Mateo 2
PLGNT93

Mateo 2

2
Da' lividaxa'j saua' ỹátenaxanaxaiqa
1So' Jesús lañoqo' di' noicolec Belén, 'me huáaue di' 'aléua Judea, huétooue josii'cho' so' nolo' joca'li so' net'a Herodes, qana'chi ỹilotalégue jeso' 'aléua. Qana'chi nivídet'a di' noic let'ádaic Jerusalén saua' siỹaxa'u, chiỹoqoda'ague da' néte' liiséguem. Jesaa'me ỹátenaxanaxaiqa da' ỹilódapega ga' náỹi jan' huaqchiñi. 2Qana'chi jesaa'me denataxaat'ape, 'enapega'to':
—¿Jái'chogamaxa hua'ague ga' let'a na' judiopi 'me ỹímta da' niỹíñi? Qá'a dája' c'atena liiséguem 'me sep'áqat'ague, qo'mi seloqót'a jaso' l'anaxanaqte huaqchiñi. Tadeeto' ñanaguénaq da' si'ỹoxodénaq.
3Qana'chi so' net'a Herodes joca'li ỹaỹáten dójo', qana'chi ỹátaqta n'emáxaden, nataq'en ỹima jeso'me siỹaxadipi 'me néta'ña di' Jerusalén. 4Qana'chi so' net'a ỹiỹáxanee'ga ỹima so' lasoxola'pi na' letaxaỹáxanaxanecpi na' siỹaxadipi da' qodetaxaỹapégue' ñi' Dios qataxa jen'me dapaxaguenataxáatapeec na' naqátaxacpi. Qana'chi ỹinat jái'chogamaxa hua'ague ga' lañoqo' qomle ga' net'a 'me nec'alaxaqui. 5Qana'chi so' nasoxola'pi 'enaaco':
—Huá'ña di' noicolec Belén 'me huáaue di' 'aléua Judea, qá'a naqaidi di' ỹidíñi so' l'aqtáxanaxanec ñi' Dios joca'li 'enaaco':
6'Am noic Belén 'me 'ouétaaue jen' n'aléua na' lec'óqo'tepi so' Judá,
ỹátaqta sa lec'óxotolec da' 'ad'amaqchic, sa 'auená'am jen'me net'alpi jénjo' 'aléua;
qá'a 'am chiỹaqaỹi qomle ga' nasoxola',
'me ỹilo'ogue qomle na' Israel lec'oqtepi 'me ỹalémaxasetpi.
7Qana'chi so' Herodes ỹátaqta ỹoxotétañi da' ỹiỹáxanee'galo saua' ỹátenaxanaxaiqa. Qana'chi ỹinatét'apo' da' jái'chosomaxa nolo' joca'li naloxonalo jaso' huaqchiñi. 8Ỹim, qana'chi ỹamaxategue da' Belén, qana'chi 'enapegalo', 'enaaco':
—'Auc'áchiỹa jidi'me, qana'chi 'aunataxañiỹáaque ga' nootolec. Qomle ma'le 'auañíiỹa, qana'chi jaỹim 'au'aqtaxañiim qomle, qaidi nataq'en jaỹim sec'áta da' si'ỹoxoden.
9Joca'li ỹim da' l'aqtac so' net'a, qana'chi jesaa'me ỹátenaxanaxaiqa jéque'. Huá'a, qana'chi ỹitaxa naloxon jaso' huaqchiñi 'me ỹilótr'a joca'li hua'ague da' c'atena liiséguem. Qana'chi 'uáut'ague da' tatr'ague jesaa'me, cha ỹivíd'a da' v'iiỹet joca'li nalóchii'ña so' 'emec 'me huétaaue so' nootolec. 10Qana'chi jesaa'me ỹátenaxanaxaiqa joca'li ỹitaxa ỹilód'a jaso' huaqchiñi, qana'chi ỹátaqta jalcote da' netónaxa'j. 11Joca'li ỹinoxodóoue so' 'emec, qana'chi ỹilodalégue so' nootolec qataxa jaso' lat'e María. Ỹim, qana'chi ỹisóidiñi naua' liliictel, qana'chi ỹi'ỹoxodéetrac jeso'me. Ỹim, qana'chi ỹ'ouáchi'ñiita saua' lachoxónaxaqui', qana'chi qoỹachítec jaso' oro, qataxa so' nichínataxanaxat, qataxa jaso' licha' jan' 'epaq, lenaxat mirra. 12Joca'li ỹim, qana'chi 'uo da' naqátaxa'j huáỹi so' lichoxonaxa'j da' sa huaỹóxode'uo di' néta'ña so' net'a Herodes. Qana'chi quetegue ga' naq'aic laqáỹa joca'li v'iỹílaxategue ga' l'acháqa't.
So' nootolec qoỹílotaxanegue di' Egipto
13Joca'li ma'le jéque' saua' ỹátenaxanaxaiqa, qana'chi jeso' lamaxasec ñi' qadesaliaxanec naloxóna so' José joca'li d'ochítac. Qana'chi 'uo da' lichoxonaxac qoỹinapego' 'eet'oi:
—'Oñíseguem qomle, 'auacoosop di' nootolec, qataxa jañi' lat'e, qana'chi 'anélotaxañiỹiỹi di' Egipto. Qana'chi 'ouét'a qomle jidi'me, ỹátaqchiiño' 'chi 'am senapéga. Qá'a ñi' Herodes janac da' nimitáaque jena'me nootolec da' ỹalaat.
14Qana'chi so' José ñíseguem, qana'chi ỹacoosop so' nootolec qataxa jaso' lat'e, qana'chi jéque' jesaa'me so' pí'ỹaq, tategue di' Egipto. 15Qana'chi huétr'a jidi'me, cha ỹivíde'ta joca'li ỹileu so' Herodes. Qana'chi naq'áita dójo', qaidi ỹátaqta ỹipaquíchiỹi da' l'aqtac ñi' qadasoxola' Dios 'me ỹ'axat so' l'aqtáxanaxanec, 'enaaco': “Siỹáxana so' ỹalec, chiỹoqóchii'ña di' Egipto.”
So' Herodes damaxasoxolégue so' ñoqolqapiolec da' qoỹalaat
16Jeso' Herodes joca'li ỹila'alo saua' ỹátenaxanaxaiqa da' ỹoqovi'n jeso'me, qana'chi ỹátaqta dalemata. Qana'chi damaxasoxolégue da' qoỹalaat so' ñoqolqapiolec, qoỹivídaxat'a jeso'me sóxote ỹóvi' naua' dos 'uóidi qataxa jen'me p'asaỹima'te n'ása ñoqolqapiolec, ỹátaqta qonmachíchiiñi ỹima jeso'me néta'ña di' Belén qataxa naua' lail, ỹipaquíchiỹi da' l'aqtaxanaxa'j saua' ỹátenaxanaxaiqa. 17Qana'chi naqaida dójo' ỹátaqta ỹipaquíchiilo naua' lidii's so' Dios l'aqtáxanaxanec Jeremías, 'me 'enaaco':
18Qodemachítapega da' naviliỹáxac huá'ña di' Ramá,
noinaxac qataxa n'alaxac.
Raquel jañi' noỹíitac ỹasouaxat di' lec'óqo'tepi,
qaláxasa sa nasen da' qoỹicochaq, qá'a ma'le ỹileu jidi'me lec'óqo'tepi.
19Qaláxasa joca'li ma'le ỹileu so' Herodes, qana'chi huá'ña di' Egipto joca'li ỹitaxa naloxóna so' José so' lamaxasec ñi' qadesaliaxanec, huáaue qa'en so' l'ochaxa. Qana'chi 'enapego', 'eet'oi:
20—'Oñíseguem qomle, qana'chi 'auacoosop ñi' nootolec, nataq'en jañi' lat'e. Ỹim, qana'chi 'av'iỹílaxa di' n'aléua na' lec'óqo'tepi so' Israel, qá'a sóxote ỹileu jidi'me sétaaque ỹalaat na' nootolec.
21Qana'chi so' José ñíseguem, qana'chi ỹauec so' nootolec qataxa jaso' lat'e, ỹic'ádeta di' n'aléua so' Israel lec'oqtepi. 22Qaláxasa so' José joca'li ỹaỹáten da' so' Arquelao da' qoỹanaỹi da' l'onataxanaxac so' let'a Herodes da' ỹitaxa ỹilo'ogue di' 'aléua Judea, qana'chi jeso'me ỹátaqta 'uo da' loqolánaxa. Ỹim, qana'chi 'uo da' naqátaxac huáaue so' lichoxonaxac, qana'chi jeso'me taỹa jidi' Galilea. 23Joca'li ma'le ỹivíta jidi'me, qana'chi ỹic'áta da' ná'ña jidi'me noic Nazaret. Naq'áita dójo', qaidi ỹátaqta ỹipaquíchiilo saua' l'aqtaxanaxaco so' l'aqtáxanaxanecpi ñi' Dios joca'li ỹ'axat so' Jesús da' qoỹíitapega Nazaret lé'ec.

Nuevo Testamento Pilagá © Sociedades Bíblicas Unidas, 1993.


Más información sobre Dios Nivíta Jen' Siỹaxadipi

YouVersion utiliza cookies para personalizar su experiencia. Al usar nuestro sitio web, acepta nuestro uso de cookies como se describe en nuestra Política de privacidad.