Mateo 3
3
Jeso'me chiláxanataxanaxaic lenaxat Juan detaqátapeelégue di' totelégue 'aléua
(Marcos 1.1-8; Lucas 3.1-9, 15-17; Juan 1.19-28)
1Joca'li ma'le qaỹóxode' saua' 'uóidi, qana'chi jeso'me chiláxanataxanaxaic lenaxat Juan janac da' d'aqtaxaatapeelégue di' totelégue 'aléua huá'ña di' Judea. 2Da' l'aqtaxanaxac 'eet'oi:
—'Auaxañiidíñi qomle naua' 'adoicódii', qá'a sóxote ma'le sa qaỹáaque da' l'onataxanaxac ñi'me Dios 'me net'ague da' piỹem da' ỹilo'ogue ỹima jen' 'aléua.
3Jeso'me Juan, na'chiso jeso'me ỹidíñi joca'li so' l'aqtáxanaxanec ñi' Dios lenaxat Isaías, joca'li 'enaaco':
'Uo ga' siỹaxaua chimaqtapeelégue di' totelégue 'aléua, 'eet'oi da' liỹáxanaxac:
“'Auqátaxañiita't qomle ga' naq'aic ñi' qadesaliaxanec;
ỹátaqta 'an'ónaxachiit'egue qomle ga' ladic.”
4Jesaa'me louo so' Juan n'oxonaqa, laỹoxot jan' naanáxanaq. Qataxa so' nesaataxaqui síiỹailó'oc, qataxa ỹalíctac jan' qosiiquioxoi qataxa jen' ma'ague lí'i. 5Qana'chi janac da' naquiáxana jeso'me jen' chiỹaqá'uo di' noic let'ádaic Jerusalén, qataxa ỹima jen' netalégue di' 'aléua Judea, qataxa jena'me sa qaỹádapiỹi 'ale'u so' ñáchi Jordán. 6Qana'chi so' siỹaxadipi ỹ'axa't naua' loico da' ỹigue'm, qana'chi so' Juan nachiláxanỹi di' ñáchi Jordán.
7Qaláxasa so' Juan joca'li ỹilá'a da' ỹátaqta sa lec'óxotolec na' nedé'uo na' fariseopi qataxa na' nedé'uo na' saduceopi da' janac da' sétaaque da' qonachiláxan, qana'chi jeso'me 'enapéga, 'enaaco':
—¡'Ami nanaic lec'oqtepi! ¿Jái'chogamaxa 'ami ỹip'iỹenalo da' qaidi 'anelótaxañiiỹet jega'me qaỹa ga' 'ená'am da' lichic ne'uaxánaguec jen' 'aléua 'me sa qaỹáaque? 8Ỹátaqta 'analoxóñiita qomle, qaidi di'ỹoqóta da' ỹátaqta 'eesa da' 'ami 'auaxañiidíñi naua' 'adoicódii'. 9Qataxa sa 'te qomle da' tatapiilo naua' 'adai'lídii' da' 'oñíỹapeela't: “Qo'mi mai'chi qo'mi lec'óqo'te so' Abraham.” Qá'a 'ami senapegalo da' ñi' Dios ỹañoxot da' ỹivíd'a da' ỹachiỹoxotaỹi jénjo' qa'pi ga' ỹátaqta lec'óqo'tepi so' Abraham. 10Jaga' qachipe ma'le sóxote ỹimeta't da' ỹiquesoxo'ñot jan' 'epaq, qana'chi ỹima jan' 'epaq 'me sa 'te da' nó'in jan' jala, na'chánata 'me qoỹiquesoqot. Ỹim, qana'chi qoỹasaxánỹi ga' dóle'. 11'Eesa da' jaỹim naỹi 'ami ñachiláxanỹilo jen' noxop, jeda'me náỹi da' 'ami 'auaxañiidíñi naua' 'adoicódii'. Qaláxasa jen' jaỹim nec'atetalégue, jena'me dachiláxanataxana qomle ga' Espíritu Santo qataxa jega' dóle'. Jena'me ỹátaqta ỹágueegue da' l'añaxac, sa 'te da' sená'am. Qataxa sa 'te da' ñalo'oguet da' 'chi sachít'ape naua' lapela'te. 12Jega'me lasóqot'a ga' lichiỹoxosóxonaxat, qaidi nichiỹoxoñi jen' trigo da' naqat jen' lóvi. Ỹimat jan' jala, qana'chi ỹoxochiỹi ga' lachoxónaxaqui; jen' lóvi, qaa'le ỹigóoue, ỹasaxánỹi ga' dóle' 'me sa 'te da' 'om.
Da' nachiláxac so' Jesús
(Marcos 1.9-11; Lucas 3.21-22)
13Huá'a, qana'chi janac so' Jesús, chiỹoqóchii'ña di' Galilea da' nec'áta di' ñáchi Jordán, jidi'me huét'a so' Juan, da' qaidi so' Juan nachiláxan jeso'me. 14Qaláxasa jeso'me Juan joca'li ỹímta, qana'chi sa ỹiỹamaxaden da' nachiláxan jeso'me. Qana'chi 'enapego' so' Jesús, 'enaaco':
—Jaỹim 'me souen da' jaỹim 'anachiláxan, qalqaiga ¿tóoqo'chi jaỹim 'anec'áta?
15Qaláxasa so' Jesús 'enaaco':
—Qaláxasa naỹi 'ónaxaic da' 'amachít'a da' na'chi senqát'ec dójo', qá'a ỹiỹamqáchiiñi da' qo'mi s'étaq ỹima jen'me 'éetapeec jiñi'me qan'étoqo't.
Qana'chi so' Juan ỹiỹamaxadéeta. 16Joca'li ma'le qonachiláxan so' Jesús, qana'chi cá'ai so' noxop. Huá'a, qana'chi sega'me qoỹ'ouáteuo di' piỹem, qana'chi so' Jesús ỹauaat'eguet so' lepaqal ñi' qan'étoqo't, 'ená'am jen' doqoto' da' naỹá'ña jeso'me. 17Qana'chi qodemachíỹa so' n'aqtac, chimaqpecot di' piỹem, 'enaaco':
—Jedójo' da' ỹalémaxaset ỹalec 'me ỹauotaxat. Jeda'me ỹátaqta ñitóotapeec.
Actualmente seleccionado:
Mateo 3: PLGNT93
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Nuevo Testamento Pilagá © Sociedades Bíblicas Unidas, 1993.