رِسَالَةْ تِيمُوتَاوُسْ التَّانِيَّة 1
1
الْفَصْلْ اللّْوّْلْ
السّْلَامْ
1مْنْ بُولُسْ، رَسُولْ الْمَسِيحْ يَسُوعْ بْمُرَادْ اللَّهْ، عْلَى حْسَابْ الْوَعْدْ دْيَالْ الْحَيَاةْ اللِّي عَنْدْنَا فْالْمَسِيحْ يَسُوعْ. 2لْتِيمُوتَاوُسْ وْلْدِي الْعْزِيزْ، النِّعْمَة وْالرَّحْمَة وْالْهْنَا مْنْ اللَّهْ الْآبْ وْالْمَسِيحْ يَسُوعْ رَبّْنَا.#الاعمال 16:1
بُولُسْ كَيْشَجّْعْ وْكَيْنَبّْهْ تِيمُوتَاوُسْ
3كَنْشْكَرْ اللَّهْ اللِّي كَنْعَبْدُه بْضَمِيرْ نْقِي، كِمَا كَانُو كَيْعَبْدُوهْ جْدُودِي، وْكَنْتّْفَكّْرْكْ دِيمَا فْصْلَاتِي لِيلْ وْنْهَارْ. 4وْمْلِّي كَنْتّْفَكّْرْ دْمُوعْكْ، كَنْشْتَاقْ نْشُوفْكْ بَاشْ يْعْمَرْ قَلْبِي بْالْفَرْحَة. 5وْكَنْتّْفَكّْرْ إِيمَانْكْ اللِّي مَا فِيهْشْ النِّفَاقْ، الْإِيمَانْ اللِّي كَانْ فْاللّْوّْلْ عَنْدْ جْدَّاتْكْ لَوْئِيسْ وْعَنْدْ مُّكْ أَفْنِيكَة، وْأَنَا مْتْيِقّْنْ بْلِّي عَنْدْكْ حْتَّى نْتَ.#الاعمال 16:1 6هَادْشِّي عْلَاشْ كَنْفَكّْرَكْ بَاشْ تْحْيِي الْمَوْهِبَة اللِّي عْطَاهَا لِيكْ اللَّهْ مْلِّي حَطِّيتْ عْلِيكْ يْدِّيَّ. 7حِيتْ اللَّهْ مَا عْطَانَاشْ رُوحْ الْحْشْمَة، وَلَكِنْ عْطَانَا رُوحْ الْقُوَّة وْالْمْحَبَّة وْالتَّحَكُّمْ فْالدَّاتْ.
8إِيوَا مَا تْحْشَمْشْ بَاشْ تْشْهَدْ لْرَبّْنَا، وْمَا تْحْشَمْشْ بِيَّ أَنَا اللِّي مْسْجُونْ عْلَى وْدُّه، وَلَكِنْ شَارْكْ مْعَايَ فْالْعْدَابْ عْلَى وْدّْ الْإِنْجِيلْ، وْتْوَكّْلْ عْلَى قُوَّةْ اللَّهْ 9اللِّي نْجَّانَا وْعَيّْطْ عْلِينَا بَاشْ نْكُونُو دْيَالُه، مَاشِي عْلَى حْسَابْ أَعْمَالْنَا، وَلَكِنْ عْلَى حْسَابْ الْمُرَادْ وْالنِّعْمَة دْيَالُه اللِّي عْطَاهَا لِينَا بْالْمَسِيحْ يَسُوعْ قْبَلْ الْبْدُو دْ الزّْمَانْ، 10هَادْ النِّعْمَة اللِّي بَانْتْ لِينَا دَابَا مْلِّي بَانْ الْمُنَجِّي دْيَالْنَا يَسُوعْ الْمَسِيحْ اللِّي غْلَبْ الْمُوتْ، وْنَوّْرْ الْحَيَاةْ الدَّايْمَة اللِّي مَا كَتْفْنَاشْ بْالْإِنْجِيلْ، 11اللِّي خْتَارْنِي بَاشْ نْخَبّْرْ بِيهْ وْدَارْنِي رَسُولْ وْمُعَلِّمْ.#1تيموتاوس 2:7 12وْعْلَى قْبَلْ هَادْ الْأُمُورْ كَنْتْعَدّْبْ. وَلَكِنْ مَا حْشْمَانْشْ، حِيتْ عَارْفْ بْشْكُونْ آمْنْتْ، وْمْتْيِقّْنْ بْلِّي هُوَ قَادْرْ يْحْفَضْ دَاكْشِّي اللِّي أَمّْنِّي عْلِيهْ حْتَّى لْدَاكْ النّْهَارْ. 13إِيوَا دِيرْ بْالْكْلَامْ الصّْحِيحْ اللِّي سْمَعْتِيهْ مْنِّي، فْالْإِيمَانْ وْالْمْحَبَّة اللِّي فْالْمَسِيحْ يَسُوعْ. 14حَافْضْ عْلَى الْأَمَانَة الْمْزْيَانَة اللِّي تّْعْطَاتْ لِيكْ بْالْعْوِينْ دْيَالْ الرُّوحْ الْقُدُسْ اللِّي سَاكْنْ فِينَا.
15رَاكْ كَتْعْرَفْ بْلِّي ݣَاعْ هَادُوكْ اللِّي فْبْلَادْ آسْيَا تّْخْلَّاوْ عْلِيَّ، وْمْنّْهُمْ فِيجَلُّسْ وْهَرْمُوجَانِسْ. 16وْكَنْطْلَبْ مْنْ الرَّبّْ يْنَزّْلْ الرَّحْمَة دْيَالُه عْلَى عَائِلْةْ أُونِيسِيفُورُسْ، حِيتْ بْزَّافْ دْ الْمَرَّاتْ رَيّْحْنِي وْعَمّْرُه مَا حْشَمْ بِيَّ وْأَنَا فْالْحَبْسْ، 17وْمْلِّي وْصَلْ لْرُومَا دَارْ جْهْدُه وْقَلّْبْ عْلِيَّ حْتَّى لْقَانِي. 18كَنْطْلَبْ مْنْ الرَّبّْ يْنَزّْلْ عْلِيهْ الرَّحْمَة دْيَالُه فْدَاكْ النّْهَارْ. وْرَاكْ كَتْعْرَفْ مْزْيَانْ شْحَالْ عَاوْنِّي مْلِّي كْنْتْ فْأَفَسُسْ.
Actualmente seleccionado:
رِسَالَةْ تِيمُوتَاوُسْ التَّانِيَّة 1: MSTD
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
