2 SAMUEL 2
2
Daud itangkuhken jadi raja Juda
1Kenca si e nungkun Daud man TUHAN nina, “Arus kin maka aku lawes ngkuasai sada i bas kuta-kuta Juda?”
“Ue,” nina TUHAN njabapsa.
“Si apai?” nina Daud nungkun.
“Hebron,” nina TUHAN. 2E maka lawes Daud ku Hebron, ikut ras ia duana ndeharana: Ahinoam i Jesreel nari, ras Abigail, janda Nabal i Karmel nari. #1Sam 25:42-43 3Ibabana pe anak buahna, ras keluargana, e maka ringan ia i bas kuta-kuta kelewet Hebron. 4Kenca bage reh rayat Juda ku Hebron itangkuhkenna Daud jadi raja Juda.
Kenca ibegi Daud maka Saul enggo ikuburken kalak Jabes i daerah Gileat, #1Sam 31:11-13 5isuruhna piga-piga anak buahna ku jah alu tenah, “TUHAN si masu-masu kam, sabap icidahkenndu kesetianndu man rajandu alu ngkuburken Saul. 6E maka icidahken TUHANlah kiniulinNa ras kesetianNa man bandu. Aku pe si mehuli kubahan man bandu perbahan kai si enggo ibahanndu e. 7Jadilah megegeh janah ola mbiar! Rajandu Saul enggo mate janah aku enggo itangkuhken kalak Juda jadi rajana.”
Isboset jadi raja Israel
8Abner anak Ner puanglima tentera Saul, enggo lompat maba Isboset anak Saul ngepari Lau Jordan ku Mahanaim. 9I jah Isboset ijadiken Abner jadi raja daerah Gileat, Aser, Jesreel, Eperaim ras Benyamin, janah si tuhuna ia jadi raja kerina i daerah Israel. 10Sanga ia jadi raja Israel umurna enggo empat puluh tahun, janah lit dua tahun dekahna ia jadi raja.
Tapi suku Juda tetap setia man Daud, 11e maka ia merentah Juda i Hebron lit pitu tahun enem bulan dekahna.
Perang Israel ras Juda
12Abner ras anak buah Isboset lawes i Mahanaim nari ku kuta Gibeon. 13Joap, gelar nandena e me si Seruya, ras anak buah Daud si deban jumpa ras pihak Isboset i kolam Gibeon. Kundul ia kerina i tepi kolam e, sada terpuk arah tepi si enda, janah sada terpuk nari arah tepi si deban. 14Nina Abner man Joap, “Buat piga-piga anak perana i bas kam nari gelah si adu rubat make senjata ras anak perana si ras aku enda.”
“Banci,” nina Joap njabapsa.
15E maka ku lebe me sepuluh dua kalak wakil suku Benyamin si arah Isboset ngelawan sepuluh dua kalak anak buah Daud. 16Sekalak-sekalak nangkap takal ras nebakken pedangna ku awak imbangna, e maka dua puluh empat kalakna guling ras mate. Erkiteken si e maka ingan e ibahan gelarna “Juma Pedang”.
17Jenari jadi me perang si mesangat janah italuken tentera Daud si Abner ras bangsa Israel. 18Anak Seruya si telu kalak e lit i je e me: Joap, Abisai ras Asahel. Asahel si ngasup kiam bali pedasna ras belkih ketang, 19pinter ngayaki Abner. 20Itulihken Abner ku pudi janah nina, “Kam nge, Asahel?”
“Ue,” nina Asahel njabapsa.
21“Olanai ayaki aku!” nina Abner. “Ayaki sekalak tentera ena, jenari buat si lit i bas ia.” Tapi la iayaki Asahel. 22Nina Abner sekali nari man Asahel, “Olanai aku ayaki! Engkai maka ipaksandu aku munuh kam? Uga kari ningku encidahken ayongku man seninandu Joap?” 23Tapi Asahel tetap la nggit ngadi e maka ipantemken Abner lembingna ku beltek Asahel, janah telpus arah gurungna. Guling si Asahel mate. E maka kalak si mentas arah inganna terdang e, ngadi janah tedis i je.
24Tapi Joap ras Abisai ngayaki Abner, janah kenca ben wari seh ia ku uruk Amma, i Timur Giah, i bas dalan ku gurun pasir Gibeon. 25Tentera i bas suku Benyamin nari pulung ka i kelewet Abner janah ertahan ia i datas sada uruk-uruk. 26Ilebuh Abner si Joap nina, “Arus kin terus kita erperang rasa lalap? Ma ietehndu nge maka si pagitna ngenca pagi kedungenna? Kami pe teman sebangsandu nge. Asa kai nari dekahna isuruhndu tenterandu ngayaki kami?”
27“Ersumpah aku i bas gelar Dibata si nggeluh,” jabap Joap, “maka adi la kam ndai ngerana tetap kam iayaki tenterangku seh ngayak pagi erpagi-pagi.” 28Kenca bage iembus Joap terompet jadi tanda man tenterana maka ngadi ngayaki bangsa Israel. E maka enggo ngadi peperangen e.
29I bas gedang-gedang berngi e, Abner ras tenterana terus erdalan arah Baluren Lau Jordan. Ikeparina Lau Jordan, janah kenca erdalan erpagi-pagi nari, seh ia i Mahanaim kenca ciger.
30Kenca enggo ngadi Joap ngayak-ngayak, ipepulungna kerina tenterana. Lit sepuluh siwah kalak si bene seakatan Asahel. 31Tentera Daud enggo munuh 360 kalak tentera Abner i bas suku Benyamin nari. 32Ilegi Joap ras tentera mait Asahel, ikuburkenna i kuburen keluargana i Betlehem. Jenari erdalan ia gedang-gedang berngi e, janah nandangi terang wari seh ia i Hebron.
Actualmente seleccionado:
2 SAMUEL 2: BTX
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Batak Karo Bible © Indonesian Bible Society, 2003.
