لاویأن ۴
۴
گونأ قوربأنی
1 خوداوند موسایَ بٚفرمأسته: 2 «اَ دستورأنَ فأدن ایسرأییلٚ قومَ: اگه اینفر نأنستهبو گونأ بوکوده و ایتأ جٚه خوداوندٚ قأنونأنَ لقد دٚمٚج بوکونٚه، وأستی اَ قأنونٚ مأنستَن رفتأر بوکونه:
3 «اگه پیله کأهین گونأ بوکوده بی و اَطؤیی او دودمأنٚم گونأکأر بوبوستٚده، او وخت وأستی خو گونأ رِه ایتأ سأق و سألیمٚ مَنده کی هیذره عأیب و ایرأد نأشتی بی خوداوندٚ رِه پیشکش بوکونه. 4 مَنده بأوٚره مولأقأتٚ خیمه برأسومٚ ورجأ، خو دٚسَ بٚنه اونٚ سٚر و هویَه خوداوندٚ حوضور اونَ سرأ بینه. 5 پیله کأهین ایپچه جٚه مَنده خونَ بٚبره مولأقأتٚ خیمه دورون، 6 خو انگوشتَ فوقأیٚه خونٚ میأن و اونَ خوداوندٚ حوضور هفتوأر بٚپأشأنٚه قدسالاقدأسٚ پرده جولو. 7 بأزون خوداوندٚ حوضور ایپچه او خونٚ جَا وأسینه او بوخورٚ مذبح شأخأنَ کی خیمه دورون نٚهأ. البأقی خونَ فوکونٚه او سوجأنِئنی قوربأنی مذبحٚ پأ جیر کی مولأقأتٚ خیمه برأسوم نیزدیک نٚهأ. 8 بأزون تومأمٚ ترنه پییَ، 9 قلوهیأن و اوشأنٚ رو پی و جگرٚ رو سیفیدییَ اوسأنه. 10 و اوشأنَ سوجأنِئنی قوربأنی مذبحٚ سٚر بوسوجأنٚه. دوروست هوطؤ کی گأبٚ پی کی سلأمتی قوربأنی شینَ سوجأنِه. 11 ولی مَنده البأقی قیسمتأنَ ینی تومأمٚ پوست، گوشت، کله، پأچه، دیل و روده و پِئنَ 12 اردوگأ جَا بیرون ایتأ پأکٚ جأجیگأ بٚبره کی اویَه مذبح کورشه کأیه فوکونٚده و همٚتأنَ هویَه هیمه سٚر بوسوجأنٚه.
13 «اگه تومأمٚ ایسرأییلٚ دودمأن نأنستهبو گونأ بوکوند و ایتأ جٚه خوداوندٚ قأنونأنَ خوشأن لقد دٚمٚج بوکونٚد، اگه چی اَ کأرَ نأنستهبو بوکوده بود، گونأکأر حیسأب بٚده 14 اوشأن او وخت کی بٚفأمستٚده چی گونأ بوکودٚد، وأستی خوشأنٚ گونأیأنٚ کفأره رِه ایتأ کلٚ مَنده قوربأنی بوکونٚد. مَنده بأوٚرد مولأقأتٚ خیمه میأن. 15 و اویَه دودمأنٚ پیلهکسأن خوداوندٚ حوضور خوشأنٚ دسأنَ بٚنٚد حیوأنَ سٚرٚ رو و اونَ ذبح بوکونٚد 16 او وخت پیله کأهین ایپچه جٚه مَنده خونَ بأوٚره مولأقأتٚ خیمه دورون 17 و خو انگوشتَ فوقأیه خونٚ میأن و اونَ خوداوندٚ حوضور هفتوأر بٚپأشأنٚه قدسالاقدأسٚ پرده جولو. 18 بأزون خوداوندٚ حوضور ایپچه او خونٚ جَا وأسینه او بوخورٚ مذبح شأخأنَ کی مولأقأتٚ خیمه دورون نٚهأ و البأقی خونَ فوکونٚه سوجأنِئنی قوربأنی مذبح پأ جیر کی خیمه برأسومٚ نیزدیکی نٚهأ. 19 تومأمٚ پی وأستی مذبح سٚر بوسوجأنٚه بٚبه. 20 پیله کأهین وأستی گونأ قوربأنی هو رأروشٚ جَا پیروی بوکونه. اَطؤیی خودا دودمأنٚ رِه کفأره کونه و اوشأنٚ گونأ بٚبخشِه بِه. 21 اون او مَنده کی قوربأنی بوبوستهیَ اردوگأ جَا بٚبره بیرون و بوسوجأنه، هوطؤ کی خو گونأ قوربأنی مَندهیَ سوجأنِه. اَن تومأمٚ ایسرأییلٚ دودمأنَ گونأ قوربأنی ایسٚه.
22 «اگه ایتأ جٚه رهبرأن نأنستهبو گونأ بوکونه و ایتأ جٚه خو خوداوند، خودا قأنونأنَ لقد دٚمٚج بوکونٚه گونأکأر حیسأب بِه. 23 او وخت کی اون خو گونأیَ بٚفأمسته، وأستی ایتأ نرٚ بوز کی سأق و سألیمه و هیذره عأیب نأشتی بی پیشکش بوکونه. 24 خو دٚسَ بٚنه بوزٚ سٚر و اونٚ او جیگأ میأن کی سوجأنِئنی قوربأنیأنَ سٚرأبینده ذبح بوکونٚه و خوداوندٚ رِه پیشکش بوکونٚه. اَن، اونٚ گونأ قوربأنی ایسٚه. 25 اونٚ پٚسی کأهین ایپچه جٚه گونأ قوربأنی خونَ فیگیرٚه و خو انگوشتٚ اَمرأ وأسینه سوجأنِئنی قوربأنی مذبح شأخأنَ و البأقی خونَ فوکونٚه مذبحٚ پأ جیر. 26 تومأمٚ پی وأستی سلأمتی قوربأنی مأنستَن مذبحٚ سٚر بوسوجأنٚه بٚبه. اَطؤیی کأهین او رهبرٚ گونأ رِه کفأره کونه و اونٚ گونأ بٚبخشِه بِه.
27 «اگه ایتأ عأدی آدم نأنستهبو گونأ بوکونٚه و ایتأ جٚه خوداوندٚ قأنونأنَ لقد دٚمٚج بوکونٚه گونأکأر حیسأب به. 28 او وخت کی اون خو گونأیَ بٚفأمسته وأستی ایتأ مأده بوز کی سأق و سألیمه و هیذره عأیب نأشتی بی خو گونأ رِه قوربأنی بوکونٚه. 29 بوزَ بأوٚره او جیگأ میأن کی سوجأنِئنی قوربأنیأنَ سرأ بینٚد. اویَه خو دٚسَ بٚنه حیوأنٚ سٚر و اونَ ذبح بوکونٚه. 30 کأهین ایپچه جٚه قوربأنی خونَ خو انگوشتٚ اَمرأ وأسینه سوجأنِئنی قوربأنی مذبح شأخأنَ و البأقی خونَ فوکونٚه مذبحٚ پأ جیر. 31 تومأم پی سلأمتی قوربأنی پی مأنستَن، وأستی سیوأ بٚبه مذبحٚ سٚر بوسوجأنٚه بٚبه و اَن خوداوندٚ رِه ایتأ خوشبو پیشکش بِه. اَطؤیی کأهین او آدمٚ گونأ رِه کفأره کونِه و اون بٚبخشِه بِه.
32 «اگه هو آدم بٚخأیه خو گونأ کفأره رِه بٚره قوربأنی بوکونه، او بٚره وأستی مأده و سأق و سألیم بٚبه و هیذره عأیب نأشتی بی. 33 اون وأستی خو دٚسَ بٚنه بٚره سٚر و اونَ او جیگأ میأن کی سوجأنِئنی قوربأنیأنَ سرأ بینٚد گونأ قوربأنی رِه ذبح بوکونٚه. 34 کأهینٚ ایپچه جٚه او خونَ خو انگوشتٚ اَمرأ وأسینه سوجأنِئنی قوربأنی مذبحَ شأخأنَ و البأقی خونَ فوکونٚه مذبحٚ پأ جیر. 35 اونٚ پی سلأمتی قوربأنی بٚره پی مأنستَن مذبحٚ سٚر بوسوجأنٚه بٚبه کأهین اونَ او قوربأنیأنٚ مأنستَن کی آتش سٚر خوداوندٚ رِه پیشکش بِه، بوسوجأنٚه. اَطؤیی کأهین او آدمٚ گونأیَ کفأره کونِه و اون بٚبخشِه بِه.
Actualmente seleccionado:
لاویأن ۴: GCB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
The Gilaki Contemporary Bible is a Product of Transform Iran © 2024. All rights reserved. www.kelisayejame.org