TIRHTHLAH 12
12
Hremnak A Tam Sinsin
1Hi caan hrawngah Siangpahrang Herod#12.1 Herod hi Judea ram zate uktu Herod Agrippa I a si. AD 37 thokin Saklam Transjordan uknak ram Filip ukmi kha a co ih AD 41 ihsin 44 tiang Judea ram zate in a uk. A pu cu Herod Lian a si. in kawhhran sungih Khristian ṭhenkhat pawl hrem a thok. 2Johan unau Jeim kha ralnam hmang-in a thahter ih, 3cumi cun Judah mi pawl an lung a awiter ti a hmuh tikah Piter khal a kaihter. (Himi cu Thilnu tello Sang Puai tuah laifangah a si.) 4Piter cu an kai ih thawngah an thlak; thawnginn kiltu ralkap bur li an um ih bur khatah ralkap pali fingfing an um; cu pawl ih kil dingin an kut sungah an pek. Lantak puai ṭheh tikah zapi hmaiah a thu cu rel dingin Herod ih tumtahmi a si. 5Cuti cun Piter cu thawng sungah an ret, asinain a hrangah kawhhran pawl in Pathian hnenah napi in thla an camsak.
Thawng Sungin Piter A Suak
6Herod in a thaisun mipi hmaiah Piter ih thu ka rel ding a ti ni zanah Piter cu thawnginn kiltu ralkap pahnih karlakah a it. Thir cikcin pahnih in an khih ih thawnginn kotka khal an kil ṭheh. 7Rinlopi-ah Bawipa ih vancungmi a rung ding ih an ihnak khaan cu tleunak in a run tleuter. Vancungmi in Piter cu a liang in a hnin ih, “Zamrang in tho aw!” tiah a ṭhang. Hmakhatte-ah Piter ih kut ihsin thir cikcin cu an poihtla. 8Cule vancungmi in, “Na taikhap khap awla na kedam dam aw,” tiah a ti. A tivek cun Piter in a tuah ih vancungmi in, “Na puan sin awla i thlun aw,” tiah a ti. 9Piter cun a thlun ih thawnginn lengah an suak; vancungmi in cuti ih a tuah cu thungai a si dingah a ruat lo; langnak ka hmu a si ding, tiah a ruat aw. 10Ralkap ih an kilnak kotka pakhatnak cu an lan, cule a pahnihnak tla an lan thotho. A netnak ah khawpi sung thawn a peh-awmi thir kotka an thleng. Cuih kotka cu an hrangah amahte in a ong aw ih an pahnih in an suak. Lamzin an vun zawh ih rinlopi ah vancungmi cun a hlohsan ih Piter lawng a taang.
11Cutikah a parih a cangmi thil pawl cu fiangtein a hun thei ngah ih, “Atu cu a cangmi ngaingai a si ka thei zo! Herod thuneihnak sungin le Judah mi pawl in ka parih cang dingin saduh an thahmi hmuahhmuah sung ihsin runsuak dingah Bawipa in a vancungmi a run thlah a si hi!” tiah a ti.
12Thil a cangmi a theih ngah hnuah Johan Marka ih nu Mari ih inn ah a feh; cutawkah mi tampi an khawm aw ih thla an cam rero. 13Piter cun a leng ihsin sangka a vun king ih Roda timi hnen-um nu cu sangka ong dingin a ra. 14Piter ih aw a si ti a theih tikah a lung a awi tuk ih sangka hman ong loin, “Inn lengah Piter a ding a si!” tiah a au. 15Annih in, “Na aa maw si?” tiah an ti. Sikhalsehla, a si ngaingai sokhaw, a ti ringring ruangah, “A vancungmi a si pei cu!” an ti thotho.
16Piter in sangka cu cat loin a king rero. A net-ah sangka cu an ong ih Piter a si kha an hmuh tikah an mang a bang ngaingai. 17Piter cun daiteih um dingin a zaa a zaap ih, Bawipa in thawng sung ihsin a suahnak thuhla kha an hnenah a sim. “Hi thu hi Jeim#12.17 Jeim hi Jesuh ih naupa Jeim a si. le a dang zumtu pawl sim uh,” tiah a ti ih a suak ih hmun dangah a feh.
18Zinglam khua a van tikah thawnginn kiltu ralkap pawl cu, Piter ziang a cang a si pei, tiah an buai nasa. 19Piter hawl dingah Herod in thu a pek; asinain an hmu lo. Curuangah thawnginn kiltu pawl cu an thu a zingzoiter ih that dingin thu a pek.
Cuih hnuah Judea ram ihsin Herod cu a suak ih Sisaria khua ah caan tawkfang a hmang.
Herod A Thi
20Herod cu Tai-ar le Sidon mi pawl parah a thin a heng ngaingai; curuangah cuih khuami pawl cu Herod tong dingah a bur in an feh. A hmaisabik ah siangpahrang innih hotu bik Blastas kha an hnenih ṭang dingin an sawm. Cule Herod hnenah cun an va feh ih daihnak le remnak tuah dingin an va dil. Ziangah cutiin an dil tile an rammi pawl ih rawl an ngahmi cu Herod siangpahrang ukmi ram sung ihsin a rat ruangah a si.
21An ni tinh ni ah Herod cu a siangpahrang thilthuam in a thuam aw ih a tokham ah a to ih mipi hnenah thu a sim. 22Cutikah mipi in, “Hitiih a ṭongtu hi milai a si ual lo, pathian a sisi!” tiah an au. 23Hmakhatte-ah Bawipa ih vancungmi in Herod cu natsiava in a natter, ziangahtile Pathian kha upatnak a pek lo ruangah a si. Herod cu a rulkhuk in a sunglam an ei thluh ih a thi.
24Pathian ih thu cu a zai ih a ṭhang vivo.
25Barnabas le Saul cu an hnaṭuan dingmi an ṭuan ṭheh ruangah Jerusalem ihsin Johan Marka an hruai ih an kir.
Actualmente seleccionado:
TIRHTHLAH 12: FCL
Destacar
Compartir
Comparar
Copiar
¿Quieres guardar tus resaltados en todos tus dispositivos? Regístrate o Inicia sesión
Falam Bible Revision © Bible Society of Myanmar, 2002.
