Sal 6
6
Ch'owen rik'in ri Dios chupan ri tejtobenik*f4*
1Jehová, tabana' utzil man yinaya' pa ruk'ayewal toq awoyowal.
Ni man taben chuwe richin nintej poqon rik'in ri awoyowal.
2Tajoyowaj nuwech, Jehová, roma kan maneq chik wuchuq'a'.
Kinawaq'omaj, roma ri nuq'axo'n napon k'a chupan ri nubaqil.
3Chuqa' ri wánima kan janila nibison.
Y rat Jehová ¿K'a jampe' k'a xkinato'?
4Tabana' utzil Jehová takolo' ri nuk'aslen;
kinakolo' k'a roma ri ajoyowanik.
5Roma toq jun kamineq chik, kan man xtunataj ta chik ri abi'.
¿Achike ta k'a xtiya'on aq'ij, chupan ri muqbel kamineq?
6Yin kan xirijix yan k'a roma oq'ej.
Ronojel aq'a' janila yinoq' pa nuwarabel.
Kan xch'eqe' yan k'a ri nuch'at rik'in ri ruya'al runaq'-nuwech.
7Kan man yitikir ta chik yitzu'un,
roma ri e etzelanel wichin kan nikiben chuwe richin janila yinoq'.
8Tijech'ej k'a iwi' wik'in yin rix ri ix banoy taq etzelal,
roma ri Jehová xrak'axaj yan ri woq'ej.
9¡Ri Jehová kan xrak'axaj k'a ri nuk'utunik!
¡Ri Jehová xrak'axaj yan y xtuk'uluba-pe ri nuch'owen!
10Ri e etzelanel wichin, xkek'ixbitej y xtikixibij-ki'.
Xa xke'animej k'a chaq k'ate'.
Actualmente seleccionado:
Sal 6: KQC
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Kaqchikel Bible © Bible Society in Guatemala, 2003.
