रोमि 10
10
1दादाओने बाइओनेगेलाइ, का कोन्धाङसो दोङ इस्राएलिगेलाइहेङ परमेस्वर छुटकारा प्याको दोअ्तेङ खाङलि भोखा। इङकोभाअ्सिङ एम्बालाइ छुटकारा निनाको दोअ्तेङ का परमेस्वरदोफा पारथाना पाखा। 2एम्बालाइ परमेस्वरहेङ कोन्धाङसो दोङ पिताइलि भोखे दोअ्तेङ का गिखा। कालाउ वासेहेङ हेसापा पिताइलि गोयाङ दोअ्तेङ एम्बालाइ मागिखे। 3हाइदोनु एम्बालाइ धरमाति बान्हाइका परमेस्वरको दामा मानाल्हि। कालाउ एम्बालाइ ताइकोङ जुक्तिसो धरमाति जेङलि भोहि। इङकोभाअ्सिङ द्याङगेलाइहेङ धरमाति बान्हाइका परमेस्वरको रेम्का दामाहेङ एम्बालाइ मार्हुहि। 4हाइदोनु ख्रिस्ट दोङ न्याम पोङघापाहि। इदोइभाअ्सिङ जाइ ख्रिस्टता खान्धुर पाखे इङको झाराङ द्याङगेलाइ धरमाति जेङखे।#मत्ति ५:१७
झाराङको भाअ्सिङ छुटकारा
5न्यामको पिका धरमातिको बारेता मोसा इस्का लेखिका हि, “न्याम आन्सार चलिका द्याङ इङकोङसो सिन्हुतावा।”#लेबि १८:५ 6कालाउ खान्धुरसो पिका धरमातिको बिसाइता धरमकिताब एसा दोअ्खे, “नेलाइ ताइमिङ माहिअ्सु, ‘ख्रिस्टहेङ लेता खुअ्पालि स्वरगता हासु हानाङ?’”#न्याम ३०:१२-१४ 7“नेलाइ ताइको मनता एसा बुङ मादोअ्सु ‘ख्रिस्टहेङ सिकालाइसो घुरिपालि पातालता हासु हानाङ?’” 8धरमकिताबता इस्का लेखिका हि, “छुटकारा पिका बचन नेलाइको भेरपा हि, इङको नेलाइकोङ नुइता रो कोन्धाङता हि।” इदोइ बचन खान्धुरको बचन रो जेदोङ बचन केलाइ द्याङगेलाइहेङ पारचार पान्हाखे। 9कालाउ नेलाइ ताइको नुइहोइ इसु दोङ प्रभु हि दोअ्तेङ बोमिहेङ दोअ्सुखेना पानु रो परमेस्वर इसुहेङ सिकासो सिन्हुपाहि दोअ्तेङ ताइको कोन्धाङता खान्धुर पासुखेना पानु, नेलाइको छुटकारा ज्यावा। 10हाइदोनु जेदोङ द्याङ ताइको कोन्धाङसो खान्धुर पाखे, वा धरमाति ठार्हाइन्हाखे। कालाउ जेदोङ द्याङ ताइमिको खान्धुर पाका काथा बोमिहेङ हिङपाखे, वा छुटकारा निङखे। 11धरमकिताबता इस्का लेखिका हि, “जाइ वाता खान्धुर पाखे, इङको हेअ्लाउ बुङ लेदेरता मापर्यावा।”#यासाइया २८:१६ 12हाइदोनु यहुदि रो बोजात्याता हाइदोङ फाराक मान्थु। वादोङ परमप्रभु झाराङको एलोङदोङ प्रभु हि। कालाउ जाजाइ वाता खान्धुर पाखे, इङको झाराङहेङ वा इस्तुङ सहसाम्पा प्यावा। 13हाइदोनु धरमकिताबता इस्का लेखिका हि, “परमप्रभुको मिङ काइका झाराङ छुटकारा निनावा।”#योएल २:३२
14कालाउ प्रभुहेङ नाल्का खान्तेङ लाम्फा द्याङगेलाइ वासेहेङ खान्धुर पालिगोइखे। कालाउ खान्धुर पाकाखान्तेङ लाम्फा एम्बालाइ वाको बारेता हिङलिगोइखे। कालाउ वाको बारेता हिङपालि हासुङ एम्बालाइहेङ पारचार पालिगोइखे। 15हासुङ मादिङगिल्सिङ द्याङगेलाइ हेसापा पारचार पालि? धरमकिताबता इस्का लेखिका हि, “रेम्काबानाल पारचार पाकालाइ लोलाउ हेथे सुकाका काथा।”#यासाइया ५२:७
16कालाउ झाराङ इस्राएलिगेलाइ इङको रेम्काबानालहेङ मासाअ्हि। परमेस्वर पाहासो धुइका यासाइया एसा दोअ्खे, “प्रभु, केलाइको हिङपाका परमेस्वरको रेम्काबानाल हिङतेङ हासु खान्धुर पाहि?”#यासाइया ५३:१ 17केलाइ गिन्हाखे, जेदोङ हिङका हि, इङकोङसो खान्धुर लोखे रो जेदोङ हिङखे इङको ख्रिस्टको पारचारसो लोखे। 18कालाउ का हिअ्खा, “हाइ एम्बालाइ रेम्काबानाल हिङका मान्थु?” जातिङकोङ एम्बालाइ हिङका हि। धरमकिताबता लेखिका हि:
“एम्बालाइको बानाल सुमिङको गोताङ थामेगेलाइता थुकाका हि।
एम्बालाइको बचन दुनियाको गोताङ थामेगेलाइता थुकाका हि।”#ले १९:४
19का आरोङ हिअ्खा, “हाइ इस्राएलको द्याङगेलाइ माबुझिहि?” एम्बालाइ बुझिनु ते बुझिहि, कालाउ मातेरेहि। परमेस्वर लाम्फादोङ मोसासो एम्बालाइहेङ एसा दोअ्का हिघाखे:
“का बोजात्यागेलाइहेङ सहसाम्पा पितेङ एम्बालाइहेङ इख बान्हायाङका,
का एलोङ आकिल मान्थुका जात्याहेङ माया पातेङ नेलाइहेङ चेर ताम्पाप्याङका।”#न्याम ३२:२१
20परमेस्वरको दोअ्का काथा परमेस्वर पाहासो धुइका यासाइया माथिसिङ एसा दोअ्खे:
“जेदोङ द्याङगेलाइ कासेहेङ भोकाङ मान्थुघाहि, एम्बालाइ दोङ कासेहेङ निङहि।
जाइ कासेहेङ हिअ्काङ मान्थुघाहि, का एम्बालाइकोता देखाल जेङघा।”#यासाइया ६५:१
21कालाउ इस्राएलको बारेता परमेस्वर एसा दोअ्खे:
“दिनाङ का इङको द्याङगेलाइहेङ र्हुम्घा।
कालाउ एम्बालाइ काङको काथा मासाअ्हि रो कासेहेङ बुङ मापिताइहि।”#यासाइया ६५:२
© 2025 by Nepal Bible Society and Wycliffe Bible Translators, Inc.