युहन्ना 1
1
बचन जिउ जेङहि
1लाम्फोरति बचन हिघाहि, बचन परमेस्वरदोफा हिघाहि, कालाउ बचन परमेस्वर हिघाहि। 2वा लाम्फोरति परमेस्वरदोफाङ हिघाहि।
3गोताङ थोक वासो सिरजाइन्हाहि, सिरजाइन्हा हिदिङ थोक बुङ वामाकोसा मासिरजाइन्हाहि। 4वाता जिबन हिघाहि रो इङको जिबन द्याङगेलाइको फाइसालाम्का हिघाहि। 5इङको फाइसालाम्का कितिकितिकाता चिल्काखे रो कितिकितिका इङकोहेङ जितिलि दोका मान्थु।
6परमेस्वरसो दिङगिल्का एअ्मि द्याङ हिघाखे, जाइको मिङ युहन्ना हिघाहि।#मत्ति ३:१; मरकुस १:४; लुका ३:१,२ 7वासो झाराङ द्याङगेलाइ खान्धुर पालि द्वाको दोअ्तेङ इङको फाइसालाम्काको दासि पिलि वा दासि जेङतेङ लोहि। 8युहन्ना ताइमिङ इङको फाइसालाम्का मान्थुघाहि, कालाउबुङ वा इङको फाइसालाम्काहेङ दासि पिलि लोहि।
9झाराङ द्याङगेलाइहेङ आकिल पिका जातिङको फाइसालाम्का दुनियाता लोदोङघाहि। 10वा दुनियाता हिघाहि, दुनिया वाकोसो सिरजाइन्हाहि, कालाउबुङ दुनियाको द्याङगेलाइ वासेहेङ मानाल्हि। 11वा ताइकोङ द्याङगेलाइकोता लोहि, कालाउबुङ वाको ताइको द्याङगेलाइ वासेहेङ मार्हुहि। 12कालाउबुङ जाइ वासेहेङ र्हुहि रो वाको मिङता खान्धुर पाहि, वा एम्बालाइहेङ परमेस्वरको चानचामिन्दि जेङका खाबारा पिहि। 13एम्बालाइ हितिसो, जिउको इछासो रो हिदिङ द्याङको इछासो माको, कालाउबुङ परमेस्वरदोङ एम्बालाइहेङ ताइको चानचामिन्दि बान्हाइहि।
14कालाउ बचन द्याङ जेङहि, वा निगाहा रो सत्तेसो पोङघातेङ केलाइको माझाता बासा हि। केलाइ वाको पारताप तिङन्हाहि, जेदोङ पारताप आबासो लोका एअ्मिखिनिङ चानको भाइका हिघाहि।
15युहन्ना वाको बारेता दासि पितेङ बारका गालाता दोअ्हि, “वा इङको खामाल हि, जाइको बारेता का दोअ्घा, ‘कान्हुअ्सो लोका काखान्तेङ हेन्जा बारका हि, हाइदोनु वा काखान्तेङ लाम्फासोङ हिघाहि।’”
16वाको निगाहासो केलाइ एलोङ निगाहार्हुता भेनेङ निगाहा निङका हिन्हाहि। 17हाइदोनु न्याम मोसासो पिहि, कालाउबुङ निगाहा रो सत्तेचाहिँ इसु ख्रिस्टसो लोहि। 18परमेस्वरहेङ हासु बुङ हेअ्लाउ तिङका मान्थु। कालाउबुङ आबाको दोसा हिका एअ्मिखिनिङ चान वासेहेङ तिङपाका हि।
चिभुअ्लि पिका युहन्नाको दासि
(मत्ति ३:१-१२; मरकुस १:१-८; लुका ३:१-१८)
19जेलाउ यरुसलेमसो यहुदि आगुवागेलाइ धामिगेलाइ रो लेबिगेलाइहेङ वाकोता “ना हासु?” दोअ्का काथा हिअ्लि दिङगिल्हि, कालाउ युहन्नाको दासि इदोइ हिघाहि। 20कालाउ वा सोझाङ दोअ्हि, “का ख्रिस्ट माको।”
21कालाउ एम्बालाइ वासेहेङ हिअ्हि, “एन्सानु ना एलिया हिन्हा?”
युहन्ना दोअ्हि, “आहाँ माको।”
एम्बालाइ हिअ्हि, “हाइ ना इङको परमेस्वर पाहासो धुइका हिन्हा?”
वा दोअ्हि, “माको।”#मलाकि ४:५; न्याम १८:१५,१८
22एम्बालाइ वासेहेङ दोअ्हि, “ना हासु कुनु? केलाइहेङ दोअ् रो केलाइहेङ दिङगिल्कालाइहेङ केलाइ दोअ्लि द्वाको। ना ताइको बारेता हाइ दोअ्खेना?”
23युहन्ना दोअ्हि, “यासाइया परमेस्वर पाहासो धुइकाको दोअ्का भाइपाङ का ‘प्रभुको दामा त्यार पासु’ दोअ्तेङ उदादाङका थामेता र्हिकाइका एअ्मि खामालको का गाला।”#यासाइया ४०:३
24इङको हिअ्लि लोकालाइहेङ फरिसिगेलाइ दिङगिल्का हिघाखे। 25कालाउ एम्बालाइ युहन्नाहेङ हिअ्हि, “ना ख्रिस्ट बुङ माको, एलिया बुङ माको, केलाइको दामा खाङका इङको परमेस्वर पाहासो धुइका बुङ माकुनु, हाइपालि चिभुअ्लि पिखेना?”
26युहन्ना एम्बालाइहेङ दोअ्हि, “काते चिहोइ चिभुअ्लि पिखा, कालाउबुङ नेलाइको माझाता एअ्मि जाअ्का हि, जाइहेङ नेलाइ मानालसुखेना। 27कान्हुअ्सो लोका वादोङ हि। का वाको जुताको तुना खाइलि लाएकको बुङ मान्थुघा।”
28इदोइ काथा यरदन झोरा ओदोइपार बेथानियाता जेङका हिघाखे, जेता युहन्ना चिभुअ्लि पिदोङघाखे।
परमेस्वरको भेरा इसु
29जुम्निदिना युहन्ना इसुहेङ ताइमिभारि लोतेङहिका तिङतेङ दोअ्हि, “खाङसु, दुनियाको द्याङगेलाइको पाप तोल्हेतेङचुम्पुका परमेस्वरको भेरा! 30वा वादोङ हि जाइको बारेता का दोअ्का हिघाखा, ‘कान्हुअ्सो एअ्मि लोदोङखे, जाइ काखान्तेङ बारका हि, हाइदोनु वा काखान्तेङ लाम्फासोङ हिघाहि।’ 31का ताइमिङ वासेहेङ नाल्का मान्थुघाखा, कालाउबुङ वा इस्राएलता देखाल ज्याको दोअ्तेङ दोङ चिहोइ चिभुअ्लि पितेङ लोघा।”
32युहन्ना एसा दोअ्तेङ दासि पिहि, “का परमेस्वरको हाङसाहेङ कुरजाको रुपता स्वरगसो खुअ्तेङ वार्हुता योम्का तिङघा। 33का वासेहेङ नाल्का मान्थुघाघा, कालाउबुङ जाइ कासेहेङ चिहोइ चिभुअ्लि पिलि दोअ्तेङ दिङगिल्हि, वादोङ कासेहेङ एसा दोअ्का हिघाहि, ‘जाइर्हुता ना परमेस्वरको हाङसाहेङ खुअ्तेङ रो योम्तेङ हिका तिनाना, पुनित हाङसाहोइ चिभुअ्लि पिका वादोङ हि।’ 34का तिङका हिघा रो दासि पिका हिघा, परमेस्वरको चान वादोङ हि।”
इसुको लाङ चात्यागेलाइ
35आरोङ भेनेङ दिना युहन्ना वाको चात्यागेलाइता न्हेमिदोफा जाअ्तेङ हिघाखे। 36वा इसुहेङ हानितेङहिका तिङतेङ दोअ्हि, “खाङसु, परमेस्वरको भेरा!” 37वाको दोअ्का इदोइ काथा हिङतेङ इङको न्हेमि चात्यागेलाइ इसुहेङ पिताइहि।
38इसु घुरितेङ खाङहि रो एम्बालाइहेङ न्हअ्न्हुअ् लोतेङहिका तिङतेङ हिअ्हि, “नेलाइ हाइ भोदोङसुखेना?” एम्बालाइ वासेहेङ दोअ्हि, “मास्टर, ना हिता हिखेना?”
39वा एम्बालाइहेङ दोअ्हि, “लोसु, नेलाइ तिङस्वाना।” इङको पहर दिलिमाको द्या बजेलि तोम्का हिघाहि। एम्बालाइ इसुदोफा हानिहि, कालाउ वाको हिका थामे खाङहि रो इङको दिना वाकोदोफाङ बासा हि।
40युहन्नाको दोअ्का काथा हिङतेङ इसुहेङ पिताइका न्हेमिता एअ्मिचाहिँ सिमोन पत्रुसको ओने आन्द्रियास हिघाखे। 41वा लाम्फा ताइको दादा सिमोनहेङ दुसुहि रो वासेहेङ दोअ्हि, “केलाइ मसिहहेङ (हिब्रु राउता जाइको माने ख्रिस्ट) दुसुका हिन्हाहि।” 42आन्द्रियास सिमोनहेङ इसुकोता चुमाहि।
इसु सिमोनहेङ खाङहि रो दोअ्हि, “ना योआनेसको चान सिमोन हिन्हा। खाङ, ना केफास (जाइको माने, उन्ठुइ) दोअ्न्हावा।” (जाइको माने ग्रिक राउता पत्रुस जेङखे।)
फिलिप रो नथानेल
43जुम्निदिना इसु गालिल माउजाता हानिलि बिचार पातेङ ओल्हिहि। इङकोङ पहर वा फिलिपहेङ दुसुहि रो दोअ्हि, “कासेहेङ पिताइ।”
44आन्द्रियास रो पत्रुसभाइपाङ फिलिप बुङ बेथसेदा पुरको दोङ हिघाखे। 45फिलिप नथानेलहेङ दुसुतेङ दोअ्हि, “जाइको बारेता मोसा न्यामता रो परमेस्वर पाहासो धुइकालाइ बुङ लेखिका हिघाखे, योसेफको चान नासरतको इसुहेङ केलाइ दुसुका हिन्हाहि।”
46नथानेल इङकोहेङ दोअ्हि, “हाइ नासरतसो हिदिङ रेम्का काथा लोलि द्वावा कुनु?”
फिलिप इङकोहेङ दोअ्हि, “लोतेङ खाङ।”
47इसु नथानेलहेङ ताइमिभारि लोतेङहिका तिङतेङ इङकोको बारेता इसु दोअ्हि, “एअ्मि जातिङको इस्राएलिहेङ खाङसु, जाइता हाइदोङ जाल मान्थु।”
48नथानेल वासेहेङ हिअ्हि, “ना कासेहेङ हेसापा नालन्हा?”
इसु इङकोहेङ दोअ्हि, “फिलिप नासेहेङ काइका लाम्फा, दुमरिको सिङलेता का नासेहेङ तिङका हिघाखा।”
49नथानेल वासेहेङ दोअ्हि, “मास्टर, ना परमेस्वरको चान हिन्हा रो ना इस्राएलको राजा हिन्हा।”
50इसु इङकोहेङ दोअ्हि, “का नासेहेङ दुमरिको सिङलेता तिङघा दोअ्नाङ दोङ ना खान्धुर पाखेना? ना इदोइखान्तेङ आरोङ बारका काथागेलाइ तिनाना।” 51कालाउ इसु इङकोहेङ दोअ्हि, “जातिङको, का नासेहेङ दोअ्खा, नेलाइ स्वरग हेनाका रो परमेस्वरको स्वरगदुतगेलाइ द्याङको चानर्हुता ताङतेङ रो खुअ्तेङ हिका तिङस्वाना।”#सिरजाइ २८:१२
Actualmente seleccionado:
युहन्ना 1: DHIM
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2025 by Nepal Bible Society and Wycliffe Bible Translators, Inc.
