een Hoa von sien Kopp faulen, oba wan hee daut nich es, dan saul hee stoawen. #2Sam 14,11 53Dan leet Salomo Adonija vom Aultoa holen, un Adonija kjeem un kjneed sikj ver Kjennich Salomo. Un Salomo säd to am: Go no dien Hus.
Actualmente seleccionado:
1. Kjennichs 1: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
