Logo de YouVersion
Ícono Búsqueda

लुकस 4

4
येसुस ही परिक्‍छा
(मत्‍तिस ४:१-११; मरकुस १:१२-१३)
1येसुस नेम्‍हा बोलतस ती निन्‍दियस की यरदन ख़ाड़ ती किर्रियस, अउर नेम्‍हा बोलतस आसिन फिटकी अड्‍डा नू होच्‍चस की केरस। 2असन चालिस उल्‍ला गुटी आसिन सैतान परिक्‍छा नन्‍जा। आस आहबाकी एन्‍दरा हूँ मला मोक्‍का रहचस अउर चालिस उल्‍ला मुन्‍जरा ख़ने आस गे किड़ा लगिया।
3आहबाकी सैतान आसिन बाचा, “निन धर्मेस ही तंग्‍दय हिकदय होले ई पखनन असमा कमरागे हुकुम चिआ।”
4येसुस अदिन आनियस, “धरमपुथी नू एन्‍ने लिखिरकी र' ई, आलर असमा तरतू लेका उज्‍जना मला रओर।”#व्‍यवस्‍था ८:३
5अदिही ख़ोख़ा सैतान आसिन ओन्‍टा मेच्‍छा अड्‍डा नू होच्‍चा की ओन्‍द छन नू ख़ेख़ेल ता सौंसे राजिन आसिन एदा। 6अउर सैतान आसिन बाचा, “एन इबड़ा हुरमी राजी ही अधिकार अउर इबड़ा हुरमी खुर्जिन निंगा गे चिओन, एन्‍देरगेका इबड़ा हुरमी एंगा गे सोंपरकी र' ई, अउर एन नेका गे चिआ तुक्‍की, आर गे चिइदन। 7औंगे निन एंगन गोड़ लग्‍गोय होले, इबड़ा हुरमी निंग्‍हय मनो कालो।”
8येसुस सैतानन आनियस, “धरमपुथी नू एन्‍ने लिखिरकी र' ई, ‘निन धर्मेउर्बस, निंग्‍हय धर्मेसिन गोड़ लग्‍गा, अउर आस ही लेका सेवा नना।’”#व्‍यवस्‍था ६:१३
9ताब सैतान आसिन यरुसलेम नू होच्‍चा की धर्मेस ही एड़पा ही मेच्‍छा अड्‍डा नू इजताचा, अउर येसुसिन बाचा, “निन धर्मेस ही तंग्‍दय हिकदय होले, इसते ती किइयाँ डेगआ चिआ। 10एन्‍देरगेका धरमपुथी नू एन्‍ने लिखिरकी र' ई,
‘आस निंगन बछाबआ गे
तंग्‍हय मेर्ख़ादुतरिन आनोस,’#अस्‍सनापाड़ना ९१:११
11अउर ‘आर निंगन ख़ेक्‍खा-ख़ेक्‍खा नू लोकओर,
मला होले निंग्‍हय ख़ेड्‍ड पखना नू मुड़ो।’”#अस्‍सनापाड़ना ९१:१२
12येसुस अदिन आनियस, “धरमपुथी नू एन्‍ने हूँ आनका र' ई, ‘निन निंग्‍हय धर्मेउर्बस निंग्‍हय धर्मेसिन परिक्‍छा मला नना।’”#व्‍यवस्‍था ६:१६
13सैतान आसिन हुरमी परिक्‍छा नन्‍जा की परिक्‍छा नन्‍ना मोका मला ख़क्‍खना गुटी येसुसिन अम्‍बिया की केरा।
येसुस गालिल प्रदेस नू तंग्‍हय नलख ओरे नन्‍जस
(मत्‍तिस ४:१२-१७; मरकुस १:१४-१५)
14येसुस नेम्‍हा बोलतस ही सवंग नू गालिल नू किर्रियस, अउर आस ही पत्‍त नू चौगुड़ती हुरमी अड्‍डा नू बिड़रा। 15आस यहुदिर ही सभाएड़पा गुट्‍ठी नू सिखबआ हेल्‍लरस, अउर होरमर आस ही ओहमा नन्‍जर।
येसुसिन नासरत नू मला पत्‍ताचर
(मत्‍तिस १३:५३-५८; मरकुस ६:१-६)
16येसुस नासरत नू बरचस, एसन आस पोसरका परदका रहचस। आस तंग्‍हय पहले ता लेखा जिरारना-उल्‍ला नू यहुदिर ही सभाएड़पा नू केरस, अउर पढ़आ गे इज्‍जस। 17ताब येसुस गे यसायाह अगमजानिस ही लिख़चका पुथिन चिच्‍चर अउर आस पुथिन खुल्‍लियस अउर आ कड़ी ख़क्‍खियस की पढ़चस असन एन्‍ने लिखरकी रहचा:
18“धर्मेउर्बस ही बोलता एंग्‍हय मइयाँ र' ई,
एन्‍देरगेका आस एंगन गरिबर गे दवसमाचार मेन्‍तआगे चज्‍जका रअदस।
अउर आस एंगन कैदिरिन अम्‍बना ही पत्‍त नू तेंगा गे एंगन चज्‍जिका रअदस,
अउर अन्‍धारिन एरतआगे,
अउर होरमा अत्‍यचार नू मन्‍जकरिन छोड़ाबआगे,
19अउर तंग्‍हय आलरिन बछा बअना बेड़ा बरचकी र' ई बआ की तेंगा गे,
धर्मेउर्बस एंगन तइका रअदस।”#यसायाहस ६१:१-२
20आ ख़ोख़ा येसुस पुथिन बन्‍द नन्‍जस की यहुदिर ही सभाएड़पा ता ओन्‍द नलख ननुस गे चिच्‍चस की उक्‍कियस#४:२० उक्‍कियस अबड़ा उल्‍ला गुट्‍ठी नू आलरिन सिखाबउर ओक्‍का की सिखाबअना चलन रहचा।। अउर यहुदिर ही सभाएड़पा ता होरमा आलर ही ख़न्‍न आस तरा लक्‍की रहचा। 21ताब येसुस आरिन बाचस, “इन्‍ना धरमपुथी ही इबड़ा कत्‍था निम मेन्‍जकर आद इन्‍ना पुरा मन्‍जकी र' ई।”
22होरमर येसुस ही ओहमा नन्‍जर, अउर अनुगरह ती निदरका आस ही बई ती उरख़का एकानापे कत्‍था ती छक्‍केम मन्‍जर, अउर अबड़र बाचर, “इस योसेफस ही तंग्‍दस मलदस दरा?”
23ताब येसुस आरिन बाचस, “एन अख़दन का निम एंगान ई कहावतन बओर, ‘ए डाक्‍टर निन निंगनुम कोड़े नना। कफरनहुम नू निन ज्‍या बग्‍गे नन्‍जकय बअना एमा गे मेन्‍जकादम, आ नलखन निंग्‍हय सहर नू हूँ नना।’” 24ख़ने आस बाचस, “मानिम एन निमरिन बअदन, एकआम अगमजानिसिन आस ही पोसरका परदका अड्‍डा नू स्‍वागत मला नन्‍नतारई। 25लेकिन मानी कत्‍था एन निमरिन बअदन, इस्‍राएल नू एलियास ही बेड़ा नू बग्‍गे बेवार रहचर, आ बिरी साढ़े तिन बछर गुटी चेंप मला पुँइया। ख़ने हुरमी राजी नू अकाल पड़ारकी रहचा।#१ बेलर १७:१ 26लेकिन एलियास सिदोन राजी ता हेद्‍देम सारपत नगरे नू मन्‍जका ओन्‍टा बेवा गुसन लेका तइयस।#१ बेलर १७:८-१६ 27एलिसास अगमजानिस ही बेड़ा इस्‍राएल नू बग्‍गे कोढही रोगियर रहचर अन्‍नू हूँ सिरिया ता नामानसिन#४:२७ नामानसिन नामानस यहुदी मला रहचस, लेकिन सिरिया ता नन-यहुदी रहचस। लेका कोड़े नन्‍जचिच्‍चस, अउर नेकन हूँ कोड़े मला नन्‍जचिच्‍चस।”#२ बेलर ५:१-१४
28ई कत्‍थन मेन्‍जर की यहुदिर ही सभाएड़पा नू मन्‍जका आलर कयरारर केरर। 29अबड़र चोचर अउर येसुसिन सहर ती बाहरी ओथरर की एका परता नू अबड़र ही सहर कमरकी रहचा, अदी ही मेच्‍छा अड्‍डा नू होच्‍चर की आसिन किइयाँ तरा तुक्‍का गे बिद्‍दियर। 30लेकिन आस अबड़र ही मझही ती उरख़यस की चले केरस।
मलदव बोलता लक्‍का आलस कोड़े मन्‍जका
(मरकुस १:२१-२८)
31ओन्‍द उल्‍ला येसुस गालिल प्रदेस ता ओन्‍टा कफरनहुम बअना सहर नू केरस। जिरारना-उल्‍ला नू आस आरिन सिखाबआ लगियस। 32अबड़र आस ही सिखाबअनन मेन्‍जर की छक्‍केम मन्‍जर, एन्‍देरगेका आस अबड़रिन पुरा अधिकार ती सिखाबआ लगियस। 33यहुदिर ही सभाएड़पा नू ओन्‍द मलदव बोलता लक्‍का आलस रहचस। अउर आ आलस चिच्‍चियार नुम बाचस, 34“अना नासरत ता येसू, निन एमन एन्‍दरा नना बेदद्‍दय? एन्‍दरा निन एमन नास नना गे बरचका रअदय? एन अख़दन का निन धर्मेस ही नेम्‍हा आलय हिकदय।”
35ख़ने येसुस अदिन केप्‍पस की बाचस, “छछेम रअय, अउर आ आलस ती उरखय कलय।” आसिन आलर ही मझही नू ख़ेख़ेल नू पटकाचा लेकिन आसिन मलदव बोलता बेगर बिगड़ाचकम आस ती उरख़ा केरा।
36ताब अबड़र होरमर छक्‍केम मन्‍जर, अउर ताम-ताम बआ हेल्‍लरर, “ई एका लेखा कत्‍था हिके? ई आलस ही कत्‍था नू तो एकन्‍ने अधिकार अउर सवंग र' ई। इस पेसदसकिम मलदव बोलता गुट्‍ठी हूँ आलर ती उरख़ी काली।” 37ख़ने येसुस ही कत्‍था कफरनहुम अड्‍डा ही चारो तरा मन्‍जका हुरमी पद्‍दा गुट्‍ठी नू बिंड़रा।
येसुस बग्‍गे आलरिन कोड़े नन्‍दस
(मत्‍तिस ८:१४-१७; मरकुस १:२९-३४)
38येसुस यहुदिर ही सभाएड़पा ती उरख़स की सिमोनस ही एड़पा नू केरस। ख़ने सिमोनस ही एड़पा नू आस ही तंगसास कड़ा नड़ी ती बेमार रहचा। ख़ने एड़पन्‍ता आलर सिमोनस ही तंगसासन कोड़े नना चिआ बाचर की येसुसिन बिन्‍ती नन्‍जर। 39येसुस अदी ही हेद्‍दे केरस की नड़िन केप्‍पस अउर नड़ी अदिन अम्‍बिया चिच्‍चा, आद चोचा की आस ही तेतर-सुसर नना हेल्‍लरा।
40बिड़ी पुत्‍ता हेर्ररा ख़ने हुरमी खल्‍ल ही रोग मन्‍जका रोगियरिन आलर आस हेद्‍दे ओन्‍दरर#४:४० रोगियरिन आलर आस हेद्‍दे ओन्‍दरर बिड़ी पुत्‍ती होले, जिरारना-उल्‍ला मुन्‍जरआ लगिया। औंगे अदिन्‍ती अगू तंग्‍हय बेमार संगेसिन मला ओन्‍दरका रहचर, एन्‍देरगेका यहुदी नियमन आर मला एसआ बेद्‍दा लगियर। अन्‍ने नियम गुट्‍ठी लेखा, अन्‍नेकी रोगियरिन चेड़आ की एकना बाचका नलख मानआ लगियर।। आस अबड़र ही मइयाँ तंग्‍हय ख़ेक्‍खन उइयस की कोड़े नन्‍जस। 41एक्‍का बग्‍गे आलर ती नाद गुट्‍ठी चिच्‍चियारनुम अउर एन्‍ने बअनुम उरख़िया, “निन धर्मेस ही तंग्‍दय हिकदय।” लेकिन आस अबड़न केब्‍बरस#४:४१ केब्‍बरस येसुस आलर ही मझही नू नाद गुट्‍ठी तंग्‍हय पत्‍त नू गोवाह चिच्‍चका आस मला चाहचस। की कच्‍छनखरअम मला चिच्‍चस, एन्‍देरगेका अबड़ा आसिन ख्रिस्‍तस हिकदस बआ की अख़आ लगिया।
येसुस ही नलख
(मरकुस १:३५-३९)
42बिज्‍जिया ख़ने येसुस फिटकी अड्‍डा नू केरस। आलर आसिन बिद्‍दनुम आस हेद्‍दे अड़सियर, अउर अबड़र आसिन बाचर, “एमरिन अम्‍बा की अमा कला” बआ की छेकआ बिद्‍दियर। 43लेकिन आस आरिन बाचस, “एन धर्मेस ही राजी नू दवसमाचार दोसरा सहर नू हूँ मेन्‍तआ पड़ारो, एन्‍देरगेका एन इदी ही खतरिम तइरकादन।” 44अउर आस यहुदिया प्रदेस ता यहुदिर ही सभाएड़पा गुट्‍ठी नू दवसमाचार तेंगा हेल्‍लरस।

Actualmente seleccionado:

लुकस 4: KRUX

Destacar

Compartir

Copiar

None

¿Quieres guardar tus resaltados en todos tus dispositivos? Regístrate o Inicia sesión