Job 40
40
1Y ri Jehová xubij chik chire ri Job: 2Rat ri nawajo' yach'ojin wik'in yin ri in Dios ri k'o ronojel uchuq'a' pa nuq'a', ¿kan k'a k'o kami ri nawajo' nabij-pe chuwe?, xcha'.
3K'ari' ri Job xuk'uluba-apo ri ruch'abel ri Jehová y xubij:
4Yin xa man jun ok ri wetamabal, man ninwajo' ta chi nojin man nojin ri yenbij-apo chawe;
xa más utz nintz'apej re nuchi' rik'in re nuq'a'.
5Toq yin xich'on, xa xinbij k'a ronojel ri xitikir xinbij.
Wakami xa maneq achike ta chik ri xkitikir xtinbij, xcha'.
6Y ri Jehová xch'on chik k'a pe rik'in ri Job pa jun nimalej surkum y xubij:
7Wakami k'a, rat Job, kan tak'utu' k'a chi at achin, man taxibij-awi',
roma yin kan k'o k'a xtink'utuj chawe y rat xtak'uluba-pe ri nuch'abel.
8¿Achike roma toq rat nabij chi ri nuq'atbel-tzij yin xa man utz ta ri nuk'en-pe,
y xaxe richin chi niq'alajin chi rat xa man at aj-mak ta?
9¿Kan nawajo' nak'ut chi ri aq'a' rat kan k'o-wi ruchuq'a' achi'el ruchuq'a' ri nuq'a' yin?
¿Kan nawajo' nak'ut chi ri ach'abel rat kan niwajin achi'el niwajin ri nuch'abel yin?
10Wi keri', kan tak'utu' k'a chi k'o aq'ij y k'o chuqa' ak'ojlen.
Kan tabana' k'a chi niq'alajin ri ak'aslen chi k'o ruchuq'a' y niyik'lun ri rusaqil achi'el ri wichin yin.
11Wi rat kan najunamaj-awi' wik'in, kan taya' q'ij chi niq'alajin ri nimalej awoyowal
kan katzu'un k'a pa kiwi' ri kan nikina' chi nima'q kiq'ij y taqasaj kiq'ij jumul.
12Kan katzu'un pa kiwi' ri kan nikina' chi nima'q kiq'ij y ke'aqasaj-pe ri akuchi ek'o-wi,
Ri aj-maki' kan ke'ake'ej jumul, ri akuchi xke'awil-wi.
13Y ri nim kiq'ij y ri e aj-maki' ri' kan junan k'a ke'amuqu' kan ri pan ulew,
kan tabana' chike chi ketz'ape' kan ri pa q'equ'm ri akuchi ek'o-wi ri kaminaqi'.
14Wi rat Job kan yatikir naben ronojel re', ja yin nabey ri xkinimirisan aq'ij,
roma ri ruchuq'a' ri awijkiq'a' rat, kan nuben chawe chi kan at junan wik'in yin.
Ri chikop Hipopótamo
15Tatz'eta' chi ri hipopótamo ja yin ri xibanon richin;
keri' chuqa' rat ja yin xibanon awichin.
Jak'a ri hipopótamo, q'os ri ruway, achi'el ri ruwaybal ri bóyix.
16Tatzu' chi ri chikop ri' kan janila ruchuq'a' ri rij racheq,
ri xerupan kan jebel niq'alajin chi janila ruchuq'a'.
17Ri rujey kan kow-kow achi'el ri tiox-che',
y ri paten-iboch' ri e chapayon ri raqen, kan jebel kichapalon-ki'.
18Ri rubaqil achi'el kibanik ri bolobeq q'enq'oj-pueq,
ri e ruq'a-raqen achi'el kibanik bolobeq q'eqapueq.
19Jare' ri chikop ri nabey xinben yin, chire ri ronojel ri nusamaj,
y kan xaxe yin ri yitikir ninqasaj ruq'ij.
20Y ri pa taq juyu' k'o q'os nuya' richin chi chiri' niwa-wi ri chikop ri',
ri chuwi' taq juyu', akuchi ye'anin y yetzok'lan-wi ri ch'aqa' chik chikopi', roma ri kikoten.
21Rija' nik'oje' chuxe' ri rumujal ri q'ayis lóto,
kan nrewaj-ri' chukojol ri pop y ri pa taq ch'abeq ri ek'o chuchi' taq ya'.
22Kan ja wi k'a ri rumujal ri lóto ri nik'oje' pa ruwi';
y ri lama' ri yek'iy chuchi' taq ya', jari' ri yesutin rij.
23Y toq ri raqen-ya' ninimer, man nuxibij ta ri'
stape' ri raqen-ya' Jordán nibusku'l napon ri chi rutza'n,
kan man jun numey.
24¿K'o kami jun ri nitikir nuchob y numoyirisaj ri chikop ri'?
¿K'o kami jun ri nitikir nichapo richin, rik'in jun ch'ich' ri nuju' chi rutza'n?
Actualmente seleccionado:
Job 40: KQC
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Kaqchikel Bible © Bible Society in Guatemala, 2003.
