لاویأن ۶
۶
1 خوداوند موسایَ بٚفرمأسته: 2 «هرزمأت اینفر ایتأ آدمٚ رو گونأ بوکوده بی، خوداوندَ خیأنت بوکونه و اوچی کی اونٚ ورجأ امأنت بٚنأ بوبوسته پٚسَ دٚئنٚ جَا دٚس بٚدأره یا امأنتٚ میأن خیأنت بوکونه، یا دوزدی بوکونه یا خو همسأده مأل و مینألَ چأپؤ بوکونه 3 و یا اَنکی ایچی وأسی کی گومَ بوسته و اونَ بیأفته بی دورُغ بٚگه و قسم بوخوره کی اونٚ ورجأ نٚنأ، یا هرتأ گونأ اَنٚ مأنستَن بوکونه، 4 چونکی گونأ بوکوده و گونأکأر بٚحیسأب بأمؤ، اونچییَ کی بودوزأنه یا زورکی فأگیفته، یا ایتأ امأنتَ کی اونَ بیسپأرده بوبوسته، یا اوچی کی گومَ بوستهیَ بیأفته، وأستی اونَ پٚسَ ده 5 و هطؤیم دروأرهیٚ هرچی کی دورُغٚ قسم بوخورده، وأستی تومأم و کمأل اونَ پٚسَ ده و ایتأ سأم جٚه پنجتأ سأمَ اونٚ سٚر بٚنه، اونَ او روجٚ میأن کی اونٚ گونأ ثأبیت بوبوسته وأگردأنه صأب مألَ. 6 اون وأستی جبرأنٚ قوربأنی رِه، ایتأ سأق و سألیمٚ قوچ جٚه گله، کأهینٚ ورجأ بأوٚره مولأقأتٚ خیمهیَ و خوداوندَ پیشکش بوکونه. اَ قوچ وأستی قأنونٚ موطأبقٚ اَندر، سوبوک سنگین بٚبه. 7 کأهین اونٚ رِه اَ قوربأنی اَمرأ خوداوندٚ حوضورٚ میأن کفأره کونِه و اونٚ گونأ بٚبخشه بِه.»
سوجأنِئنی قوربأنی قأنونأن
8 او زمأت خوداوند موسایَ بٚفرمأسته: 9 «اَ دستورأنَ دروأرهیٚ سوجأنِئنی قوربأنی فأدٚن هارون و اونٚ پٚسرأنَ. سوجأنِئنی قوربأنی وأستی تومأمٚ شب مذبح آتشدأنٚ رو بٚمأنه و مذبحٚ آتش خأموشَ نٚبه. 10 کأهین خو جیرٚ شین رخت و کتأنٚ رختَ دوکونه و سوجأنِئنی قوربأنی خأکیسترَ اوسأنه، بٚنه مذبح ورجأ. 11 بأزون خو رختَ عوضَ کونٚه و خأکیسترَ بٚبره بیرون جٚه اردوگأ و فوکونه پأکٚ جأجیگأ دورون کی اَ کأرٚ رِه موشخص بوبوسته. 12 کأهین هر روج صُب تأزه هیمه بٚنه اونٚ رو و هر روجٚ شین سوجأنِئنی قوربأنییَ بٚنه اونٚ رو و سلأمتی قوربأنی پییَ اونٚ رو بوسوجأنه. 13 مذبحٚ آتش همیشٚک وأستی روشن بٚمأنه و هیوخت خأموشَ نٚبه.
آردی پیشکشٚ قأنونأن
14 «او قأنونأن کی آردی پیشکشٚ شین ایسٚه اَشأن ایسٚد: کأهین اَنٚ وأسی کی آردی پیشکشییَ خوداوندٚ رِه تقدیم بوکونه مذبح جولو بِئیسه، 15 بأزون ایتأ موشته خورومٚ آرد کی روغن زیتونٚ اَمرأ قأطی بوبوستهیَ او کندُرٚ اَمرأ کی اونٚ رو نٚهأ اوسأنه و خوداوندٚ رِه نومونه مأنستَن مذبحٚ رو بوسوجأنه. اَ پیشکشی خوداوندٚ رِه قأبیلٚ قوبیل بِه. 16 آردٚ البأقی، هارون و اونٚ پٚسرأنٚ شین ایسٚه. اَ آرد وأستی هیذره خمیرمأیه نأشته بو بٚپخته بٚبه و مولأقأتٚ خیمه صأرأ دورون بوخورده بٚبه. 17 اَ قیسمت جٚه آردی پیشکشییَ کی آتشٚ رو خوداوندَ تقدیم بِه، خوداوند فأدأ کأهینأنَ. گونأ قوربأنی و جبرأنٚ قوربأنی مأنستَن، اَ قیسمت جٚه آردی پیشکشییٚم خٚیلی موقدس ایسٚه. 18 هارونٚ پٚسرأن تومأمٚ نتأجأنٚ میأن تأنٚده اَ قیسمت جٚه پیشکشَ بوخورد. اَ پیشکشی کی آتشٚ رو خوداوندَ تقدیم بِه، همیشٚک کأهینأنٚ سأم ایسٚه و دِه هیکس حق نأرِه اونَ دٚس بٚزنه.»
19 بأزون خوداوند موسایَ بٚفرمأسته: 20 «هارون و هرتأ جٚه اونٚ پٚسرأن او روجٚ دورون کی کأهینی موقأمٚ گومأشتگی رِه مَسح بٚده وأستی ای کیلو خورومٚ آرد، هر روجٚ آردی پیشکشٚ اَندر خوداوندٚ حوضور بأوٚرد و اونٚ نیصفَ صُب و اویتأ نیصفَ غروب دٚم خوداوندَ پیشکش بوکونٚد. 21 اَ پیشکشی وأستی خٚکأره رو روغن زیتونٚ اَمرأ بٚپخته بٚبه بأزون تکستکسَ بٚه آردی پیشکشی مأنستَن خوداوندَ تقدیم بٚبه. اَ پیشکشی خوداوندٚ رِه قأبیلٚ قوبیل ایسٚه 22 جٚه هارونٚ پٚسرأن اونی کی مَسح بوبوسته کی اونٚ جأنشین بٚبه، وأستی هه پیشکشَ او روج کی گومأشته بِه خوداوندَ تقدیم بوکونه. اَن اَبدی حوکم ایسٚه. 23 کأهینٚ هرتأ آردی پیشکش وأستی تومأم و کمأل بوسوجأنِه بٚبه و اونٚ جَا ایچی بوخورده نٚبه.»
گونأ قوربأنی قأنونأن
24 خوداوند موسایَ بٚفرمأسته: 25 «دروأرهیٚ گونأ قوربأنی اَ دستورأنَ فأدن هارون و اونٚ پٚسرأنَ. اَ قوربأنی خٚیلی موقدس ایسٚه و وأستی خوداوندٚ حوضورٚ دورون ایتأ جیگأ ذبح بٚبه کی سوجأنِئنی قوربأنیأنَ سٚر وأوینٚده. 26 او کأهین کی قوربأنییَ گونأ رِه پیشکش کونِه، اونٚ گوشتَ مولأقأتٚ خیمه صأرأ دورون کی ایتأ موقدسٚ جیگأ ایسٚه، بوخوره. 27 فقد اوشأنی کی تقدیس بوبوستده، ینی کأهینأن تأنٚده اَ گوشتَ دٚس بٚزند. اگه او قوربأنی خون اَشأنٚ بٚپأشأنه بٚبه رختٚ رو وأستی خوشأنٚ رختَ ایتأ موقدسٚ جأجیگأ دورون بوشؤرٚد. 28 او گمج کی گوشت اونٚ دورون بٚپخته بِه وأستی بٚشکنِه بٚبه. اگه گوشت ایتأ میسی ظرفٚ میأن بٚپخته بوبوستهبی وأستی او ظرفَ تومأم و کمأل تمیزَ کونٚد و آبٚ اَمرأ بوشؤرٚد. 29 هرتأ مردأی جٚه کأهینأنٚ خأنوأر تأنِه جٚه اَ گوشت بوخوره. اَ قوربأنی خٚیلی موقدس ایسٚه. 30 ولی هر وخت کی قدسٚ میأن کفأره رِه گونأ قوربأنی خونَ بٚرٚده مولأقأتٚ خیمه دورون، قوربأنی گوشتَ نوأستی خوردن بلکی وأستی تومأم و کمأل بوسوجأنِه بٚبه.
Actualmente seleccionado:
لاویأن ۶: GCB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Gilaki Contemporary Bible is a Product of Transform Iran © 2024. All rights reserved. www.kelisayejame.org