ULANGEN 10
10
Ialoken Musa sekali nari Sepuluh Perentah TUHAN
(Kel 34:1-10)
1“Nina TUHAN man bangku, ‘Pahati dua lambar batu bagi si mbarenda, janah bahan sada peti kayu ingan munikenca. Kenca bage reh lah kam ngadap Aku ku das deleng enda, 2gelah Kusuratken i babo batu si dua lambar e, kai si enggo Kusuratken i babo batu si iperperkenndu mbarenda, kenca bage tamakenndu lah e ku peti ndai.’
3E maka kubahan sada peti i bas kayu si mejile nari, ras kupahat ka dua lambar batu bagi si tangtangna mbarenda, jenari kubaba ku das deleng e. 4Kenca bage isurati TUHAN batu si dua lambar ndai; kata-katana bali ras si enggo isuratkenNa i bas papan batu si pemena mbarenda, e me Sepuluh Perentah si enggo i iberekenNa man bandu, sanga IA ngerana i bas api nari paksa kam pulung i deleng e. Ibereken TUHAN man bangku papan batu si dua e, 5e maka nusur aku i das deleng e nari. Kenca bage, sue ras perentah TUHAN, kutamaken batu si dua lambar ndai ku bas peti si enggo kusikapken e, janah mulai i bas paksa e nari i je me batu e.
( 6Bangsa Israel nadingken sumur-sumur bangsa Jaakan e, e maka lawes ia ku Mosera. I Mosera me Harun mate ras ikuburken. Anakna Eleasar nggantiken ia jadi imam. #Bil 20:28; 33:38 7I jenari lawes bangsa Israel ku Gudgot e maka ku Jotbata, ingan si melala i je lau. 8I bas paksa e, itangkuhken TUHAN suku Lewi njagai Peti Perpadanen e, ndahiken dahin TUHAN selaku imam dingen masu-masu bangsa Israel i bas gelar TUHAN. E me tugas kalak e seh ngayak genduari. #Bil 3:5-8 9E me sabapna maka suku Lewi la dat taneh bagi suku-suku si deban; si ialokenna e me kehamaten jadi imam-imam TUHAN, bagi si enggo ipadanken TUHAN Dibatandu.)
10Empat puluh wari empat puluh berngi dekahna aku tading i das deleng e, bali ras perbahanenku si tang-tangna mbarenda. Ibegiken TUHAN aku sekali nari, janah setuju IA maka la kam ikernepkenNa. #Kel 34:28 11Kenca bage isuruhNa aku lawes mabai kam, gelah banci man bandu taneh si enggo ipadankenNa man nini-ninindu.”
Tuntuten TUHAN
12“Genduari o, bangsa Israel, begikenlah kai si ituntut TUHAN Dibatandu man bandu: Sembah lah TUHAN; dahiken kerina si iperentahkenNa. Kelengi lah IA; dahi lah dahinNa alu bulat ukurndu, 13dingen ikutken kerina undang-undangNa. Kubereken undang-undangNa man bandu sendah tama kesangapen man bandu. 14Langit si meganjangna kal pe TUHAN empuna. Doni ras kerina isina pe TUHAN kap empuna. 15Tapi mbelin kal kekelengen TUHAN man nini-ninindu, e maka ipilihNa kam i bas kerina bangsa-bangsa nari; janah seh asa genduari pe kam tetap denga bangsa pilihenNa. 16E maka mulai genduari nari, erkemalangenlah man TUHAN olanai mekeng. 17TUHAN Dibatandu, ganjangen kap asa kerina dibata-dibata ras gegehen asa kerina kuasa-kuasa si deban. IA kap Dibata si mbelin dingen mbisa, janah si nasa lit mbiar man baNa. La IA rayo-ayo ras la IA nggit ngalo sogok. #Perb 10:34; Rom 2:11; Gal 2:6; Ep 6:9; 1Tim 6:15; Ket 17:14; 19:16 18IjagaNa tuhu-tuhu maka kebujuren idalanken nandangi anak-anak melumang ras man diberu balu-balu. IA erkeleng ate man kalak pertandang si ringan i tengah-tengah bangsanta, janah iberekenNa pangan ras uis. 19E maka cidahkenlah kekelengen man kerina pertandang, erkiteken kam pe mbarenda kalak pertandang nge i Mesir. 20Erkemalangenlah kam man TUHAN Dibatandu janah IA saja lah sembah. Setialah man baNa, janah adi kam erpadan, erpadanlah i bas gelarNa saja. 21Puji lah IA, sabap IA kap Dibatandu; enggo iidahndu alu matandu jine, perkara-perkara si mbelin ras mejin si ibahanNa man gunandu. 22Sanga nini-ninindu lawes ku Mesir, pitu puluh kalak ngenca ia. Tapi genduari enggo bali ras bintang-bintang i langit bilangenndu ibahan TUHAN Dibatandu.” #Kej 15:5; 22:17; 46:27
Actualmente seleccionado:
ULANGEN 10: BTX
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Batak Karo Bible © Indonesian Bible Society, 2003.
