Zac 8
8
Ri utzilej taq q'ij pa Jerusalem
1Ri Jehová xch'on chik k'a jun bey wik'in y xubij chuwe: 2Yin kan janila k'a ninwajo' ri Sión, y roma ri' niyakatej janila woyowal toq ronojel man utz ta beneq. 3Roma ri' yin xkitzolin chik pa Jerusalem y chiri' xkik'ase-wi. K'ari' ri itinamit xtubini'aj: Nima-Tinamit ri k'o Qitzijri'il Rik'in. Y ri juyu' wichin yin xtubini'aj ri Loq'olej Juyu'. 4Y ri taq e rijita'q winaqi' ri kik'uan kich'ame'y xketz'uye' chik jun bey pa taq nima'q ruwech bey ri akuchi niban-wi molojri'il ri chiri' pa Jerusalem. 5Chuqa' ri taq ak'uala' xke'etz'an chiri'. 6Yin Jehová ri yibin. Ri winaqi' ri k'a ek'o na kan chupan ri tinamit ri', kan janila k'ayew xtuben chikiwech richin nikinimaj, jak'a yin kan man jun k'ayew chinuwech.
7Yin kan xkenkol k'a ri nuwinaq ri ek'o pa taq ruwach'ulew ri ek'o chikinaqaj. 8Y xkenk'en-pe, y kan xkek'oje' k'a pa Jerusalem. Xke'ok chik k'a nutinamit, y yin xkinok ki-Dios. Y kan xtinben pa ruchojmilal kik'in, y man xkenmalij ta kan. Yin Jehová ri yibin.
9Yin Jehová ri k'o ronojel uchuq'a' pa nuq'a' ninbij chiwe rix ri xixk'oje' wawe' toq ri e q'alajirisey nuch'abel xech'on pa ruwi' ri wachoch toq xya'ox-qa ri ruxe', chi kan tik'oje' iwuchuq'a' y man timayamo-qa ri iwánima, richin nipaba-q'anej ri wachoch. 10Ri q'ij toq xya'ox-qa ri ruxe' ri wachoch ri ojer kan, ri winaqi' man jun kajel nikik'ul y ni ta ri qajibel kichin ri chikopi'. Chuqa' ri winaqi' man yetikir ta yek'ayin ni yeloq'on roma ri janila chi ruk'ayewal. Chuqa' xinben chi konojel xeyakatej chikij ri kachibil. 11Jak'a re chiwech-apo man xtinben ta chik keri' iwik'in rix ri juba' ri xixk'oje' kan. Yin Jehová k'iytisanel richin ronojel ri yibin.
12Chupan ri q'ij ri' ri ija'tz kan jebel xkebos-pe, y ri juwi-uva xa kan xtik'oje' ruwech. Ri qasanbel-ulew kan xtik'ase' ri tiko'n chuwech, y xtinben k'a chi xtiqaqa raxq'ab pa ruwi' ri iruwach'ulew. Chuqa' xtinben chi ri iwinaq ri xek'oje' kan, kan xtok kichin ronojel re'. 13Ri ojer kan xixok etzelanik chikikojol ri ruwach'ulew. Jak'a chiwech-apo, rix winaqi' aj-Judá y ri aj-Israel, xkixinkol y xkixok jun urtisanik. Roma ri' man k'a tik'oje' xibinri'il iwik'in; xa kan tik'oje' iwuchuq'a'. 14Yin Jehová ri yibin. Ri ojer kan xinben itzel chike ri iwati't-imama' toq rije' xkiyek woyowal, y man xintzolij ta wi' chuwij. 15Jak'a xinch'ob yan chi chiwech-apo xtinben utz iwik'in rix aj-Jerusalem y kik'in ri winaqi' aj-Judá. Roma ri' man k'a tixibij-iwi'. 16Jare' ri rubanik ri k'o chi niben: Kixch'on qitzij kik'in ri iwachpochel. Tiq'ata-tzij pa ruchojmilal, richin keri' xtik'oje' ta uxlanenri'il pa taq q'atoj-tzij. 17Man jun chiwe rix tuch'ob itzel chirij ri rachpochel. Ni man tijikiba-itzij chire ri xa man qitzij ta. Yin kan ninwixowaj ronojel re'. Yin Jehová ri yibin, xcha'.
18Ri Jehová xch'on chik wik'in, y xubij chuwe: 19Toq rix yixmewayin pa rukaj ik', pa ro', pa ruwuq y pa lajuj ik', kan xtok k'a jun nimaq'ij richin janila kikoten chi'ikojolil rix. Roma ri' k'o chi niwajo-iwi' chiwech-qa rix, y tik'oje' uxlanenri'il chi'ikojol. 20Kan xkepe k'a e k'iy winaqi' kichin ch'aqa' chik ruwach'ulew. 21Y ri winaqi' kichin jalajoj ruwech tinamit xkekik'uaj-el ch'aqa' chik winaqi' richin xkepe kik'in rije' richin xkinkikanoj yin Jehová k'iytisanel richin ronojel. 22E k'iy k'a winaqi' richin ch'aqa' chik tinamit y ri ruwach'ulew ri k'o uchuq'a' kik'in xkepe wawe' richin xkinkikanoj yin Jehová richin xtikil urtisanik. 23Chupan ri q'ij ri', xtibebanatej k'a chi e lajuj achi'a' ri kepe pa ch'aqa' chik ruwach'ulew, xtikichop chi rutziaq jun iwinaq, y xtikibij k'a chire: Taya' q'ij chiqe richin yojbe awik'in, roma qak'axan chi iwik'in rix k'o-wi ri Jehová, xkecha'. Jare' ri rutzijol ri xuya' ri Dios.
Actualmente seleccionado:
Zac 8: KQC
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Kaqchikel Bible © Bible Society in Guatemala, 2003.
