زبُور 48
48
دَ وَصفِ خُدا و شارِ پُرشِکوه
سرُود. زبُورِ خانَوارِ قورَح.
1خُداوند بُزُرگ اَسته و باید کَلو سِتایش شُنه،
دَ شارِ خُدای مو، دَ کوهِ مُقَدَّس شی.
2 دَ جای قِیل و نُوربَند، که خوشی تمامِ زمی اَسته،
دَ کوهِ صَهیون، دَ بِلندی های صافون،
دَ شارِ پادشاهِ بُزُرگ.
3دَ مَنِه قصر های ازُو
خُدا دَ عنوانِ پناهگاهِ مُستَحکم معرُوف اَسته.
4اونه، پادشایو یگدِست شُد
و یگجای پیش اَمَد؛
5لیکِن وختِیکه شار ره دِید، حَیرو مَند،
اُونا وَحشَت زَده شُد و دُوتا کد.
6اُونا ره لَرزه گِرِفت
و دَردِ شَدِید، مِثلِ خاتُونی که مِیزَیه.
7 اَی خُدا، تُو کِشتی ھای بندرِ تَرشِیش ره
دَ وسِیلِه بادِ شَرقی مَیده کدی.
8امُو رقم که مو شِنِیده بُودی،
امُو رقم قد چِیم خُو دَ شارِ خُداوندِ لشکر ها دِیدی،
دَ شارِ خُدای خُو:
خُدا اُو ره تا اَبَد برقرار نِگاه مُونه. سِلاه.
9اَی خُدا، مو دَ مَنِه خانِه تُو
دَ بارِه رَحمت تُو فِکر مُونی.
10اَی خُدا، رقمِ نام تُو سِتایش تُو
دَ سراسرِ زمی تِیت مُوشه؛
دِستِ راست تُو پُر از عدالت اَسته.
11بیل که کوهِ صَهیون خوشی کنه
و شارای یهُودا خوشحال بَشه
بخاطرِ قضاوَت های تُو.
12دَ گِردِ صَھیون بِگردِید و دَ چاردَور شی قَدم بِزَنِید
بُرج ھای شی ره حِساب کُنِید.
13سَنگر های بَلِه دیوال شی ره دَ دِل خُو نِگاه کنِید
و قصر های شی ره از نظر خُو تیر کُنِید،
تا بِتنِید دَ نسلِ آینده نقل کُنِید
14 و بُگِید که اینَمی خُدا اَسته، خُدای مو تا اَبَداُلاباد.
اُو تا دَمِ مَرگ مو، مو ره ھِدایَت مُونه.
Actualmente seleccionado:
زبُور 48: HAZ
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
