Luke 21

Te sori a te tangi soa faka arofa

(Mak 12.41–44)

1Jesus ne ono saere, nai ravea rei nga taangata taufenua e fao ko aratou sori ki te tanga fao mane o te Paito Tapu. 2Ma ne nai ravea fokia te tangi soa faka arofa e fao ki roto ko ana foi pene e rua. 3Muna atu rei ko Jesus, “Kuou e faka ari atu kia kotou te maori: Ko te tangi soa faka arofa nei, a ana ne fao nei e sapa rei ma koratou kaatoa. 4Natafito rake faoa ne fao ki roto ko aratou mane fakatausara ia ratou taufenua, kae te tangi soa faka arofa nei, koia ne sori kaatoa rei ko ana foi mane ka faka ora kiei.”

Ko Jesus e nai munakina ko te Paito Tapu ka fai pariki tia

(Mat 24.1–2; Mak 13.1–2)

5Rake taangata i na kau fanonga, e araara ki te Paito Tapu ku pula atu ku ono taurekareka fuarei, ma ana fatu e kira, ma a sori e sori ki Tupua. Ko Jesus ne muna, 6“A nea kaatoa e ono kotou kiei nei, te vasia ka au, ka siei rei se foi fatu ka tukuna ria ke teka ia ngangea nei. A fatu kaatoa rei ka rakuna ifo ki raro.”

Te faka pariki ma te fakarongo neaisu ka au

(Mat 24.3–14; Mak 13.3–13)

7Feesiri rei koratou, “Te fakaako ee, i vasia fea ka faia rei iei? Ma sea te faka mailonga ke faka saa ria ko te vasia ku oko, ke paa tau tonu iei?”

8Muna atu rei ko Jesus, “Faka matakite kotou, nae lesia riaina. Natafito e kkapi rei ko nga taangata ka oomai i toku ingoa, e mmuna: ‘Kuou koia! Te vasia ku oko!’ Kae kotou kau see tautari kia ratou. 9Kau see maattaku i vasia kotou e fakarongo ki te tau, ma kia furi furi saki ranga. A nea faka peenaa ka faka sasa mua, kae a nea nei siei se atamai te faka suku suku ku piri piri ke oko.”

10Koia e muna fokia, “Nga fenua ka featu maso koratou, nga kainanga ka fe rama taki ki roto. 11A ngaruru ka fai e faka mataku taku, a onge, ma a ngae ngae pariki ka purou i nga ngangea kaatoa. Ma a nea faka mataku taku ka faia ria, ma ka faka ata ata ria mai te vaerangi. 12Kae fakatafito raa koa nea kaatoa o fai, ka ratou pukea ria ma ka ratou fai pariki tia ria kotou. Ka ratou soria ria kotou ke maataki i nga paito taanaki o nga Jew, kae tuku ki te fare pono pono, ma kotou ka ratou aumai ina kia mua o nga tii ma nga fakarongo ranga, natafito i toku ingoa. 13Teinei totou vasia laoi ke araara faki ko te Rongo Laoi. 14#Luk 12.11,12.Kae fai mua otou maanatu ka see faka tuasaa pe kotou ka faka sao faka fefea maso kotou. 15Natafito kuou ka sori atu kia kotou koa taranga ma te atamai purotu, siei pe koai i faoa e fefiri aki ko kotou naa ke ma fai ke ratou fakapoua o pe ke faka kese kese pe nia motou ka mmuna kiei. 16Kotou ka soria e otou maatua, otou taina, otou kanoa paito, ma otou soavaka. Ka ratou tukuna ria ki te mate ko rake faoa ia kotou. 17Ka ratou kanifinia ria kotou kaatoa, natafito i toku ingoa. 18Kae siei se foi rau uru sokotasi i otou poko uru ka faka lekutia. 19Turaki faka makeke, tera kotou ka faka sao maso kotou iei.

Jesus e muna ki te fai pariki tia anga o Jerusalem

(Mat 24.15–21; Mak 13.14–19)

20“Vasia ka kotou ravea ina ko Jerusalem ku riikofi ria e te kano tau, tera ka kotou iroa ina ko Jerusalem ku piri piri ka fai pariki tia. 21Tera koratou i Judea ke furi kese rei kia maunga. Koratou i te roto noforanga i Jerusalem ke oro kese rei, ma koratou i tua ka see foki ki roto noforanga, 22natafito ia aso ai, aso rei o te fakkiro anga, ke au maori rei koa muna muna anga o te Pepa Tapu. 23Ka fakaruru faka arofa maatea rei ki nga maatua faafine e fare ma ratou manava ia aso ai, ma nga maatua faafine ma ratou punai memea! Tera te faka pariki ka faia ki te kunga kere nei ka maatea rei, ma te fakkiro a Tupua ka too ki te kano fenua nei. 24Rake faoa ka taia ria kia rautoro, ma rake faoa ka kavea ria o fakkiroa ki nga fenua kaatoa. Ma ko Jerusalem ka nofo riaina e te kano fenua pouri, oko rei ki ratou vasia ku faka oti iei.

Te au ranga o te Tama a Tangata

(Mat 24.29–31; Mak 13.24–27)

25 # Rev 6.12,13. “Tera a nea faka rere mauri ka faia ria ki te raa, te marama, ma nga fetuu. Ia taangata nei, nga fenua katoa ka furi ko aratou atamai, ka maattaku ki te taanguru o te moana ma te fanake. 26Te kano fenua ka mata pouringia ia ratou maattaku, ia ratou tari faki anga pe nia ka faia ria kia taangata nei, natafito koa manuu i te vaerangi ka nai turia kese mai aratou ngangea e oro kiei. 27#Rev 1.7.Tera te Tama a Tangata ka faka saa, ka au i te kauao ma na manuu ma na taurekareka sapa. 28Vasia oa nea nei ka fakatafito ke faka saa iei, turaki ake ki runga o pula ki runga, natafito totou faka sao ranga ku piri mai.”

Te akonga ki te raakau te ʻfigʼ

(Mat 24.32–35; Mak 13.28–31)

29Tera ko Jesus ne araara faki ko te araara fanga faka tautau nei kia ratou: “Faka maanatu ki te raakau te ʻfigʼ, ma rake raakau kaatoa. 30Vasia kotou e ono ki aratou rau ku fakatafito ke faka saa iei, ta kotou iroa laoi rei, te vasia sau sau raa ku piri mai. 31Ia fai atamai sokotasi, ku kotou ravea ina a nea ku fai, ta ku kotou iroa ina ko te Kainanga o Tupua ku piri mai.

32“Kuou e faka ari atu kia kotou te maori: A nea katoa nei ka fai i mua te vasia o te kano fenua e ora nei ku ngaro iei. 33Tera te vaerangi ma taangata nei ka faka lekutia, kae aku taranga ka si see ma faka leku tia rei.

E fai ke faka matakite

34“Faka matakite maso kotou! Kau see fai ko kotou ke lupea maso kotou kia kai kai ranga, ma te inu, ma te faka tuasaa kotou ki fai ora nei, o pe te Aso naa ka nai maua kotou 35pe te sere. Natafito te Aso naa ka au ki nga taangata kaatoa oa taangata nei. 36Fai faka poto o rotu i nga vasia katoa ko kotou ke faka makeke ria, ke kotou sao ia nea katoa ka faka sasa ria, ma ke turaki ia mua o te Tama a Tangata.”

37 # Luk 19.47. Ia aso naa, ko Jesus e fakaako i te Paito Tapu, tera i vasia i te afi afi e poi ki te Maunga i Olive o nofo i te poo. 38Tera ia pongi pongi o nga aso katoa, te kano fenua katoa e taki mai ki rota Paito Tapu, ke fakarongo kiei.

Actualmente seleccionado:

Luke 21: TKP

Destacar

Copiar

Comparar