ᐃᓯᑭᐊᓕᐅᑉ ᐊᒡᓚᖏᑦ 3
3
1 #
ᑕᑯᑎ 10:9,10. ᒎᑎ ᐅᕙᓐᓄᑦ ᐅᖃᕐᐳᖅ, “ᐃᓅᑉ ᐃᕐᓂᖓ, ᓂᕆᒋᑦ ᐃᓕᖕᓄᑦ ᑐᓂᔭᐅᔪᓂᒃ; ᐊᒡᓔᑦ ᑖᒃᑯᐊ ᐃᒧᓯᒪᔪᑦ ᓂᕆᒃᑭᑦ, ᐂᓕᕆᑦ, ᐃᓴᕆᐊᓕᐅᑉ ᑭᖑᕚᖏᑦ ᐅᖃᓪᓚᒡᕕᒋᔭᕐᑐᕐᓗᒋᑦ.”
2ᐂᑦᑕᕋᒪ, ᐊᒡᓚᖕᓂᒃ ᐃᒧᓯᒪᔪᓂᒃ ᓂᕆᑎᑉᐹᖓ. 3ᐅᖃᕐᓗᓂᓗ, “ᐃᓅᑉ ᐃᕐᓂᖓ ᐊᒡᓔᑦ ᐃᓕᖕᓄᐊᕐᑕᒃᑲ ᓂᕆᒃᑭᑦ ᐊᕿᐊᑦᑐᕈᑎᒋᓗᒋᑦ.” ᓂᕆᒐᒃᑭᑦ ᐃᒍᑦᑕᐅᑉ ᓰᕐᓇᐅᑎᖓᑐᑦ ᒪᒪᕐᑎᒋᕗᑦ.
4ᐅᖃᐅᑎᒋᕚᖓᓗ, “ᐃᓅᑉ ᐃᕐᓂᖓ, ᐃᓴᕆᐊᓕᒥᐅᓄᐊᕐᓗᑎᑦ ᐅᖃᐅᓯᒃᑲ ᑖᒃᑯᓄᖓ ᐅᖃᐅᓯᕆᒃᑭᑦ. 5ᐅᖃᐅᓯᖃᖃᑎᒋᓐᖏᑕᕐᓄᑦ ᑎᓕᖏᓐᓇᒃᑭᑦ ᓇᓗᓇᕐᑐᒥᒡᓘᓐᓃᑦ ᐅᖃᐅᓯᓕᖕᓄᑦ, ᐃᓴᕆᐊᓕᐅᓪᓕ ᑭᖑᕚᖏᓐᓄᑦ. 6ᑎᓕᒐᔭᕈᒃᑭᑦ ᐅᖃᐅᓯᖃᑎᒋᓐᖏᑕᕐᓄᑦ ᓇᓗᓇᕐᑐᓂᒡᓘᓐᓃᑦ ᐅᖃᐅᓯᓕᖕᓄᑦ, ᐅᖃᐅᓯᖏᑦ ᑐᑭᓯᔪᓐᓇᖏᒃᑲᓗᐊᕈᕕᒋᑦ, ᑎᓕᒍᒃᑭᓪᓕ ᑖᒃᑯᓄᖓ, ᑖᒃᑯᐊ ᓈᓚᒃᑲᔭᕐᐳᑦ ᐅᖃᐅᓯᕆᔭᕐᓂᒃ. 7ᐃᓴᕆᐊᓕᐅᓪᓕ ᑭᖑᕚᖏᑦ ᐃᓕᖕᓂᒃ ᓈᓚᖕᓂᐊᓐᖏᓚᑦ; ᐅᕙᓐᓂᒃ ᓈᓚᒍᒪᖏᒻᒪᑕ; ᐃᓴᕆᐊᓕᐅᑦ ᑭᖑᕚᖏᑦ ᐱᔭᕐᓂᖏᑦᑑᕗᑦ ᓯᑎᔪᒥᒡᓗ ᐆᒻᒪᑎᖃᕐᓗᑎᒃ. 8ᑕᑯᒋᑦ, ᑍᒫᑦᓮᓐᓇᕐᑕᐅᖅ ᓯᑎᔫᑎᓐᓂᐊᕆᕙᒋᑦ, ᑍᒃᑯᑎᑐᓇᕐᓗ ᐱᔭᕐᓂᖏᑦᑑᑎᓪᓗᑎᑦ. 9ᓴᖑᑎᑕᒃᓴᐅᑎᓐᓂᐊᓐᖏᓚᒋᑦ ᐅᔭᕋᒃᑎᑐᑦ ᓯᑎᔪᑎᑐᑦ ᐊᐅᒫᒡᒋᓲᑎᑐᑦ ᓯᑎᑎᒋᑎᓪᓗᑎᑦ; ᑍᒤᒻᒪᑦ ᓯᕘᕋᒋᓂᐊᕐᓇᒋᑦ, ᑕᐅᑦᑐᖏᓐᓄᓪᓗ ᓴᐱᓕᕐᑎᑕᐅᑦᑍᓕᒋᑦ, ᑖᒃᑯᐊ ᐊᑭᕋᕐᑐᕐᑎᐅᖕᒪᑕ.”
10ᓱᓕ ᐅᖃᐅᑎᒃᑲᓐᓂᕐᐹᖓ, “ᐃᓅᑉ ᐃᕐᓂᖓ, ᐅᖃᐅᓰᑦ ᐃᓕᖕᓄᑦ ᐅᖃᐅᓯᕆᔭᓕᒫᒃᑲ ᐆᒻᒪᑎᖕᓄᐊᒃᑭᑦ, ᑐᓴᕐᓗᒋᓪᓗ ᓯᐅᑎᖕᓄᑦ. 11ᐂᓕᕆᑦ, ᐃᓅᖃᑎᖕᓄᑦ ᐊᐅᓪᓚᕈᑦᔭᐅᓯᒪᔪᓄᑦ, ᐅᖃᐅᑎᓗᒋᓪᓗ, ‘ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ’; ᓈᓚᖕᓂᐊᕐᐸᑕ ᓈᓚᖏᒃᑲᓗᐊᕐᐸᑕᓘᓐᓃᑦ ᑲᔪᓯᓂᐊᕐᐳᑎᑦ.”
12ᑕᕝᕙ ᐊᓂᕐᓂᐅᑉ ᖃᖓᑦᑕᕐᑎᑉᐹᖓ, ᐊᑕᓂᐅᑉ ᓂᕐᑐᕐᓇᕐᓂᖓᑕ ᐃᓂᒥᓂᑦ ᖁᒻᒧᒃᑎᑕᐅᓂᖓᑐᑦ, ᓂᐱᕐᔪᐊᒥᒡᓗ ᑐᓴᕐᐳᖓ ᑐᓄᓐᓂᑦ ᑲᓪᓕᐅᑉ ᓂᐱᕐᔪᐊᖓᑐᑦ ᑍᒤᑦᑐᒥᒃ; 13ᑐᓴᕆᕗᖓᓗ ᐆᒪᔪᐊᓗᐃᑦ ᐃᓴᕈᖏᑕ ᐃᒻᒥᖕᓄᑦ ᐊᒃᑐᕐᑕᕐᕙᓗᖏᓐᓂᒃ, ᓴᓂᐊᓃᑦᑐᓪᓗ ᐊᒃᓴᓗᐊᑦ ᑐᓴᕐᓴᐅᓂᖏᓐᓂᒃ, ᑖᒃᑯᐊᓗ ᑲᓪᓕᐅᑉ ᐃᒃᑑᓕᔮᕐᓂᖓᑐᑦ ᑐᓴᕐᓴᐅᕗᑦ. 14ᐊᓂᕐᓂᐅᓪᓗ ᖃᖓᑦᑕᕐᑎᓪᓗᓂᖓ ᐊᐅᓪᓚᕈᑎᕚᖓ, ᑕᕝᕙ ᖁᕕᐊᓇᖏᑦᑐᕐᔪᐊᕐᒧᑦ ᓂᓐᖓᐅᒪᓇᕐᑐᒧᑦ ᐊᓂᕐᓂᒃᑯᑦ ᑎᑭᑕᐅᕗᖓ, ᐊᑕᓂᐅᓪᓕ ᐊᒡᒐᖏᑕ ᓲᖑᔪᕐᔪᐊᓄᑦ ᑎᒍᒥᐊᕐᐹᖓ; 15ᐊᐅᓪᓚᕈᑦᔭᐅᓯᒪᔪᓪᓗ ᓇᔪᕐᑕᖓᓐᓄᐊᕐᐳᖓ ᑎᐅᓪ-ᐋᐱᑉᒧᑦ, ᑰᑉ ᓰᐸᕆᐅᑉ ᓴᓂᐊᓃᑦᑐᓄᑦ. ᐅᓪᓗᓂᒃ 7ᓂᒃ ᑕᕝᕙᓂ ᐃᒃᓯᕙᓚᐅᕐᐳᖓ ᑲᒪᓂᐊᒻᒪᕆᒃᓗᖓ.
ᐃᓯᑭᐊᓕᐅᑉ ᖃᐅᔨᓴᕐᑎᓐᖑᕐᑎᑕᐅᓂᖓ
ᐃᓯᑭᐊᓕ 33:1-9
16ᐅᓪᓗᐃᑦ 7 ᐊᓂᒍᕐᑎᓪᓗᒋᑦ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ: 17“ᐃᓅᑉ ᐃᕐᓂᖓ, ᖃᐅᔨᓴᕐᑎᓐᖑᕐᑎᑉᐸᒋᑦ ᐃᓴᕆᐊᓕᐅᑉ ᑭᖑᕚᖏᓐᓄᑦ; ᑍᒤᒻᒪᑦ ᐅᖃᐅᓯᒃᑲ ᑐᓴᕈᕕᒋᑦ ᖃᓂᓐᓂᑦ ᐊᓂᔪᑦ, ᐃᓂᕐᑎᒃᑭᑦ ᐅᕙᓐᓂᑦ ᐱᔪᓂᒃ. 18ᐱᐅᖏᑦᑐᓕᔪᒧᑦ ᐅᖃᕈᒪ, ‘ᑐᖁᓂᐊᓕᕐᐳᑎᑦ,’ ᐃᓂᕐᑎᖏᒃᑯᕕᐅᒃ ᐱᐅᖏᑦᑐᓕᓂᕐᒥᓂᑦ ᖃᕿᐊᓕᖁᓗᒍ, ᐃᓅᖁᓪᓗᒍᓗ, ᐊᔪᕐᑐᓕᓂᕐᒥᓂᑦ ᖃᕿᐊᓕᓚᐅᕋᓂ ᑐᖁᑐᐃᓐᓇᕐᐸᑦ; ᑐᖁᓂᖓᓄᑦ ᐸᓯᔭᒃᓴᐅᑎᒃᑲᔭᕐᐸᒋᑦ. 19ᐊᔪᕐᑐᓕᔪᕐᓕ ᐃᓂᕐᑎᕈᕕᐅᒃ, ᑐᓴᕈᒪᖏᓐᓂᕐᒥᓄᑦ ᐊᔪᕐᑐᓕᓂᕐᒥᓂᒃ ᖃᕿᐊᓕᖏᓪᓗᓂ ᑐᖁᒃᐸᑦ; ᐸᓯᔭᒃᓴᐅᒐᔭᓐᖏᓚᑎᑦ.
20“ᓇᓛᒎᕐᑐᕐᓕ ᐊᑲᐅᔪᒥᒃ ᕿᒤᓗᓂ ᐊᔪᕐᑐᓕᒃᐸᑦ, ᐹᓪᓚᒍᑎᒃᓴᒧᑦ ᑎᑭᑎᒃᑯᒃᑯ, ᑐᖁᒃᐸᑦ ᐊᔪᕐᑐᓕᓂᕐᒦᓪᓗᓂ, ᐃᓂᕐᑎᓚᐅᖏᒃᑯᕕᐅᒃ, ᐱᐅᔪᑦ ᐱᓂᐊᓚᐅᕐᑕᖏᑦ ᐃᖅᑲᐅᒪᔭᐅᓂᐊᓐᖏᓚᑦ; ᑐᖁᓂᖓᓄᑦ ᐸᓯᔭᒃᓴᐅᑎᒃᑲᔭᕐᐸᒋᑦ. 21ᓇᓛᒎᕐᑐᕐᓕ ᐃᓂᕐᑎᕈᕕᐅᒃ ᐊᔪᕐᑐᓕᖁᓇᒍ, ᐊᔪᕐᑐᓕᔪᓐᓃᕐᐸᑦ, ᑖᓐᓇ ᐃᓅᔪᒫᕐᐳᖅ, ᐃᓂᕐᑎᕐᑕᐅᓂᕐᒥᒃ ᓈᓚᖕᓂᕐᒥᓄᑦ; ᐃᕝᕕᓪᓗ ᐸᓯᔭᒃᓴᐅᒐᔭᓐᖏᓚᑎᑦ.”
ᐃᓯᑭᐊᓕᐅᑉ ᐅᖃᕈᓐᓁᓪᓕᓂᖓ
22ᐊᑕᓂᐅᓪᓗ ᐱᔪᓐᓇᕐᓂᖓᑕ ᑕᕝᕙᓂ ᓇᔪᕐᐹᖓ; ᐅᖃᐅᑎᓪᓗᖓᓗ, “ᒪᑭᓪᓗᑎᑦ ᓇᑎᕐᓇᒧᑦ ᐂᓕᕆᑦ, ᑍᑲᓂ ᐅᖃᐅᑎᓂᐊᕐᐸᒋᑦ.”
23ᒪᑭᓐᓇᒪ ᓇᑎᕐᓇᒧᓐᖓᐅᕗᖓ; ᑕᑯᒋᓪᓗ, ᐊᑕᓂᐅᑉ ᐱᓐᓇᕐᓇᕐᓂᖓ ᑕᑯᓕᕆᕙᕋ, ᑰᑉ ᓰᐸᕆᐅᑉ ᖃᓂᒋᔮᓂ ᑕᑯᓚᐅᕐᑕᑦᑐᑦ ᐱᓐᓇᕐᓇᕐᑎᒋᔪᖅ; ᑕᕝᕙ ᓄᓇᒧᑦ ᐹᒻᒪᒃᐳᖓ ᑮᓇᕋ ᓄᓇᒧᑦ ᐳᓪᓗᒍ, 24ᐊᓂᕐᓂᐅᓪᓕ ᐃᑎᕐᕕᒋᓪᓗᖓ ᓂᑯᕕᑎᑉᐹᖓ; ᐅᖃᐅᑎᓪᓗᖓᓗ, “ᐊᖏᕐᕋᕐᓗᑎᑦ ᐃᒡᓗᖕᓂ ᐅᒃᑯᐊᕈᑎᔭᕐᑐᕆᑦ. 25ᐃᓅᑉ ᐃᕐᓂᖓ, ᑕᑯᒋᑦ, ᐃᒡᓗᖕᓃᓪᓗᑎᑦ ᐊᒃᓱᓈᓄᑦ ᕿᓚᒃᓱᕐᑕᐅᔪᒫᕐᐳᑎᑦ, ᐊᓂᔪᓐᓁᓪᓕᓗᑎᑦ ᐃᓄᖕᓄᐊᕈᓐᓁᓪᓕᔪᒫᕐᐳᑎᑦ. 26ᐅᕾᑦ ᖃᓂᕐᐱᑦ ᕿᓚᖓᓄᑦ ᓂᐱᑎᑦᓱᒫᕐᐸᕋ, ᑕᕝᕙ ᐅᖃᕈᓐᓁᓪᓕᔪᒫᕐᐳᑎᑦ ᐃᓅᖃᑎᒌᒡᔪᐊᓪᓗ ᐊᑭᕋᕐᑐᕐᑐᑦ ᐃᓂᕐᑎᕈᓐᓇᕐᓂᐊᓐᖏᓚᑎᑦ. 27ᐅᖃᕐᕕᒋᓕᕐᒥᒍᒃᑭᓪᓕ, ᐅᖃᕈᓐᓇᕐᓯᑎᑦᓱᒫᕐᐸᒋᑦ, ᑕᕝᕙ ᐅᖃᐅᑎᓕᕈᒫᕐᐸᑎᑦ, ‘ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ’; ᑐᓴᕈᓐᓇᕐᑐᑦ ᑐᓴᕐᓂᐊᕐᐹᑎᑦ; ᑐᓴᕈᒪᖏᑦᑐᓪᓗ ᑐᓴᕐᓂᐊᓐᖏᓛᑎᑦ; ᐊᑭᕋᕐᑐᕐᑎᐅᓪᓗᑎᒃ ᐃᓅᖃᑎᒌᖑᖕᒪᑕ.”
Actualmente seleccionado:
ᐃᓯᑭᐊᓕᐅᑉ ᐊᒡᓚᖏᑦ 3: EAIB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Eastern Arctic Inuktitut Bible © Canadian Bible Society, 2012, 2021-2023.
