মথি 8

খনচিরিত্তামগিবা সাকসা নামজক

1যীশু হা·ব্রিওনি হং·খাতানি জা·মানো মান্দি বাং·বিয়া বিমুং রি·য়াংফাজক। 2উনো খনচিরিত্তামগিবা সাকসা রি·বাএ বিখো অলাখিয়ে আগানজক, ‘‘গিত্তেল, না·আ হা·সিকমানচাওদে আংখো নাম্মেতনা মা·ন্না।’’

3যীশু জাকথাংখো সিল্লে বিখো দাংথাপেতে আগানজক, ‘‘না·আ রংথালবো, ইখোন আংআ হা·ম্মা।’’ উনোন উয়া মান্দিনি খনচিরিত্তামা নাম্মাংজক। 4যীশু বিনা আগানজক, ‘‘নিবো, দারাংনাবা ইয়া খাৎথাখো দা·আ আগানা, ইনাবাত্তে খামালরাংচা রি·য়াংএ আন·থাংখো ফিন্নিকবো, আরো মোশিনি গি·য়েতা গিত্তা হ·ন্নানিখো হন·বো। ইনি গিম্মিন নাং·নি নাম্মাংআখো মান্দিরাং হা·আইনা মা·ন্নুয়া।’’

সুবিদারনি নকখল সাকসা নামজক

5জা·মানো যীশু কফরনাহূম সংজিলমাও নাপজক। উনো রোমনি সুবিদার সাকসা বিচা রি·বাএ মল·মলে আগানজক, 6‘‘গিত্তেল, আংনি নকখল নক্কো গা·আকে দংআ। বিয়া হান·মা গক্কা হং·এ নাম্মেন সা·দিকখামে দংজক।’’

7যীশু বিনা আগানজক, ‘‘আংআ রি·য়াংএ বিখো নাম্মেতনুয়া।’’

8উয়া সুবিদার যীশুনা আগানচাকজক, ‘‘গিত্তেল, না·আ আংনি নক্কো নাপনা গিত্তা আংআ মান্দি হং·ফাজা। ইন্দিবা খু·সুকচাসান আগানবো, উনোন আংনি নকখল নাম্মাংআরিনুয়া। 9আংআ ইখো হা·আইয়া মুয়ানা আংখোবা গিপ্পিননি আগানা গিত্তা রি·না নাংআ আরো সিপাইরাংবা আংনি আগানা গিত্তান রি·য়া। আংআ সাকসাখো ‘রি·য়াংবো’ ইন্নোদে বিয়া রি·য়াংআ, সাকগিপ্পিনখো ‘রি·বাবো’ ইন্নোদে বিয়া রি·বাআ। আংনি নকখলখো ‘ইখো দাকবো’ ইন্নোদে বিয়া উখো দাক্কা।’’

10ইয়া খাৎথাখো খিন্নাএ যীশু আইয়াও ইনমানজক আরো বিমুং রি·য়াংফাগিবারাংনা আগানজক, ‘‘আংআ না·সংনা বিবিন আগানিংআ, ইস্রায়েলরাংনি গিসেপোবা ইন্দিতা বিবিরা·আখো আংআ নিকখুজা। 11আংআ না·সংনা আগানিংআ, সালারাম আরো সালিরামচানি বাং·এন রি·বানুয়া আরো অব্রাহাম, ইস্‌হাক আরো যাকোবমুং সালগিনি সংনকো চা·না আসংনুয়া। 12ইন্দিবা সালগিনি সংনকো দংনাগিবারাংখো হা·ফালনি আন্দালাও গাল্লেতনুয়া। উয়োনা মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া।’’

13জা·মানো যীশু উয়া সুবিদারনা আগানজক, ‘‘না·আ রি·য়াংবো। নাং·নি বিবিরা·আ গিত্তান হং·খানা।’’ উনোন বিনি নকখলবা নাম্মাংজক।

বাং·আ মান্দিরাংআন নামজক

14উনি জা·মানো যীশু পিতরনি নকচা রি·য়াংএ পিতরনি নিওগিবাখো জম্মে-সাএ থুয়ে দংআখো নিকনা মান·জক। 15যীশু বিনি জাকখো দাংথাপেতজক আরো উনোন বিনি জম্মা সাল·জক। জা·মানো বিয়া চাখাত্তে যীশুনা চা·আ-রিংআনিরাংখো থারিয়ে হন·জক।

16হান·থামানি জা·মানো মান্দিরাং গিসিক নামগিজাগিবা মান·গিবা বাং·আরাংখো যীশুচানা রিমবাজক। বিয়া খু·সুকচান গিসিক নামগিজাগিবারাংখো হা·রিকেতজক আরো গিম্মিক জম্মে-সাএ দংগিবারাংখো নাম্মেতজক। 17ইয়া গিম্মিকান হং·জক জেদাক্কে আগানসোগিবা যিশাইয়নি আগানা ইয়া খাৎথা চু·সকা:

বিয়া আনচিংনি গিম্মিক সাআরাংখো রা·চাকজক,

আরো আনচিংনি সা·দিকা-সা·খামারাংখো হা·রিকজক।

18যীশু আন·থাংনি সামব্রিও মান্দি বাং·আরাংখো নিক্কে জা·রিকগিবারাংখো সাগালনি নালসাচানা রি·য়াংখানা গি·য়েৎজক। 19উনো শাস্ত্র স্খিগিবা সাকসা যীশুচা রি·বাএ আগানজক, ‘‘স্খিগিবা, না·আ জেওনা রি·য়াংনুয়া আংআবা নাং·মুং উয়োনা রি·ফানুয়া।’’

20যীশু বিনা আগানজক, ‘‘শি·ওলরাংনি হা·খল দংআ আরো সাক্কানি দো·দ্রাংনি বিথিপরাং দংআ, ইন্দিবা মান্দিনি দেফান্থিনি স্খু দন্নানি হা·দাম মামুংচাবা দংজা।’’

21জা·রিকগিবারাংওনি দা·আও সাকসা রি·বাএ বিনা আগানজক, ‘‘স্খিগিবা, আংনি ফাখো গপনা আংখো রি·য়াংনা ওয়াতচেংবো।’’

22যীশু বিনা আগানজক, ‘‘সিগিবারাংআন আন·থাংথাংখো গপখানা, ইন্দিবা না·আ আংমুং রি·বাফাবো।’’

মিকখা বালওয়া রাক্কাখো থম·থমেতা

23জা·মানো যীশু গি·সা রিংও গাখাতজক আরো বিনি জা·রিকগিবারাং বিমুং রি·য়াংফাজক। 24উনো রাং·গিত্তিক সাগালও নাম্মেন মিকখা বালওয়া রাকজক, আরো উনি গান্দা সাগালনি চি ফকফেকে রিংও গাপবাজক। ইন্দিবা যীশু উনো থুয়ে দংআমিং। 25জা·রিকগিবারাং উনো বিচা রি·য়াংএ বিখো চামিসায়ে আগানজক, ‘‘জক্কেৎবো, গিত্তেল; আনচিংদে সিনাজক!’’

26উনো বিয়া বিসংনা আগানজক, ‘‘বিবিরা·ব্রিগিজাগিবারাং, না·সং মুয়ানা খেন্নিংআ?’’

উনি জা·মানো বিয়া চাখাত্তে বালওয়া আরো সাগালখো ইন্দাতজক। উনো গিম্মিকান নাম্মেন থম·থম হং·জক। 27উনি গান্দা জা·রিকগিবারাং আইয়াও ইনমানে আগানজক, ‘‘ইয়া বাদাকগিবা মানচা মান্দি, বালওয়া আরো সাগালবা বিনি খাৎথাখো মানিয়া!’’

গিসিক নামগিজাগিবা মান·গিবা মান্দিরাং নামজক

28জা·মানো যীশু সাগালনি নালসাওনা গাদারীয়রাংনি জওলচা রি·য়াংজক। উনো গিসিক নামগিজাগিবা মান·গিবা সাকগ্মি মান্দি গোপরামওনি হং·খাতে বিচা রি·বাজক। 29বিসং নাম্মেন জাজ্রেংএতগিবা হং·আমিং, উনি গান্দা দারাংবা উয়া রামা গিত্তা রি·না ফা·জানুয়ামিং। বিসং চ্রিকে আগানজক, ‘‘ও ইসলনি দেফান্থি, চিংমুং নাং·নি মুয়া নাংফাআ? সাল হং·খুজাওন না·আ চিংখো দুক হ·ন্না রি·বাজকমা?’’

30বিসংনি অকখিসা চে·ল্লাচা বাং·বিয়া ওয়াক জিলমা রওমে চা·আংআমিং। 31গিসিক নামগিজাগিবারাং যীশুখো মল·মলে আগানজক, ‘‘না·আ চিংখো হা·রিকনান হা·ম্মোদে উয়া ওয়াক জিলমাও নাপনা চিংখো ওয়াত্তেতবো।’’

32যীশু বিসংনা আগানজক, ‘‘উয়োন রি·য়াংবো।’’ উনোন বিসং হং·খাতে উয়া ওয়াকরাংও নাপ্পেজক। উনি গান্দা ওয়াক জিলমা হা·সলসল্‌ রিক্কাম গিত্তা থারাকে খাত্তাংজক আরো সাগালনি চিও রিপ্পে সিথকজক।

33উয়া ওয়াক জিলমারাংখো নিরিকগিবারাং উনো সংচানা খাত্তাংএ গিম্মিক খবলখো আগানেজক। মংসংদে বিসং গিম্মিকনান উয়া গিসিক নামগিজাগিবারাংনি গিম্মিন হং·গিবারাংখো আগানেজক। 34উনো সংনি মান্দি গিম্মিকান যীশুমুং গ্রংনা হং·খাতজক। যীশুখো গ্রংআনি জা·মানো বিসং বিসংনি হা·সংওনি রি·য়াংখানা বিখো মল·মলজক।

Actualmente seleccionado:

মথি 8: GLNT

Destacar

Copiar

Comparar